തിരുവനന്തപുരം, 2026 ജൂൺ 28 –

പ്രധാനമന്ത്രി ആവാസ് യോജനയിൽ നിന്ന് സംസ്ഥാനം പിന്മാറിയത് സംസ്ഥാന വിഹിതം നൽകാൻ പണമില്ലാത്തതിനാലാണെന്ന് മന്ത്രി കെ. എം. ഷാജി ആരോപിച്ചു. കപട ആദർശവേഷം കെട്ടുകയായിരുന്നു എൽ.ഡി.എഫ് എന്നും അദ്ദേഹം വിമർശിച്ചു. പാവപ്പെട്ടവർക്ക് ലഭിക്കേണ്ട വീടുകൾ അനാവശ്യ വിവാദങ്ങളിലൂടെ തടയരുതെന്നും അദ്ദേഹം പറഞ്ഞു.

കഴിഞ്ഞ പത്ത് വർഷത്തിനിടെ നിർമിച്ച അഞ്ച് ലക്ഷം വീടുകളിൽ ഒരു ലക്ഷത്തി അറുപതിനായിരം വീടുകൾ പ്രധാനമന്ത്രി ആവാസ് യോജനയുടെ ഭാഗമായിരുന്നുവെന്ന് മന്ത്രി പറഞ്ഞു. ഗുണഭോക്താവിന്റെ വിവരങ്ങളും പദ്ധതിയുടെ ലോഗോയും പ്രദർശിപ്പിക്കണമെന്നാണ് 2024ലെ കുടുംബശ്രീ സർക്കുലറിലുള്ളതെന്നും അദ്ദേഹം ചൂണ്ടിക്കാട്ടി. പ്രധാനമന്ത്രി നരേന്ദ്ര മോദിയുടെ ചിത്രമുള്ള എംബ്ലം വീടുകളിൽ ഇല്ലെന്നും അദ്ദേഹം ആവർത്തിച്ചു.

താൻ ഒപ്പുവെക്കാൻ പോകുന്ന കരാറിലും പ്രധാനമന്ത്രിയുടെ ചിത്രമില്ലെന്ന് മന്ത്രി വ്യക്തമാക്കി. കേന്ദ്രത്തിന്റെയും സംസ്ഥാനത്തിന്റെയും വിഹിതം ജനങ്ങളുടെ നികുതിപ്പണമാണെന്നും അർഹരായവർക്ക് ലഭിക്കേണ്ട ആനുകൂല്യം രാഷ്ട്രീയ വിവാദങ്ങളുടെ പേരിൽ നഷ്ടപ്പെടുത്തരുതെന്നും അദ്ദേഹം പറഞ്ഞു.