ന്യൂഡൽഹി /2026 / നവംബർ 19
കേന്ദ്ര ആയുഷ് വകുപ്പിന്റെ സ്വതന്ത്ര ചുമതലയുള്ള സഹമന്ത്രി പ്രതാപ്റാവു ജാദവ് നവംബർ 18ന് ന്യൂഡൽഹിയിൽ ബുർക്കിന ഫാസോ പ്രതിനിധിസംഘവുമായി കൂടിക്കാഴ്ച നടത്തി. ബുർക്കിന ഫാസോ പ്രസിഡന്റിന്റെ പ്രത്യേക ഉപദേഷ്ടാവും മന്ത്രിയുമായ റോജർ ബാരോയാണ് സംഘത്തെ നയിച്ചത്. നവംബർ 17 മുതൽ 25 വരെയാണ് സംഘത്തിന്റെ ഇന്ത്യാ സന്ദർശനം. പരമ്പരാഗത വൈദ്യവും ആയുഷ് സ്ഥാപനങ്ങളുമാണ് സന്ദർശനത്തിലെ പ്രധാന വിഷയങ്ങൾ.

ഔഷധസസ്യങ്ങൾ സംരക്ഷിക്കാൻ ഇന്ത്യയുടെ സഹകരണം
ബുർക്കിന ഫാസോയുമായുള്ള ബന്ധത്തിന് ഇന്ത്യ ഏറെ പ്രാധാന്യം നൽകുന്നുണ്ടെന്നും പങ്കാളിത്തം കൂടുതൽ ശക്തമാക്കാൻ താൽപര്യമുണ്ടെന്നും ജാദവ് പറഞ്ഞു. പരമ്പരാഗത വൈദ്യത്തിലും തദ്ദേശീയ ചികിത്സാരീതികളിലും ഇരു രാജ്യങ്ങൾക്കും സമ്പന്നമായ പാരമ്പര്യമുണ്ട്. ഈ രംഗത്ത് ഒന്നിച്ചുപ്രവർത്തിക്കാൻ അത് ഉറച്ച അടിത്തറയാണെന്നും അദ്ദേഹം പറഞ്ഞു. ബുർക്കിന ഫാസോയിലെ പരമ്പരാഗത ഔഷധസസ്യങ്ങൾ സംരക്ഷിക്കാനും സുസ്ഥിരമായി വികസിപ്പിക്കാനും ഇന്ത്യയുടെ പിന്തുണ തേടുന്നതിൽ പ്രസിഡന്റ് ക്യാപ്റ്റൻ ഇബ്രാഹിം ട്രയോറെ താൽപര്യം പ്രകടിപ്പിച്ചതായി അറിഞ്ഞെന്നും ജാദവ് പറഞ്ഞു. പരമ്പരാഗത വൈദ്യരംഗത്ത് ബുർക്കിന ഫാസോയുമായി അടുത്ത് പ്രവർത്തിക്കാൻ ഇന്ത്യയ്ക്ക് താൽപര്യമുണ്ട്. സസ്യ ഔഷധങ്ങളുടെ മാനദണ്ഡങ്ങൾ നിശ്ചയിക്കൽ, ഗുണനിലവാരം ഉറപ്പാക്കൽ, ഔഷധഗ്രന്ഥങ്ങളിലെ മാനദണ്ഡങ്ങൾ, ഔഷധ നിയന്ത്രണ സംവിധാനം എന്നിവയിൽ ഇന്ത്യയുടെ അനുഭവവും വൈദഗ്ധ്യവും പങ്കിടാൻ തയ്യാറാണെന്നും അദ്ദേഹം അറിയിച്ചു.

