ഫിലിപ്പീൻസിൽ നടന്ന ആസിയാൻ–ഇന്ത്യ നാവികാഭ്യാസം 2026ലെ പങ്കാളിത്തം ഇന്ത്യൻ നാവികസേനയുടെ കപ്പലുകളായ സഹ്യാദ്രിയും കുലിശും പൂർത്തിയാക്കി. ‘വിശ്വാസത്തിൽ നങ്കൂരമിട്ട്, കടലിൽ ഒറ്റക്കെട്ടായി’ എന്ന ആശയത്തിലായിരുന്നു അഭ്യാസം. തുറമുഖത്തും കടലിലുമായി നടന്ന പരിശീലനങ്ങൾ നാവികസേനകൾക്ക് തൊഴിൽപരമായ ആശയവിനിമയത്തിനും പ്രവർത്തനങ്ങൾ ഏകോപിപ്പിക്കുന്നതിനും അവസരമൊരുക്കി. ഇന്ത്യയുടെ ആക്ട് ഈസ്റ്റ് നയത്തിനും മഹാസാഗർ കാഴ്ചപ്പാടിനും അനുസൃതമായാണ് ഇന്ത്യൻ കപ്പലുകൾ പങ്കെടുത്തത്.

തുറമുഖത്ത് ആശയവിനിമയവും കൂട്ടായ പ്രവർത്തനങ്ങളും

ഉദ്ഘാടനച്ചടങ്ങിന് പിന്നാലെയായിരുന്നു തുറമുഖഘട്ടം. പ്രധാന നേതാക്കളുടെ കൂടിക്കാഴ്ചകൾ, കായിക പരിപാടികൾ, യോഗ, പ്രാദേശിക സമൂഹവുമായുള്ള ഇടപെടൽ, വിഷയവിദഗ്ധർ തമ്മിലുള്ള ആശയവിനിമയം എന്നിവ നടന്നു. സാഹചര്യങ്ങൾ വിലയിരുത്തി നടപടികൾ ആസൂത്രണം ചെയ്യുന്ന ചർച്ചാധിഷ്ഠിത അഭ്യാസവും പ്രവർത്തനങ്ങളുടെ ഏകോപനവും സംഘടിപ്പിച്ചു. കടലിലേക്ക് പുറപ്പെടുന്നതിന് മുമ്പുള്ള വിശദീകരണ യോഗവും നടന്നു. കടൽഘട്ടത്തിനുള്ള തയ്യാറെടുപ്പുകൾക്കും ഏകോപനത്തിനും ഇവ സഹായിച്ചു.

കടലിൽ ദുരിതാശ്വാസവും പരിശോധനാ പരിശീലനവും

കടൽഘട്ടത്തിൽ സഹ്യാദ്രിയും കുലിശും വിവിധ സംയുക്ത നാവികാഭ്യാസങ്ങളിൽ പങ്കെടുത്തു. മാനുഷിക സഹായം എത്തിക്കൽ, ദുരന്തനിവാരണം എന്നിവയിലെ പരിശീലനങ്ങൾ നടന്നു. കപ്പലുകളെ സമീപിക്കുക, അവയിൽ കയറുക, പരിശോധന നടത്തുക, ആവശ്യമായപ്പോൾ പിടിച്ചെടുക്കുക എന്നീ നടപടികളും പരിശീലിച്ചു. സഞ്ചരിക്കുന്നതിനിടെ കപ്പലുകൾക്കിടയിൽ ആവശ്യമായ സാധനസാമഗ്രികൾ കൈമാറുന്നതിനുള്ള അഭ്യാസവും നടന്നു.

ഹെലികോപ്റ്ററുകൾ ഉപയോഗിച്ചും പരിശീലനം

ഹെലികോപ്റ്ററുകൾ ഒരു കപ്പലിൽനിന്ന് മറ്റൊരു കപ്പലിന്റെ ഡെക്കിൽ ഇറങ്ങുന്ന പരിശീലനവും അഭ്യാസത്തിന്റെ ഭാഗമായിരുന്നു. ഹെലികോപ്റ്റർ ഉപയോഗിച്ച് കപ്പലുകളിലേക്ക് സാധനസാമഗ്രികൾ എത്തിക്കുന്നതും പരിക്കേറ്റവരെ ഒഴിപ്പിക്കുന്നതും പരിശീലിച്ചു. പങ്കെടുത്ത നാവികസേനകളുടെ ഏകോപനവും ഒരുമിച്ച് പ്രവർത്തിക്കാനുള്ള ശേഷിയും ഈ പ്രവർത്തനങ്ങളിലൂടെ മെച്ചപ്പെട്ടു.

വിശ്വാസം ശക്തമാക്കി നാവിക സഹകരണം

തുറമുഖത്തും കടലിലും നടന്ന അഭ്യാസങ്ങൾ പരസ്പരവിശ്വാസവും ഒരുമിച്ച് പ്രവർത്തിക്കാനുള്ള ശേഷിയും ശക്തിപ്പെടുത്തി. ഫലപ്രദമായ സമുദ്ര പങ്കാളിത്തത്തിനും ഇത് സഹായിച്ചു. പങ്കാളി നാവികസേനകളുമായി സഹകരണം തുടരാനുള്ള ഇന്ത്യൻ നാവികസേനയുടെ പ്രതിബദ്ധത സഹ്യാദ്രിയുടെയും കുലിശിന്റെയും പങ്കാളിത്തം വീണ്ടും വ്യക്തമാക്കി. ഇന്ത്യയുടെ ആക്ട് ഈസ്റ്റ് നയത്തിനും വിവിധ മേഖലകളിലെ സുരക്ഷയ്ക്കും വളർച്ചയ്ക്കുമായുള്ള പരസ്പരവും സമഗ്രവുമായ മുന്നേറ്റം ലക്ഷ്യമിടുന്ന മഹാസാഗർ കാഴ്ചപ്പാടിനും അനുസൃതമായിരുന്നു ഈ പങ്കാളിത്തം.