ന്യൂഡൽഹി, ജൂലൈ 10- 

കാൻസർ, ഉയർന്ന രക്തസമ്മർദം, പ്രമേഹം, ഹൃദ്രോഗം ഉൾപ്പെടെയുള്ള ഗുരുതര രോഗങ്ങൾക്കുള്ള 39 ഔഷധക്കൂട്ടുകളുടെ ചില്ലറവില കേന്ദ്രസർക്കാർ നിശ്ചയിച്ചു. ദേശീയ ഔഷധവില നിർണയ അതോറിറ്റിയാണ് (NPPA) പുതിയ വില പ്രഖ്യാപിച്ചത്. ചരക്കുസേവന നികുതി (GST) കൂടാതെയുള്ള വിലയാണ് ഇപ്പോൾ നിശ്ചയിച്ചിരിക്കുന്നത്. എച്ച്‌ഐവി, ബാക്ടീരിയ ബാധ, അപസ്മാരം, നേത്രരോഗം എന്നിവയ്ക്കുള്ള മരുന്നുകളും പട്ടികയിലുണ്ട്.

പരിധി ലംഘിച്ചാൽ കർശന നടപടി

2013-ലെ ഔഷധവില നിയന്ത്രണ ഉത്തരവിന്റെ അടിസ്ഥാനത്തിലാണ് ഈ നടപടി. വിജ്ഞാപനത്തിൽ ഉൾപ്പെട്ട നിർമാതാക്കൾക്കോ വിപണന കമ്പനികൾക്കോ ഇനി മുതൽ നിശ്ചയിച്ച പരമാവധി വിലയേക്കാൾ കൂടുതൽ ഈടാക്കാൻ അനുമതിയുണ്ടാകില്ല. പുതുക്കിയ വിലപ്പട്ടിക സംസ്ഥാന ഔഷധനിയന്ത്രകർക്കും വിതരണക്കാർക്കും കമ്പനികൾ ഉടൻ കൈമാറണം. കൂടാതെ, മരുന്നുകടകളിൽ ഉപഭോക്താക്കൾക്ക് വ്യക്തമായി കാണുന്ന രീതിയിൽ വിലപ്പട്ടിക പ്രദർശിപ്പിക്കുകയും വേണം.

ഹൃദ്രോഗം മുതൽ എച്ച്‌ഐവി വരെ

ഗുരുതര രോഗങ്ങൾക്കുള്ള വിവിധ സംയുക്ത മരുന്നുകളാണ് പട്ടികയിൽ ഉൾപ്പെട്ടിരിക്കുന്നത്. ഗുളികകൾ, ക്യാപ്‌സ്യൂളുകൾ, കുത്തിവയ്പുകൾ, നേത്രലായനികൾ (Eye drops) എന്നീ രൂപങ്ങളിലുള്ള മരുന്നുകൾ ഇതിലുണ്ട്. ഓരോ മരുന്നിന്റെയും അളവും ഘടനയും (dosage and composition) കൃത്യമായി പരിശോധിച്ചാണ് പ്രത്യേകം വില നിശ്ചയിച്ചിരിക്കുന്നത്.

ചികിത്സാച്ചെലവ് കുറയും; ലക്ഷക്കണക്കിന് കുടുംബങ്ങൾക്ക് ആശ്വാസം

ജീവൻരക്ഷാ മരുന്നുകളുടെ വില നിയന്ത്രണത്തിലാക്കാനും രോഗികൾക്ക് താങ്ങാനാകുന്ന നിരക്കിൽ ലഭ്യമാക്കാനുമാണ് ഈ ഇടപെടൽ. ഗുരുതര രോഗങ്ങൾക്ക് ദീർഘകാലം മരുന്ന് കഴിക്കേണ്ടിവരുന്ന സാധാരണ കുടുംബങ്ങൾക്ക് പുതിയ തീരുമാനം വലിയ ആശ്വാസമാകും. വരുംദിവസങ്ങളിൽ കൂടുതൽ മരുന്നുകളെ വിലനിയന്ത്രണ പട്ടികയിൽ ഉൾപ്പെടുത്താനുള്ള നടപടികൾ തുടരുമെന്നാണ് വിവരം.

അമിതവില ഈടാക്കിയാൽ പലിശ സഹിതം പിഴ

സർക്കാർ നിശ്ചയിച്ച നിരക്കിലും കൂടുതൽ തുക ഈടാക്കുന്ന കമ്പനികൾക്കെതിരെ കർശന നടപടിയുണ്ടാകും. അധികമായി വാങ്ങിയ തുക പലിശസഹിതം തിരിച്ചടയ്ക്കേണ്ടി വരും. കൂടാതെ ഔഷധവില നിയന്ത്രണ ഉത്തരവും അവശ്യവസ്തു നിയമവും അനുസരിച്ച് നിയമനടപടിയും നേരിടണം. വിലമാറ്റം വരുന്നതോടെ മരുന്നിന്റെ പാക്കറ്റിലും വിലപ്പട്ടികയിലും പുതിയ വില വ്യക്തമായി രേഖപ്പെടുത്തണം.