സ്വതന്ത്ര വ്യാപാര കരാറുകളിലൂടെ കയറ്റുമതി കൂട്ടാൻ ജയ്പുരിൽ കയറ്റുമതിക്കാർക്ക് മാർഗനിർദേശവുമായി വാണിജ്യ വകുപ്പ്

ജയ്പുർ  / 2026  / ഒക്ടോബർ 17

ഇന്ത്യയുടെ സ്വതന്ത്ര വ്യാപാര കരാറുകളിലെ ആനുകൂല്യങ്ങൾ പ്രയോജനപ്പെടുത്തി കയറ്റുമതി വർധിപ്പിക്കാൻ രാജസ്ഥാനിലെ ജയ്പുരിൽ ബോധവത്കരണ പരിപാടി സംഘടിപ്പിച്ച് കേന്ദ്ര വാണിജ്യ വകുപ്പ്. കരാറുകളിലൂടെ ലഭിക്കുന്ന വിപണി പ്രവേശനം എങ്ങനെ വ്യാപാര അവസരങ്ങളാക്കി മാറ്റാമെന്നതായിരുന്നു പരിപാടിയുടെ പ്രധാന വിഷയം. വാണിജ്യ വകുപ്പ് ജോയിന്റ് സെക്രട്ടറി മോഹിത് യാദവ് പരിപാടിയെ അഭിസംബോധന ചെയ്തു. വിവിധ മേഖലകളിലെ കയറ്റുമതിക്കാരും രാജസ്ഥാൻ സർക്കാർ, വിദേശ വ്യാപാര ഡയറക്ടറേറ്റ് ജനറൽ, ജയ്പുർ പ്രത്യേക സാമ്പത്തിക മേഖല, രത്നാഭരണ കയറ്റുമതി പ്രോത്സാഹന കൗൺസിൽ എന്നിവയുടെ പ്രതിനിധികളും പങ്കെടുത്തു.

കരാറിലെ ആനുകൂല്യങ്ങൾ കയറ്റുമതിയിലേക്ക്

സ്വതന്ത്ര വ്യാപാര കരാറുകൾ പ്രയോജനപ്പെടുത്തുക എന്ന ആശയത്തിലായിരുന്നു പരിപാടി. ഇന്ത്യൻ സംരംഭങ്ങൾക്ക് കരാറുകളിലൂടെ ലഭിക്കുന്ന മുൻഗണനാ വിപണി പ്രവേശനം കയറ്റുമതി അവസരങ്ങളാക്കി മാറ്റാൻ സഹായിക്കുകയാണ് ലക്ഷ്യം. ഇതിനായി ആവശ്യമായ വിവരങ്ങൾ, ശേഷിവികസനം, പ്രായോഗിക മാർഗനിർദേശം എന്നിവ നൽകും. വാണിജ്യ വകുപ്പ്, സംസ്ഥാന സർക്കാരുകൾ, വ്യവസായ സംഘടനകൾ, കയറ്റുമതിക്കാർ എന്നിവർ തമ്മിലുള്ള ഏകോപനവും ശക്തിപ്പെടുത്തും. രാജസ്ഥാനിലെ കയറ്റുമതിക്കാർക്ക് കരാറുകളിലെ അവസരങ്ങളും ആനുകൂല്യങ്ങൾ നേടുന്നതിലെ പ്രായോഗിക ബുദ്ധിമുട്ടുകളും ചർച്ച ചെയ്യാനും പരിപാടി വേദിയായി.

