ന്യൂഡൽഹി /  2026  / ഒക്ടോബർ 18 

നമോ ഭാരത് ട്രെയിൻ സർവീസ് വിജയകരമായ മൂന്ന് വർഷം പൂർത്തിയാക്കിയതിന്റെ ഭാഗമായി ദേശീയ തലസ്ഥാന മേഖലാ ഗതാഗത കോർപ്പറേഷൻ ഒക്ടോബർ 17ന് ന്യൂഡൽഹിയിൽ നമോ ഭാരത് ദിവസ് ആഘോഷിച്ചു. കേന്ദ്ര ഭവന, നഗരകാര്യ, ഊർജ മന്ത്രി മനോഹർ ലാൽ ഉൾപ്പെടെയുള്ളവർ പങ്കെടുത്തു. പ്രാദേശിക യാത്രാസൗകര്യങ്ങളിൽ മാറ്റം കൊണ്ടുവന്ന നമോ ഭാരതിന്റെ നേട്ടങ്ങളും യാത്രക്കാർക്കായി നടപ്പാക്കുന്ന പദ്ധതികളും ചടങ്ങിൽ അവതരിപ്പിച്ചു.

മൂന്ന് വർഷത്തെ നേട്ടങ്ങൾ ആഘോഷിച്ച് നമോ ഭാരത്

കേന്ദ്ര ഭവന, നഗരകാര്യ സഹമന്ത്രി തോഖൻ സാഹു, ഭവന, നഗരകാര്യ മന്ത്രാലയത്തിലെ തലസ്ഥാന വികസന വകുപ്പ് സെക്രട്ടറിയും ദേശീയ തലസ്ഥാന മേഖലാ ഗതാഗത കോർപ്പറേഷൻ അധ്യക്ഷയുമായ ഡി. താര, നഗരവികസന വകുപ്പ് സെക്രട്ടറി സതേന്ദ്ര സിങ് എന്നിവർ ചടങ്ങിൽ പങ്കെടുത്തു. കോർപ്പറേഷൻ മാനേജിങ് ഡയറക്ടർ ശലഭ് ഗോയലും ഡയറക്ടർമാരും മുതിർന്ന ഉദ്യോഗസ്ഥരും ചേർന്ന് അതിഥികളെ സ്വീകരിച്ചു.

നമോ ഭാരതിന്റെ പ്രധാന നാഴികക്കല്ലുകളും വിവിധ ഗതാഗത സംവിധാനങ്ങളെ തമ്മിൽ ബന്ധിപ്പിക്കാനുള്ള നടപടികളും ചടങ്ങിൽ വിലയിരുത്തി. വീട്ടിൽനിന്ന് സ്റ്റേഷനിലേക്കും സ്റ്റേഷനിൽനിന്ന് ലക്ഷ്യസ്ഥാനത്തേക്കുമുള്ള യാത്ര എളുപ്പമാക്കുന്ന സൗകര്യങ്ങളും അവതരിപ്പിച്ചു. പദ്ധതിയുടെ പരിസ്ഥിതി, സാമ്പത്തിക സുസ്ഥിരതയ്ക്കായുള്ള സോളാർ ഓൺ ട്രാക്ക് സംരംഭവും സ്വന്തം ആവശ്യത്തിനുള്ള 110 മെഗാവാട്ട് സൗരോർജ നിലയത്തിന്റെ വികസനവും ഇതിൽ ഉൾപ്പെട്ടു. നേട്ടങ്ങളും പുരോഗതിയും പരിശ്രമങ്ങളും പുതുമകളും സംരംഭങ്ങളും വിശദീകരിക്കുന്ന ചിത്രവും പ്രദർശിപ്പിച്ചു.