സംയുക്ത പദ്ധതിയും ധാരണാപത്രവും പരിഗണനയിൽ
ഇന്ത്യയിലെ ആയുഷ് സ്ഥാപനങ്ങളും ബുർക്കിന ഫാസോയിലെ പരമ്പരാഗത വൈദ്യ സ്ഥാപനങ്ങളും തമ്മിലുള്ള പങ്കാളിത്തത്തെ ജാദവ് സ്വാഗതം ചെയ്തു. സ്ഥാപനങ്ങൾ കൈകോർക്കുന്നത് പരമ്പരാഗത വൈദ്യരംഗത്ത് സഹകരണത്തിന് പുതിയ വഴികൾ തുറക്കുമെന്ന് അദ്ദേഹം പറഞ്ഞു. ഇന്ത്യയുടെ ദേശീയ ഔഷധസസ്യ ബോർഡും ബുർക്കിന ഫാസോയിലെ ബന്ധപ്പെട്ട സ്ഥാപനങ്ങളും ചേർന്ന് പരമ്പരാഗത ഔഷധസസ്യങ്ങളുടെ സംരക്ഷണത്തിനും സുസ്ഥിര വികസനത്തിനുമായി ഒരു പ്രധാന പദ്ധതി നടപ്പാക്കാൻ വലിയ സാധ്യതയുണ്ടെന്നും അദ്ദേഹം ചൂണ്ടിക്കാട്ടി. ബുർക്കിന ഫാസോയിൽ യോഗയും ആയുഷ് അധിഷ്ഠിത ആരോഗ്യപരിപാലന പരിപാടികളും പ്രോത്സാഹിപ്പിക്കാൻ ഇന്ത്യയ്ക്ക് താൽപര്യമുണ്ട്. സ്ഥാപനങ്ങൾ തമ്മിലുള്ള സഹകരണത്തിന് ചട്ടക്കൂടൊരുക്കാൻ കേന്ദ്ര ആയുഷ് മന്ത്രാലയവും ബുർക്കിന ഫാസോ ആരോഗ്യ മന്ത്രാലയവും തമ്മിൽ ധാരണാപത്രം ഒപ്പിടാനുള്ള സാധ്യത പരിശോധിക്കാമെന്നും ജാദവ് പറഞ്ഞു. ലോകാരോഗ്യ സംഘടനയുടെ ഭാവിയിലെ ആഗോള പരമ്പരാഗത വൈദ്യ ഉച്ചകോടികളിലും ഗുജറാത്തിലെ ജാംനഗറിലുള്ള ആഗോള പരമ്പരാഗത വൈദ്യ കേന്ദ്രത്തിലെ പരിപാടികളിലും ബുർക്കിന ഫാസോ പങ്കെടുക്കുന്നതിനെ അദ്ദേഹം സ്വാഗതം ചെയ്തു. നിർദേശങ്ങൾ മുന്നോട്ടുകൊണ്ടുപോകാനും ഏതൊക്കെ മേഖലകളിൽ സഹകരിക്കാമെന്ന് തീരുമാനിക്കാനും ആദ്യപടിയായി ഇരു രാജ്യങ്ങളും നോഡൽ ഉദ്യോഗസ്ഥരെ നിയോഗിക്കണമെന്ന് അദ്ദേഹം നിർദേശിച്ചു.
പരിശീലനവും സ്കോളർഷിപ്പും പ്രയോജനപ്പെട്ടത് 250ലേറെ പേർക്ക്
വികസ്വര രാജ്യങ്ങൾ തമ്മിലുള്ള സഹകരണത്തോടുള്ള ഇന്ത്യയുടെ പ്രതിബദ്ധതയും ജി ട്വന്റി, ബ്രിക്സ് വേദികളിലെ ഇന്ത്യയുടെ ഇടപെടലും ജാദവ് എടുത്തുപറഞ്ഞു. ബുർക്കിന ഫാസോയുടെ വികസന ലക്ഷ്യങ്ങൾ കൈവരിക്കാൻ ഇന്ത്യ പൂർണ പിന്തുണ നൽകും. അവിടത്തെ സർക്കാർ നിശ്ചയിക്കുന്ന ആവശ്യങ്ങളും മുൻഗണനകളുമാണ് വികസന പങ്കാളിത്തത്തിന് വഴികാട്ടിയെന്നും അദ്ദേഹം പറഞ്ഞു. ഐടെക്, ഐസിസിആർ, പിസിഎഫ്ഡി കോഴ്സ് തുടങ്ങിയവയിലൂടെ പരിശീലനവും സ്കോളർഷിപ്പും നൽകി ഇന്ത്യ നൈപുണ്യ വികസനത്തിന് സഹായിക്കുന്നുണ്ട്. കഴിഞ്ഞ ഏതാനും വർഷത്തിനിടെ ബുർക്കിന ഫാസോയിലെ 250ലേറെ പൗരന്മാർക്ക് ഈ അവസരങ്ങൾ പ്രയോജനപ്പെട്ടതായും മന്ത്രി പറഞ്ഞു.
ഇന്ത്യൻ സമൂഹത്തിന്റെ സുരക്ഷയ്ക്ക് തുടർന്നും പിന്തുണ തേടി
ബുർക്കിന ഫാസോയിലെ ഇന്ത്യൻ സമൂഹം എണ്ണത്തിൽ ചെറുതാണെങ്കിലും സജീവമാണെന്നും രാജ്യത്തിന്റെ സാമൂഹികവും സാമ്പത്തികവുമായ വികസനത്തിന് സംഭാവന നൽകുന്നുണ്ടെന്നും ജാദവ് പറഞ്ഞു. ഇന്ത്യൻ സമൂഹത്തിന്റെ സുരക്ഷ ഉറപ്പാക്കാൻ ബുർക്കിന ഫാസോ സർക്കാരിന്റെ പിന്തുണ തുടരുമെന്ന് പ്രതീക്ഷിക്കുന്നതായും അദ്ദേഹം അറിയിച്ചു. സഹകരണം, അറിവ് കൈമാറ്റം, പരിശീലനത്തിലൂടെയുള്ള ശേഷി വികസനം എന്നിവ വഴി പരമ്പരാഗത വൈദ്യം പ്രോത്സാഹിപ്പിക്കാൻ ബുർക്കിന ഫാസോയുമായി അടുത്ത് പ്രവർത്തിക്കുമെന്ന് ജാദവ് പറഞ്ഞു. പ്രതിനിധിസംഘത്തിന്റെ സന്ദർശനം വിജയകരവും ഫലപ്രദവുമാകട്ടെയെന്ന് ആശംസിച്ച അദ്ദേഹം ഇരുരാജ്യങ്ങളും തമ്മിലുള്ള സഹകരണം ഇനിയും മുന്നോട്ടുകൊണ്ടുപോകാൻ ആഗ്രഹിക്കുന്നതായും അറിയിച്ചു.