ആഗോള സമ്പദ്‌വ്യവസ്ഥയുമായുള്ള ഇന്ത്യയുടെ ബന്ധം വിപുലമാകുന്ന സാഹചര്യത്തിലാണ് പരിപാടിക്ക് പ്രസക്തിയേറുന്നത്. ഇന്ത്യയുടെ കഴിവുകൾ മറ്റു രാജ്യങ്ങൾക്കും പുതിയ അവസരങ്ങൾ തുറന്നുകൊടുക്കണമെന്നതാണ് നിരന്തര ശ്രമമെന്ന് ന്യൂഡൽഹിയിലെ ബ്ലൂംബെർഗ് ന്യൂ ഇക്കോണമി ഫോറത്തിൽ പ്രധാനമന്ത്രി നരേന്ദ്ര മോദി പറഞ്ഞിരുന്നു. 2026 ഓഗസ്റ്റ് 15-ലെ സ്വാതന്ത്ര്യദിന പ്രസംഗത്തിലും മറ്റു അവസരങ്ങളിലും ഇന്ത്യൻ ഉൽപ്പാദകർ, കർഷകർ, സൂക്ഷ്മ, ചെറുകിട, ഇടത്തരം സംരംഭങ്ങൾ എന്നിവർക്ക് സ്വതന്ത്ര വ്യാപാര കരാറുകൾ നൽകുന്ന അവസരങ്ങൾ അദ്ദേഹം ചൂണ്ടിക്കാട്ടിയിരുന്നു. ആഗോള വിപണികളിലെത്താൻ അന്താരാഷ്ട്ര ഗുണനിലവാര മാനദണ്ഡങ്ങൾ പാലിക്കണമെന്നും പ്രധാനമന്ത്രി ഊന്നിപ്പറഞ്ഞു.

കയറ്റുമതിയിൽ വളർച്ച; ഗുണനിലവാരം നിർണായകം

കർഷകർ, വനിതാ സംരംഭകർ, യുവാക്കൾ, സൂക്ഷ്മ, ചെറുകിട, ഇടത്തരം സംരംഭങ്ങൾ, കരകൗശല തൊഴിലാളികൾ, വ്യവസായ മേഖല എന്നിവയ്ക്ക് മുൻഗണനാ വിപണി പ്രവേശനം അവസരങ്ങൾ സൃഷ്ടിക്കുമെന്ന് കേന്ദ്ര വാണിജ്യ വ്യവസായ മന്ത്രി പീയൂഷ് ഗോയലും വ്യക്തമാക്കിയിട്ടുണ്ട്. കുറഞ്ഞ തീരുവയിലോ തീരുവയില്ലാതെയോ വിപണികളിലെത്താനുള്ള സൗകര്യം പ്രയോജനപ്പെടുത്തണമെന്നാണ് അദ്ദേഹത്തിന്റെ ആഹ്വാനം. ഇതിനായി ഗുണനിലവാരത്തിലും മത്സരക്ഷമതയിലും ശ്രദ്ധ കേന്ദ്രീകരിക്കണം.

ഇന്ത്യയുടെ ചരക്ക്, സേവന കയറ്റുമതിയിൽ വളർച്ച തുടരുകയാണ്. 2026–27 സാമ്പത്തിക വർഷത്തിലെ ഏപ്രിൽ മുതൽ സെപ്റ്റംബർ വരെയുള്ള മൊത്തം കയറ്റുമതി 47,620 കോടി അമേരിക്കൻ ഡോളറാണെന്നാണ് കണക്ക്. മുൻ സാമ്പത്തിക വർഷത്തിലെ ഇതേ കാലയളവിൽ ഇത് 41,831 കോടി ഡോളറായിരുന്നു. കണക്കാക്കിയ വളർച്ച 13.84 ശതമാനമാണ്. 2026 സെപ്റ്റംബറിലെ ചരക്ക് കയറ്റുമതി വളർച്ചയ്ക്ക് പ്രധാന കരുത്തായത് ഇലക്ട്രോണിക് ഉൽപ്പന്നങ്ങൾ, പെട്രോളിയം ഉൽപ്പന്നങ്ങൾ, ജൈവ–അജൈവ രാസവസ്തുക്കൾ, എൻജിനീയറിങ് ഉൽപ്പന്നങ്ങൾ എന്നിവയാണ്. പരുത്തിനൂൽ, തുണിത്തരങ്ങൾ, തുണിയിൽനിന്നുള്ള തയ്യാറാക്കിയ ഉൽപ്പന്നങ്ങൾ, കൈത്തറി ഉൽപ്പന്നങ്ങൾ എന്നിവയും വളർച്ചയ്ക്ക് സംഭാവന നൽകി.

