ന്യൂഡൽഹി  / 2026  / ഒക്ടോബർ 22 

പന്ത്രണ്ടാമത് ബ്രിക്സ് പാർലമെന്ററി ഫോറത്തിന് ഇന്ത്യൻ പാർലമെന്റ് ആതിഥേയത്വം വഹിക്കും. ഒക്ടോബർ 26നും 27നും ന്യൂഡൽഹിയിലെ സംവിധാൻ സദന്റെ സെൻട്രൽ ഹാളിലാണ് സമ്മേളനം. ഉദ്ഘാടനം ഒക്ടോബർ 26ന് നടക്കും. ഇന്ത്യയുടെ അധ്യക്ഷതയിൽ നടക്കുന്ന സമ്മേളനത്തിൽ ബ്രിക്സ് അംഗരാജ്യങ്ങളിലെയും പങ്കാളി രാജ്യങ്ങളിലെയും പാർലമെന്റ് നേതാക്കൾ പങ്കെടുക്കും. ജനകേന്ദ്രീകൃത വികസനത്തിനായി പാർലമെന്റുകളെ ശക്തിപ്പെടുത്തുന്നതാണ് മുഖ്യപ്രമേയം. പ്രധാനമന്ത്രി നരേന്ദ്ര മോദി ചടങ്ങിൽ പങ്കെടുക്കുകയും വിദേശ പ്രതിനിധിസംഘങ്ങളുടെ നേതാക്കളുമായി കൂടിക്കാഴ്ച നടത്തുകയും ചെയ്യുമെന്ന് ലോക്‌സഭാ സ്പീക്കർ ഓം ബിർള അറിയിച്ചു.

പാർലമെന്ററി നയതന്ത്രത്തിൽ പുതിയ അധ്യായമെന്ന് ഓം ബിർള

ഇന്ത്യയുടെ പാർലമെന്ററി നയതന്ത്ര ചരിത്രത്തിൽ സമ്മേളനം പുതിയ അധ്യായമാകുമെന്ന് പാർലമെന്റ് മന്ദിരത്തിൽ ഇന്ന് നടത്തിയ വാർത്താസമ്മേളനത്തിൽ ഓം ബിർള പറഞ്ഞു. ബ്രിക്സ് അംഗരാജ്യങ്ങളിലെയും പങ്കാളി രാജ്യങ്ങളിലെയും പാർലമെന്റ് സഭാധ്യക്ഷന്മാർ, പാർലമെന്ററി നേതാക്കൾ, കേന്ദ്രമന്ത്രിമാർ, രാജ്യസഭാ ഉപാധ്യക്ഷൻ ഹരിവംശ്, സംസ്ഥാന നിയമനിർമാണ സഭകളുടെ അധ്യക്ഷന്മാർ, പാർലമെന്റ് അംഗങ്ങൾ, മറ്റ് വിശിഷ്ടാതിഥികൾ എന്നിവർ പങ്കെടുക്കും. പാർലമെന്റുകൾ മുൻഗണന നൽകേണ്ട തന്ത്രപ്രധാന വിഷയങ്ങൾ ഇവർ ചർച്ച ചെയ്യും.