ഇരുരാജ്യങ്ങളിലെയും നയതന്ത്ര പ്രതിനിധികളും വിദഗ്ധരും പങ്കെടുത്തു
ഉന്നത വിദ്യാഭ്യാസ, ആരോഗ്യ വിഷയങ്ങളിൽ മന്ത്രാലയത്തിന്റെ പ്രത്യേക ഉപദേഷ്ടാവായ പ്രൊഫസർ റാക്കിസിഡ ആൽഫ്രഡ് ഔഡ്രാവോഗോയും ബുർക്കിന ഫാസോ സംഘത്തിലുണ്ടായിരുന്നു. ആരോഗ്യ മന്ത്രാലയത്തിലെ പരമ്പരാഗത, ബദൽ വൈദ്യ വിഭാഗം ഡയറക്ടർ ഡോക്ടർ മറിയം സവാഡോഗോ ബഗയാൻ സംഘത്തിന്റെ റിപ്പോർട്ട് തയ്യാറാക്കുന്നതിനുള്ള ചുമതല വഹിച്ചു. ജോസഫ് കി സെർബോ സർവകലാശാലയിൽ പ്രകൃതിദത്ത ഔഷധദ്രവ്യങ്ങളെക്കുറിച്ച് പഠിപ്പിക്കുകയും ഗവേഷണം നടത്തുകയും ചെയ്യുന്ന പ്രൊഫസർ അമിനാറ്റ പാഗ്നിംദെബ്സോം നകൗൽമയും സംഘത്തിലുണ്ടായിരുന്നു. ഫാർമസിയിൽ വിദഗ്ധനും പരമ്പരാഗത വൈദ്യ, സംയോജിത പരിചരണ കേന്ദ്രത്തിന്റെ ഡയറക്ടറുമായ ഡോക്ടർ ഹിയാസാന്ത് ബോങ്കൂംഗുവും പങ്കെടുത്തു. ബുർക്കിന ഫാസോ എംബസിയെ പ്രതിനിധീകരിച്ച് അംബാസഡർ സോമെ ദെസിറെ ബോണിഫാസ്, ഡെപ്യൂട്ടി ചീഫ് ഓഫ് മിഷൻ സാങ്ഗെ ഔട്ടാര ദിദിയേ ക്രിസ്ത്യൻ, ദ്വിഭാഷി ഔവോബ ജോയൽ എന്നിവർ പങ്കെടുത്തു. ഇന്ത്യൻ വിദേശകാര്യ മന്ത്രാലയത്തിൽനിന്ന് ബുർക്കിന ഫാസോയിലെ ഇന്ത്യൻ അംബാസഡർ ഒ പി മീണയും മധ്യ, പടിഞ്ഞാറൻ ആഫ്രിക്കയുടെ ചുമതലയുള്ള അണ്ടർ സെക്രട്ടറി കൈലാഷ് ഭട്ടും പങ്കെടുത്തു. ആയുഷ് മന്ത്രാലയം സെക്രട്ടറി വൈദ്യ രാജേഷ് കോടേച്ചയും മന്ത്രാലയത്തിലെ മുതിർന്ന ഉദ്യോഗസ്ഥരും സന്നിഹിതരായിരുന്നു. പരമ്പരാഗത വൈദ്യരംഗത്തെ സഹകരണം വിപുലമാക്കാനും ആയുഷ് സ്ഥാപനങ്ങളും ബുർക്കിന ഫാസോയിലെ സമാന സ്ഥാപനങ്ങളും തമ്മിലുള്ള ബന്ധം ശക്തമാക്കാനുമുള്ള പ്രതിബദ്ധത ഇരു രാജ്യങ്ങളും കൂടിക്കാഴ്ചയിൽ ആവർത്തിച്ചു.

.
Disclaimer: The information published on Samadarsi.com is provided for general news, informational, educational, and public awareness purposes only. While every reasonable effort is made to ensure the accuracy, reliability, and timeliness of the content, Samadarsi Communication LLP does not guarantee that all published information is free from errors, omissions, or inaccuracies. The views and opinions expressed in opinion articles, guest columns, interviews, and reader comments are solely those of the respective authors and do not necessarily reflect the views of Samadarsi Communication LLP. Readers are encouraged to independently verify any information before making financial, legal, medical, political, or personal decisions based on the content published on this website. Samadarsi.com reserves the right to update, modify, correct, or remove any content at any time without prior notice. Any links to external websites are provided solely for the convenience of users, and we do not endorse or accept responsibility for the content, security, accuracy, or privacy practices of such third-party websites. All trademarks, logos, images, and other copyrighted materials appearing on this website remain the property of their respective owners.