വിദേശ വിപണിയിലെത്താൻ അറിയേണ്ട കാര്യങ്ങൾ

യു.എ.ഇ., ഓസ്ട്രേലിയ, യൂറോപ്യൻ സ്വതന്ത്ര വ്യാപാര അസോസിയേഷൻ രാജ്യങ്ങൾ, യുണൈറ്റഡ് കിങ്ഡം തുടങ്ങിയ പങ്കാളികളുമായുള്ള ഇന്ത്യയുടെ വ്യാപാര കരാറുകളും ക്രമീകരണങ്ങളും പരിപാടിയിൽ ചർച്ചയായി. ഇന്ത്യൻ ചരക്കുകൾക്കും സേവനങ്ങൾക്കും വിദേശ ഉപഭോക്താക്കൾ, വാങ്ങുന്നവർ, നിക്ഷേപകർ, മൂല്യശൃംഖലകൾ എന്നിവയിലേക്ക് എത്താനുള്ള വഴികളാണ് ഇവ തുറക്കുന്നത്. ഓരോ കരാറിലെയും വ്യവസ്ഥകളും അവ നടപ്പാക്കിയിരിക്കുന്ന ഘട്ടവും അനുസരിച്ചായിരിക്കും അവസരങ്ങൾ ലഭിക്കുക. കയറ്റുമതിക്ക് സജ്ജമായ ഉൽപ്പന്നങ്ങൾ കണ്ടെത്തുക, തീരുവ ഇളവുകളും ഉൽപ്പന്നത്തിന്റെ ഉത്ഭവം നിർണയിക്കുന്ന ചട്ടങ്ങളും മനസ്സിലാക്കുക, ഗുണനിലവാരവും സർട്ടിഫിക്കേഷൻ നിബന്ധനകളും പാലിക്കുക, വിദേശ വാങ്ങുന്നവരുമായുള്ള ബന്ധം ശക്തിപ്പെടുത്തുക എന്നിവയിലായിരുന്നു ചർച്ചകളുടെ ശ്രദ്ധ.

അടുത്തിടെ പൂർത്തിയായ സ്വതന്ത്ര വ്യാപാര കരാറുകളിലൂടെ രത്നാഭരണ മേഖലയ്ക്കുള്ള കയറ്റുമതി അവസരങ്ങളെക്കുറിച്ച് ജയ്പുരിലെ വിദേശ വ്യാപാര ജോയിന്റ് ഡയറക്ടർ ജനറൽ മുഹമ്മദ് മൊയിൻ അഫാഖ് അവതരണം നടത്തി. ലോകത്തെ രത്നാഭരണ കയറ്റുമതിക്കാരിൽ ഇന്ത്യ എട്ടാം സ്ഥാനത്താണെന്ന് അവതരണത്തിൽ വ്യക്തമാക്കി. ഒരു ലക്ഷം കോടി അമേരിക്കൻ ഡോളർ മൂല്യമുള്ള ആഗോള വിപണിയിൽ ഇന്ത്യയുടെ വിഹിതം 2.9 ശതമാനമാണ്. പുതിയ കരാറുകൾ ഉൾക്കൊള്ളുന്ന രാജ്യങ്ങളിലെ ഇറക്കുമതി വിപണി അവസരങ്ങളും വിശദീകരിച്ചു. ഓരോ കരാറിലെയും തീരുവ പട്ടികകളിൽ ഉടൻ ലഭിക്കുന്ന തീരുവരഹിത പ്രവേശനവും അവതരണത്തിൽ ചൂണ്ടിക്കാട്ടി.

