ശുചീകരണ തൊഴിലാളികൾക്ക് ആദരം; മൂന്നാമത് നമസ്തേ ദിനാചരണം നാളെ കൊൽക്കത്തയിൽ

കൊൽക്കത്ത (പശ്ചിമ ബംഗാൾ), 2026 ജൂലൈ 13

ശുചീകരണ തൊഴിലാളികളുടെ സുരക്ഷയും അന്തസ്സും ഉറപ്പാക്കുകയെന്ന ലക്ഷ്യത്തോടെ മൂന്നാമത് നമസ്തേ ദിനം ജൂലൈ 14-ന് ആചരിക്കും. പശ്ചിമ ബംഗാളിലെ കൊൽക്കത്ത രവീന്ദ്ര സദനിലാണ് പ്രധാന പരിപാടി. ഇതോടൊപ്പം ദിവ്യ കലാ മേളയും നടക്കും. രാജ്യത്തെ നഗര തദ്ദേശ സ്ഥാപനങ്ങളിലും സമാന്തര പരിപാടികൾ സംഘടിപ്പിക്കും. 2023-ൽ നമസ്തേ പദ്ധതി ആരംഭിച്ചതിന്റെ മൂന്നാം വാർഷികത്തോടനുബന്ധിച്ചാണ് കേന്ദ്ര സാമൂഹികനീതി, ശാക്തീകരണ മന്ത്രാലയം പരിപാടി നടത്തുന്നത്.

കേന്ദ്രമന്ത്രിമാർ ഉൾപ്പെടെ പ്രമുഖർ പങ്കെടുക്കും

കേന്ദ്ര സാമൂഹികനീതി, ശാക്തീകരണ മന്ത്രി ഡോക്ടർ വീരേന്ദ്ര കുമാർ, കേന്ദ്ര സഹമന്ത്രി രാംദാസ് അത്താവലെ എന്നിവർ പരിപാടിയിൽ പങ്കെടുക്കുമെന്നാണ് പ്രതീക്ഷിക്കുന്നത്. പശ്ചിമ ബംഗാൾ മുഖ്യമന്ത്രി സുവേന്ദു അധികാരി, മന്ത്രിമാർ, പാർലമെന്റ് അംഗങ്ങൾ, നിയമസഭാംഗങ്ങൾ, കേന്ദ്ര-സംസ്ഥാന സർക്കാരുകളിലെ മുതിർന്ന ഉദ്യോഗസ്ഥർ, ജില്ലാ ഭരണകൂട പ്രതിനിധികൾ, ദേശീയ സഫായി കർമചാരി ധനകാര്യ വികസന കോർപ്പറേഷൻ പ്രതിനിധികൾ തുടങ്ങിയവരും ചടങ്ങിന്റെ ഭാഗമാകും.

സുരക്ഷാപരിശീലനം മുതൽ ആരോഗ്യപരിശോധന വരെ

നഗര തദ്ദേശ സ്ഥാപനങ്ങളുടെ നേതൃത്വത്തിൽ ശുചീകരണ തൊഴിലാളികൾക്കായി തൊഴിൽ സുരക്ഷാപരിശീലനം, ആരോഗ്യപരിശോധനാ ക്യാമ്പുകൾ, സർക്കാർ ആനുകൂല്യങ്ങൾ ലഭ്യമാക്കുന്നതിനുള്ള സഹായം എന്നിവ ഒരുക്കും. യന്ത്രവത്കൃത ശുചീകരണ ഉപകരണങ്ങളും സുരക്ഷാസാമഗ്രികളും പരിചയപ്പെടുത്തും. പൊതുജനാരോഗ്യവും പരിസ്ഥിതി ശുചിത്വവും സംരക്ഷിക്കുന്നതിൽ നിർണായക പങ്കുവഹിക്കുന്ന തൊഴിലാളികളെ ചടങ്ങുകളിൽ ആദരിക്കുകയും ചെയ്യും.

അപകടകരമായ ശുചീകരണരീതികൾ അവസാനിപ്പിക്കുക ലക്ഷ്യം

മലിനജല ഓടകളിലും സെപ്റ്റിക് ടാങ്കുകളിലും ജോലി ചെയ്യുന്നവർ, മാലിന്യം ശേഖരിക്കുന്നവർ, മുമ്പ് കൈകൊണ്ട് മാലിന്യം നീക്കിയിരുന്നവർ എന്നിവരെയാണ് നമസ്തേ ദിനത്തിൽ ആദരിക്കുന്നത്. അപകടകരമായ ശുചീകരണരീതികൾ അവസാനിപ്പിക്കുക, സംരക്ഷണ ഉപകരണങ്ങൾ ലഭ്യമാക്കുക, നൈപുണ്യപരിശീലനം നൽകുക, സ്ഥിരമായ ഉപജീവനമാർഗങ്ങൾ സൃഷ്ടിക്കുക എന്നിവയാണ് പരിപാടിയുടെ പ്രധാന ലക്ഷ്യങ്ങൾ. ശുചീകരണ തൊഴിലാളികളുടെ അവകാശങ്ങളെയും ക്ഷേമത്തെയും കുറിച്ച് പൊതുജനങ്ങളിൽ ബോധവത്കരണം വളർത്താനും അവരുടെ സേവനത്തോടുള്ള ആദരവ് വർധിപ്പിക്കാനും ദിനാചരണം ഉപയോഗിക്കും.

മരണങ്ങളില്ലാത്ത ശുചീകരണമേഖലയിലേക്ക്

ശുചീകരണ തൊഴിലാളികളുടെ അന്തസ്സ്, സുരക്ഷ, സാമൂഹികസുരക്ഷ എന്നിവ ഉറപ്പാക്കുന്നതിനാണ് സാമൂഹികനീതി, ശാക്തീകരണ വകുപ്പ് 2023-24ൽ ദേശീയ യന്ത്രവത്കൃത ശുചീകരണ പരിസ്ഥിതി പ്രവർത്തനപദ്ധതിയായ നമസ്തേ ആരംഭിച്ചത്. ശുചീകരണ ജോലിക്കിടയിലെ മരണങ്ങൾ പൂർണമായി ഒഴിവാക്കുക, തൊഴിലാളികൾ മനുഷ്യവിസർജ്യവുമായി നേരിട്ട് സമ്പർക്കത്തിൽ വരുന്നത് തടയുക, എല്ലാ ജോലികളും സുരക്ഷാ ഉപകരണങ്ങളിലൂടെ നടത്തുക എന്നിവയാണ് പദ്ധതിയുടെ ലക്ഷ്യങ്ങൾ. പരിശീലനം നേടിയ തൊഴിലാളികളെ മാത്രം നിയോഗിക്കുകയും അടിയന്തര ശുചീകരണ പ്രതികരണ വിഭാഗങ്ങളെ ശക്തിപ്പെടുത്തുകയും ചെയ്യും. സ്വയംസഹായ സംഘങ്ങളും സംരംഭകത്വവും വഴി തൊഴിലാളികളെ സാമൂഹികമായും സാമ്പത്തികമായും ശാക്തീകരിക്കാനും പദ്ധതി ലക്ഷ്യമിടുന്നു.