നാല് പ്രധാന വിഷയങ്ങളിൽ സമവായ ചർച്ചകൾ

ബ്രിക്സ് പാർലമെന്ററി ഫോറത്തിന്റെ മുൻകാല പ്രവർത്തനങ്ങളുടെ തുടർച്ചയായി, സമവായം അടിസ്ഥാനമാക്കിയുള്ള ചർച്ചകൾക്ക് നാല് ഉന്നതതല സമ്മേളനങ്ങൾ വേദിയാകും. മെച്ചപ്പെട്ട ഭാവിക്കായി സ്ഥാപനങ്ങളെ ശക്തിപ്പെടുത്തുന്നതിൽ പാർലമെന്റുകളുടെ നിർണായക പങ്കാണ് ആദ്യ വിഷയം. നിർമിതബുദ്ധിയിലും ഡിജിറ്റൽ സാങ്കേതികവിദ്യകളിലും മനുഷ്യകേന്ദ്രീകൃതവും ധാർമികവുമായ പുതുമകൾ പ്രോത്സാഹിപ്പിക്കുന്നതും ഡിജിറ്റൽ പരിവർത്തനവും രണ്ടാമത്തെ വിഷയമാകും. പാർലമെന്ററി സഹകരണത്തിലൂടെ കൂടുതൽ പ്രാതിനിധ്യമുള്ള ആഗോള ഭരണസംവിധാനം ഉറപ്പാക്കുന്നതിനുള്ള പരിഷ്കാരങ്ങളാണ് മൂന്നാമത്തെ വിഷയം. രാജ്യങ്ങൾക്ക് സുസ്ഥിരവും എല്ലാവരെയും ഉൾക്കൊള്ളുന്നതുമായ ഭാവി ഉറപ്പാക്കുന്നതിൽ പാർലമെന്റുകളുടെ പങ്കും ചർച്ച ചെയ്യും.

സംയുക്ത പ്രസ്താവനയ്ക്ക് മുന്നോടിയായി സെക്രട്ടറിമാരുടെ യോഗം

വിദേശ പ്രതിനിധിസംഘങ്ങളുടെ നേതാക്കളുമായും പാർലമെന്ററി സൗഹൃദ സംഘങ്ങളുമായും ഉഭയകക്ഷി, ബഹുകക്ഷി ചർച്ചകൾ നടക്കുമെന്ന് ഓം ബിർള പറഞ്ഞു. പന്ത്രണ്ടാമത് ബ്രിക്സ് പാർലമെന്ററി ഫോറത്തിന്റെ സംയുക്ത പ്രസ്താവനയ്ക്ക് അന്തിമരൂപം നൽകാൻ പ്രതിനിധിസംഘങ്ങളുടെ സെക്രട്ടറിമാർ ഒക്ടോബർ 25ന് യോഗം ചേരും. ബ്രിക്സ് അംഗരാജ്യങ്ങളിലെയും പങ്കാളി രാജ്യങ്ങളിലെയും പാർലമെന്റുകളുടെ അന്താരാഷ്ട്രകാര്യ സമിതി അധ്യക്ഷന്മാരുടെ പ്രത്യേക യോഗവും നടക്കും. പാർലമെന്ററി നയതന്ത്രം, പ്രവർത്തനശേഷി വർധിപ്പിക്കൽ, മികച്ച പ്രവർത്തനരീതികൾ പരസ്പരം പങ്കുവയ്ക്കൽ എന്നിവയാണ് ഈ യോഗത്തിലെ ചർച്ചാവിഷയങ്ങൾ.

സാംസ്കാരിക പരിപാടികളും ഉപരാഷ്ട്രപതിയുടെ വിരുന്നും

ഉന്നതതല പൊതുസമ്മേളനങ്ങൾക്കും സമാന്തര യോഗങ്ങൾക്കും ഉഭയകക്ഷി ആശയവിനിമയങ്ങൾക്കുമൊപ്പം സാംസ്കാരിക പരിപാടിയും ഒരുക്കും. വിശിഷ്ടാതിഥികളുടെ ബഹുമാനാർഥം ഇന്ത്യയുടെ ഉപരാഷ്ട്രപതി വിരുന്ന് നൽകും. പ്രതിനിധിസംഘങ്ങളിലെ അംഗങ്ങൾ ഇന്ത്യൻ പാർലമെന്റ് സന്ദർശിക്കും. ഡൽഹിയിലെ സാംസ്കാരിക സന്ദർശനങ്ങളിലും പങ്കെടുക്കും. ഒക്ടോബർ 27ന് സമ്മേളനം സമാപിക്കും.

.