രാജസ്ഥാന്റെ രത്നാഭരണങ്ങൾക്ക് പുതിയ സാധ്യതകൾ

പ്രധാന വിതരണ രാജ്യങ്ങളുമായി താരതമ്യം ചെയ്യുമ്പോൾ ഇന്ത്യയുടെ മത്സരനില എന്താണെന്നും അവതരണത്തിൽ പരിശോധിച്ചു. തീരുവയിലെ അനുകൂല്യം ഇന്ത്യൻ കയറ്റുമതിക്കാർക്ക് പ്രയോജനപ്പെടാവുന്ന ഉൽപ്പന്ന വിഭാഗങ്ങളും കരാർ വിപണികളും കണ്ടെത്തി. ലാബിൽ വളർത്തിയ വജ്രങ്ങൾ പതിച്ച ആഭരണങ്ങൾ, നിറമുള്ള രത്നക്കല്ലുകൾ, കുന്ദൻ–മീനാകാരി പാരമ്പര്യ ആഭരണങ്ങൾ, സ്മാർട്ട് ആഭരണങ്ങൾ, ധരിക്കാവുന്ന സാങ്കേതികവിദ്യ ഉൾപ്പെടുത്തിയ ആഭരണങ്ങൾ എന്നിവയിലെ പുതിയ അവസരങ്ങൾ വിശദീകരിച്ചു. പുനരുപയോഗിച്ച സ്വർണത്തിലും ഉത്തരവാദിത്വമുള്ള ഉറവിടങ്ങളിൽനിന്ന് ശേഖരിച്ച സ്വർണത്തിലും നിർമിക്കുന്ന ആഭരണങ്ങൾ, മുത്ത്, കൃത്രിമമായി വളർത്തിയ മുത്ത് എന്നിവ ഉപയോഗിച്ചുള്ള ആഭരണങ്ങൾക്കും സാധ്യതകളുണ്ട്. രത്നാഭരണ മേഖലയിൽ ശക്തമായ സാന്നിധ്യമുള്ള രാജസ്ഥാന് ഇവ ഏറെ പ്രസക്തമാണ്.

തുണിത്തരങ്ങൾ, വസ്ത്രങ്ങൾ, കരകൗശല ഉൽപ്പന്നങ്ങൾ, രത്നാഭരണങ്ങൾ, എൻജിനീയറിങ് ഉൽപ്പന്നങ്ങൾ, കല്ല്, ധാതുക്കൾ, കാർഷിക–സംസ്കരിച്ച ഭക്ഷ്യ ഉൽപ്പന്നങ്ങൾ എന്നിവയിലൂടെ ഇന്ത്യയുടെ കയറ്റുമതി വളർച്ചയ്ക്ക് വലിയ സംഭാവന നൽകാൻ രാജസ്ഥാന് കഴിയും. 2029-ഓടെ 35,000 കോടി അമേരിക്കൻ ഡോളർ മൂല്യമുള്ള സമ്പദ്‌വ്യവസ്ഥയാകുക എന്ന ലക്ഷ്യം രാജസ്ഥാൻ സാമ്പത്തിക അവലോകനം 2024–25 വ്യക്തമാക്കുന്നു. രാജസ്ഥാൻ കയറ്റുമതി പ്രോത്സാഹന നയം 2024 വിഭാവനം ചെയ്യുന്നതനുസരിച്ച് 2029-ഓടെ കയറ്റുമതി ഒന്നര ലക്ഷം കോടി രൂപയിലെത്തിക്കാനും ലക്ഷ്യമിടുന്നു. 2047-ഓടെ 4.3 ലക്ഷം കോടി അമേരിക്കൻ ഡോളർ മൂല്യമുള്ള സമ്പദ്‌വ്യവസ്ഥ കെട്ടിപ്പടുക്കാനുള്ള വികസിത രാജസ്ഥാൻ കാഴ്ചപ്പാടും 2026–27 ബജറ്റിലുണ്ട്. ഈ ലക്ഷ്യങ്ങൾ 2047-ഓടെയുള്ള വികസിത ഭാരതം എന്ന ദേശീയ കാഴ്ചപ്പാടുമായി ചേർന്നുനിൽക്കുന്നു.

