പാലി (രാജസ്ഥാൻ), 2026 ജൂൺ 27 –
ചരിത്രം കുറിച്ച് 13 വയസുകാരി
രാജസ്ഥാനിലെ പാലി ജില്ലയിലെ ഖേർവ ഗ്രാമത്തിലെ മുൻ രാജകുടുംബത്തിന്റെ അവകാശിയായി 13 വയസുകാരി തേജസ്വി കുമാരി ജോധയെ പ്രഖ്യാപിച്ചു. വ്യാഴാഴ്ച നടന്ന പരമ്പരാഗത ‘പാഗ് കാ ദസ്തൂർ’ ചടങ്ങിലൂടെയാണ് പ്രഖ്യാപനം നടന്നത്. പിതാവ് ഹരീഷ്ചന്ദ്ര ജോധയുടെ മരണത്തെ തുടർന്നാണ് തേജസ്വി കുമാരിയെ ഖേർവഗഢ് രാജവംശത്തിന്റെ അവകാശിയായി പ്രഖ്യാപിച്ചത്.
പതിവ് ആചാരം തിരുത്തി രാജകുടുംബം
നൂറ്റാണ്ടുകളായി പുരുഷന്മാരെ മാത്രമാണ് കുടുംബത്തിന്റെ അവകാശിയായി പ്രഖ്യാപിച്ചിരുന്നത്. എന്നാൽ ഇത്തവണ ആ പതിവ് മാറ്റിയാണ് പെൺകുട്ടിയെ അവകാശിയായി അംഗീകരിച്ചത്. മാർവാർ രാജകുടുംബം അയച്ച ആചാരപരമായ പാഗ് തലയിലണിയിച്ചാണ് അവകാശ പ്രഖ്യാപന ചടങ്ങ് പൂർത്തിയാക്കിയത്. ഇതോടെ രാജസ്ഥാനിലെ പഴയ രാജകുടുംബങ്ങളുടെ ചരിത്രത്തിൽ ശ്രദ്ധേയമായ മാറ്റമായാണ് ഈ തീരുമാനം വിലയിരുത്തപ്പെടുന്നത്.
മാറ്റത്തിന്റെ പ്രതീകമായി തീരുമാനം
പെൺമക്കൾക്കും കുടുംബ പാരമ്പര്യവും നേതൃത്വവും ഏറ്റെടുക്കാൻ കഴിയുമെന്ന ശക്തമായ സന്ദേശമാണ് ഈ തീരുമാനം നൽകുന്നതെന്നാണ് വിലയിരുത്തൽ. പരമ്പരാഗത ആചാരങ്ങളിൽ മാറ്റം കൊണ്ടുവന്ന ഈ പ്രഖ്യാപനം രാജസ്ഥാനിൽ വ്യാപക ചർച്ചയ്ക്കും വഴിവെച്ചിട്ടുണ്ട്