നാലരക്കോടിയിലേറെ യാത്രകൾ; ജനങ്ങളുടെ വിശ്വാസമെന്ന് മന്ത്രി

നമോ ഭാരത് എന്നത് വെറുമൊരു പേരല്ലെന്ന് കേന്ദ്രമന്ത്രി മനോഹർ ലാൽ പറഞ്ഞു. രാജ്യത്തിന് പ്രഥമ പരിഗണന നൽകുന്ന മനോഭാവത്തിനൊപ്പം സമർപ്പണവും സംസ്കാരവും പാരമ്പര്യവും അതിൽ അടങ്ങിയിരിക്കുന്നു. ഇന്ത്യയിലെ പ്രാദേശിക യാത്രാബന്ധങ്ങളിൽ നമോ ഭാരത് അതിവേഗ റെയിൽ പുതിയ കാലഘട്ടത്തിന് തുടക്കമിടുകയാണ്. നഗരഗതാഗതത്തിന്റെ ഭാവിക്ക് പുതിയൊരു മാനം നൽകുകയാണെന്നും അദ്ദേഹം പറഞ്ഞു. 2023 ഒക്ടോബർ 20ന് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തതുമുതൽ 82 കിലോമീറ്റർ നീളമുള്ള ഡൽഹി–ഗാസിയാബാദ്–മീററ്റ് പാതയിൽ നാലരക്കോടിയിലേറെ യാത്രകൾ രേഖപ്പെടുത്തി. ആധുനികവും സുരക്ഷിതവും തടസ്സമില്ലാത്തതുമായ യാത്രാസംവിധാനത്തിൽ ജനങ്ങൾക്കുള്ള വിശ്വാസം വർധിക്കുന്നതിന്റെ തെളിവാണിതെന്നും മന്ത്രി പറഞ്ഞു.

മെച്ചപ്പെട്ട ഗതാഗതം നഗരങ്ങൾക്കിടയിലെ ദൂരം കുറയ്ക്കുന്നതിനൊപ്പം ജനങ്ങളെ പുതിയ അവസരങ്ങളുമായി ബന്ധിപ്പിക്കുന്നുവെന്നും മനോഹർ ലാൽ പറഞ്ഞു. ഇതിലൂടെ പ്രാദേശിക വികസനത്തിനും സാമ്പത്തിക പുരോഗതിക്കും വേഗം കൂടും. ഈ വലിയ പദ്ധതി യാഥാർഥ്യമാക്കാൻ സമർപ്പണത്തോടെ പ്രവർത്തിച്ച കോർപ്പറേഷനിലെ ഉദ്യോഗസ്ഥർ, എൻജിനീയർമാർ, സാങ്കേതിക വിദഗ്ധർ, ജീവനക്കാർ, തൊഴിലാളികൾ എന്നിവരെ അദ്ദേഹം അഭിനന്ദിച്ചു.

ദിവസവും 1.1 ലക്ഷത്തിലേറെ യാത്രക്കാർ

2023 ഒക്ടോബറിൽ സാഹിബാബാദിനും ദുഹായ് ഡിപ്പോയ്ക്കുമിടയിലെ 17 കിലോമീറ്റർ മുൻഗണനാ ഭാഗം ഉദ്ഘാടനം ചെയ്തതോടെയാണ് നമോ ഭാരത് സർവീസ് തുടങ്ങിയത്. തുടർന്ന് ഘട്ടംഘട്ടമായി പാത മുഴുവൻ പ്രവർത്തനസജ്ജമാക്കി. 2026 ഫെബ്രുവരി 22ന് പ്രധാനമന്ത്രി നരേന്ദ്ര മോദി 82 കിലോമീറ്റർ നമോ ഭാരത് പാത മുഴുവനും മീററ്റ് മെട്രോയ്ക്കൊപ്പം രാജ്യത്തിന് സമർപ്പിച്ചു. നിലവിൽ ദിവസവും 1.1 ലക്ഷത്തിലേറെ പേർ നമോ ഭാരതിൽ യാത്ര ചെയ്യുന്നു. അടുത്തിടെ ഒരു ദിവസം ഏകദേശം 1.68 ലക്ഷം പേർ യാത്രചെയ്ത് സർവകാല റെക്കോർഡും രേഖപ്പെടുത്തി.

വേഗമേറിയതും ഇടയ്ക്കിടെ ലഭിക്കുന്നതും വിശ്വസനീയവുമായ സർവീസുകൾ യാത്ര കൂടുതൽ കാര്യക്ഷമമാക്കുന്നു. തൊഴിലിടങ്ങൾ, വിദ്യാഭ്യാസ സ്ഥാപനങ്ങൾ, സാമ്പത്തിക കേന്ദ്രങ്ങൾ എന്നിവിടങ്ങളിലേക്ക് എത്തിച്ചേരുന്നത് എളുപ്പമാക്കുകയും ദിവസേനയുള്ള യാത്രയിൽ കൂടുതൽ സൗകര്യവും സമയലാഭവും നൽകുകയും ചെയ്യുന്നു. ഡൽഹി–പാനിപ്പത്ത്–കർണാൽ, ഡൽഹി–ഗുരുഗ്രാം–ബെഹ്‌റോർ എന്നീ രണ്ട് മുൻഗണനാ നമോ ഭാരത് പാതകൾക്ക് ഉടൻ അനുമതി ലഭിക്കുമെന്നാണ് പ്രതീക്ഷ. ഗാസിയാബാദ്–ജേവർ, നോയിഡ–ഫരീദാബാദ്–ഗുഡ്ഗാവ് പാതകൾ വിശദമായ പദ്ധതിരേഖ തയ്യാറാക്കുന്ന ഘട്ടത്തിലാണ്.