കർഷകർ മുതൽ വനിതാ സംരംഭകർ വരെ അവസരങ്ങൾ

അർഹമായ കാർഷിക ഉൽപ്പന്നങ്ങൾ, ചെറുധാന്യങ്ങൾ, സുഗന്ധവ്യഞ്ജനങ്ങൾ, സംസ്കരിച്ച ഭക്ഷ്യവസ്തുക്കൾ എന്നിവയ്ക്ക് പുതിയ വിപണികൾ കണ്ടെത്താൻ രാജസ്ഥാനിലെ കർഷകർക്കും കർഷക ഉൽപ്പാദക സംഘടനകൾക്കും കരാറുകൾ സഹായിക്കും. ഭക്ഷ്യസുരക്ഷ, ഉൽപ്പന്നത്തിന്റെ ഉറവിടവും സഞ്ചാരപാതയും തിരിച്ചറിയാനുള്ള സംവിധാനം, ഇറക്കുമതി രാജ്യങ്ങളുടെ മറ്റു നിബന്ധനകൾ എന്നിവ പാലിക്കണം. തുണിത്തരങ്ങൾ, കരകൗശലം, ആഭരണങ്ങൾ, എൻജിനീയറിങ് മേഖലകളിലെ ചെറുകിട സംരംഭങ്ങൾക്കും കരകൗശല തൊഴിലാളികൾക്കും തീരുവ ഇളവുകൾ വിലയിലെ മത്സരക്ഷമത വർധിപ്പിക്കാനും അന്താരാഷ്ട്ര വിതരണശൃംഖലകളിൽ പങ്കാളികളാകാനും സഹായിക്കും. വനിതകൾ നയിക്കുന്ന സംരംഭങ്ങൾക്കും സ്വയംസഹായ സംഘങ്ങൾക്കും കയറ്റുമതി പരിശീലനം, ഇ–കൊമേഴ്സ്, വാങ്ങുന്നവരുമായുള്ള ബന്ധങ്ങൾ എന്നിവ പ്രയോജനപ്പെടും. വലിയ സ്ഥാപനങ്ങൾക്ക് നിക്ഷേപം, സാങ്കേതിക പങ്കാളിത്തം, വിപണി വൈവിധ്യവൽക്കരണം എന്നിവയിലെ സാധ്യതകളും തേടാം. ലഭിക്കുന്ന നേട്ടങ്ങൾ ഉൽപ്പന്നം, പങ്കാളി രാജ്യം, ബാധകമായ കരാർ വ്യവസ്ഥകൾ എന്നിവയെ ആശ്രയിച്ചിരിക്കും.

ജയ്പുർ, ജോധ്പുർ, ഉദയ്പുർ, ഭിൽവാര തുടങ്ങിയ ജില്ലകളിലെ സംരംഭങ്ങളെ അന്താരാഷ്ട്ര വാങ്ങുന്നവരുമായും വിതരണശൃംഖലകളുമായും ബന്ധിപ്പിച്ച് ആഗോള വ്യാപാരത്തിൽ രാജസ്ഥാന്റെ പങ്കാളിത്തം ശക്തിപ്പെടുത്താനാണ് പരിപാടി ലക്ഷ്യമിടുന്നത്. വ്യാപാര ഇളവുകൾ, കയറ്റുമതി രേഖകൾ, ഉൽപ്പന്ന മാനദണ്ഡങ്ങൾ, ചരക്കുനീക്കം, വിപണി വിവരങ്ങൾ എന്നിവയെക്കുറിച്ചുള്ള അറിവ് ആദ്യമായി കയറ്റുമതിയിലേക്ക് വരുന്നവർക്ക് ആഭ്യന്തര വിപണിക്കപ്പുറം വളരാൻ സഹായിക്കും. സംസ്ഥാന സർക്കാരിന്റെ പിന്തുണ, വ്യവസായ മേഖലകളുടെയും പാർക്കുകളുടെയും വികസനം, കയറ്റുമതിയിൽ ശ്രദ്ധ കേന്ദ്രീകരിക്കുന്ന മേഖലാടിസ്ഥാനത്തിലുള്ള പ്രത്യേക ദൗത്യസംഘങ്ങൾ എന്നിവയും സഹായകമാകും. വായ്പാസൗകര്യം, സാമ്പത്തിക പ്രോത്സാഹനങ്ങൾ, വിപണി ബന്ധങ്ങൾ, നൈപുണ്യവികസനം, ഗുണനിലവാര സർട്ടിഫിക്കേഷൻ, സാങ്കേതിക നവീകരണം, ഇ–കൊമേഴ്സ് എന്നിവ പ്രോത്സാഹിപ്പിക്കുന്ന നയങ്ങളും പദ്ധതികളും സംരംഭകത്വം, തൊഴിൽ, ഉപജീവനം എന്നിവയ്ക്ക് കരുത്തേകും. വികസിത രാജസ്ഥാൻ 2047, വികസിത ഭാരതം 2047 എന്നീ ലക്ഷ്യങ്ങളിലേക്കും ഈ ശ്രമങ്ങൾ സംഭാവന നൽകും.

.