ന്യൂഡൽഹി, 2026 ജൂലൈ 23 –

നീറ്റ് യുജി പരീക്ഷാ ക്രമക്കേടിനെതിരെ വിദ്യാർത്ഥി പ്രതിഷേധം തുടരുന്നതിനിടെ, വിദ്യാർത്ഥികളെ പഠനത്തിൽ ശ്രദ്ധ കേന്ദ്രീകരിക്കാൻ ഉപദേശിക്കണമെന്ന് അസോസിയേഷൻ ഓഫ് ഇന്ത്യൻ യൂണിവേഴ്സിറ്റീസ് ആവശ്യപ്പെട്ടു. രാജ്യത്തെ അംഗ സർവകലാശാലകളുടെ വൈസ് ചാൻസലർമാർക്കും ഉന്നത വിദ്യാഭ്യാസ സ്ഥാപനങ്ങളുടെ ഡയറക്ടർമാർക്കുമാണ് സംഘടന കത്തയച്ചത്.

എഐയു പ്രസിഡന്റ് വിനയ് കുമാർ പാഠക് അയച്ച കത്തിൽ, വിദ്യാർത്ഥികളുടെ ആശങ്കകൾ സഹാനുഭൂതിയോടെയും ബഹുമാനത്തോടെയും കേൾക്കണമെന്ന് വ്യക്തമാക്കി. എന്നാൽ നീണ്ടുനിൽക്കുന്ന പ്രതിഷേധങ്ങൾ പഠനം തടസ്സപ്പെടുത്തുകയും പരീക്ഷാ തയ്യാറെടുപ്പിനെ ബാധിക്കുകയും അനാവശ്യമായ സമ്മർദം സൃഷ്ടിക്കുകയും ചെയ്യുമെന്ന് സംഘടന ചൂണ്ടിക്കാട്ടി.

നീറ്റ് യുജി 2026 ചോദ്യപേപ്പർ ചോർച്ച ആരോപിച്ച് ഡൽഹിയിലെ ജന്തർ മന്തറിൽ വിദ്യാർത്ഥികൾ നടത്തുന്ന പ്രതിഷേധത്തിന്റെ പശ്ചാത്തലത്തിലാണ് നിർദേശം. പരീക്ഷാ സംവിധാനത്തിൽ പരിഷ്‌കാരവും പൊതുപരീക്ഷകളിൽ കൂടുതൽ ഉത്തരവാദിത്വവും കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവയ്ക്കണമെന്നും പ്രതിഷേധക്കാർ ആവശ്യപ്പെടുന്നുണ്ട്. പരീക്ഷാ സംവിധാനം കൂടുതൽ സുതാര്യവും സുരക്ഷിതവുമാക്കാൻ സർക്കാർ നടപടി സ്വീകരിക്കുന്നുണ്ടെന്നും എഐയു അറിയിച്ചു.

പ്രതിഷേധം പഠനത്തെ ബാധിക്കരുത്

ക്ലാസുകൾ ഉപേക്ഷിച്ച് സമരങ്ങളിൽ പങ്കെടുക്കുന്നത് വിദ്യാർത്ഥികളുടെ ഭാവിയെയാണ് കൂടുതൽ ബാധിക്കുന്നതെന്ന് എഐയു പറഞ്ഞു. പഠനത്തിൽ നിന്ന് ശ്രദ്ധ മാറാതിരിക്കാൻ അധ്യാപകരും സർവകലാശാല അധികൃതരും വിദ്യാർത്ഥികളെ ക്ഷമയോടെയും കരുതലോടെയും ഉപദേശിക്കണം.

ആശങ്കകൾ കേൾക്കണം

വിദ്യാർത്ഥികൾ ഉന്നയിക്കുന്ന പ്രശ്നങ്ങൾ പ്രധാനപ്പെട്ടവയാണെന്നും അവ അവഗണിക്കരുതെന്നും കത്തിൽ പറയുന്നു. അവരുടെ പരാതികൾ ബഹുമാനത്തോടെ കേൾക്കുന്നതിനൊപ്പം പഠനം തുടരാൻ ആവശ്യമായ പിന്തുണയും നൽകണം.

പരീക്ഷാ പരിഷ്‌കാരങ്ങളിൽ വിശ്വാസം വേണം

ദേശീയതല പരീക്ഷകൾ നീതിപൂർവവും സുതാര്യവും സുരക്ഷിതവുമായി നടത്താൻ സർക്കാർ നടപടികൾ സ്വീകരിക്കുന്നുണ്ടെന്നാണ് എഐയുവിന്റെ വിശദീകരണം. അഭ്യൂഹങ്ങളിലും ഊഹാപോഹങ്ങളിലും ആശങ്കപ്പെടാതെ ഈ നടപടികളിൽ വിശ്വാസം പുലർത്തണമെന്നും വിദ്യാർത്ഥികളോട് ആവശ്യപ്പെട്ടു.

ക്യാമ്പസുകൾ ശാന്തമാക്കണം

സർവകലാശാലകൾ വിദ്യാർത്ഥികളുമായി നേരിട്ട് സംസാരിക്കുകയും അവരെ നയിക്കുകയും വേണം. ക്യാമ്പസുകൾ ശാന്തമായി നിലനിർത്തി വിദ്യാർത്ഥികളുടെ മുഴുവൻ ശ്രദ്ധയും പഠനത്തിലേക്കും രാജ്യനിർമാണ പ്രവർത്തനങ്ങളിലേക്കും തിരിച്ചുവിടണമെന്നാണ് നിർദേശം.