കാഴ്ചപ്പാട് യാഥാർഥ്യമാക്കിയ കൂട്ടായ പരിശ്രമം

ഈ മാറ്റത്തിന് പിന്നിൽ പ്രവർത്തിച്ചവരെയും ചടങ്ങിൽ ആദരിച്ചു. രാജ്യത്ത് ആധുനികവും സുരക്ഷിതവും വിശ്വസനീയവും പരിസ്ഥിതിസൗഹൃദവുമായ പ്രാദേശിക ഗതാഗത സംവിധാനം വികസിപ്പിക്കുകയെന്ന ലക്ഷ്യത്തോടെയാണ് കോർപ്പറേഷൻ രൂപീകരിച്ചതെന്ന് മാനേജിങ് ഡയറക്ടർ ശലഭ് ഗോയൽ പറഞ്ഞു. ആ കാഴ്ചപ്പാട് കടലാസിൽ ഒതുക്കാതെ യാഥാർഥ്യമാക്കുന്നതിൽ വ്യക്തവും ശ്രദ്ധേയവുമായ പുരോഗതി കൈവരിക്കാനായത് അഭിമാനകരമാണെന്നും അദ്ദേഹം പറഞ്ഞു.

ഓരോ വെല്ലുവിളിയിലും ജീവനക്കാർക്കൊപ്പം ഉറച്ചുനിന്ന കുടുംബങ്ങൾക്ക് ശലഭ് ഗോയൽ പ്രത്യേക നന്ദി അറിയിച്ചു. അവരുടെ അചഞ്ചലമായ പിന്തുണ സ്ഥാപനത്തിന്റെ യാത്രയുടെ അവിഭാജ്യ ഘടകമാണെന്നും അദ്ദേഹം പറഞ്ഞു. വർഷത്തെ മികച്ച പ്രകടനത്തിനുള്ള കോർപ്പറേഷന്റെ വാർഷിക പുരസ്കാരങ്ങളും ചടങ്ങിൽ വിതരണം ചെയ്തു. നമോ ഭാരത് വിജയകരമായി നടപ്പാക്കുന്നതിനും സർവീസ് നടത്തുന്നതിനും വിലപ്പെട്ട സംഭാവന നൽകിയ ജീവനക്കാരുടെ സമർപ്പണവും മികവിനോടുള്ള പ്രതിബദ്ധതയും അംഗീകരിച്ചായിരുന്നു ആദരം.

സംഗീതവും നൃത്തവും നിറംപകർന്ന ആഘോഷം

വ്യക്തിഗത നേട്ടങ്ങൾക്കൊപ്പം കോർപ്പറേഷനെ മുന്നോട്ടുനയിക്കുന്ന കൂട്ടായ മനോഭാവത്തിന്റെയും സംഘപ്രവർത്തനത്തിന്റെയും അംഗീകാരം കൂടിയായി പുരസ്കാരങ്ങൾ. സംഗീത, നൃത്തപരിപാടികൾ ആഘോഷങ്ങൾക്ക് നിറവും ഊർജവും പകർന്നു.

ജനങ്ങളെ അവസരങ്ങളിലേക്ക് അടുപ്പിക്കാനും കൂടുതൽ യാത്രാബന്ധങ്ങളും എളുപ്പത്തിലുള്ള എത്തിച്ചേരലും സുസ്ഥിരതയുമുള്ള മേഖല സൃഷ്ടിക്കാനും ആധുനിക പൊതുഗതാഗതത്തിന് കഴിയുമെന്നതിന്റെ തെളിവാണ് നമോ ഭാരതിന്റെ യാത്ര. യാത്രക്കാരെ കാഴ്ചപ്പാടിന്റെ കേന്ദ്രത്തിൽ നിർത്തി സുരക്ഷിതവും സുഖകരവും വിശ്വസനീയവും കാര്യക്ഷമവുമായ യാത്രാസൗകര്യങ്ങൾ മുന്നോട്ടുകൊണ്ടുപോകാനാണ് കോർപ്പറേഷന്റെ പ്രതിബദ്ധത. മേഖലയിലെ ജനങ്ങൾക്കായി നമോ ഭാരതിന്റെ നേട്ടങ്ങൾ കൂടുതൽ വിപുലപ്പെടുത്തുന്നതും തുടരും.

.