ഡൽഹി സർവകലാശാലയിൽ അന്താരാഷ്ട്ര യോഗദിനാഘോഷങ്ങൾക്ക് നേതൃത്വം നൽകി ധർമേന്ദ്ര പ്രധാൻ

ന്യൂഡൽഹി, 2026 ജൂൺ 21

പന്ത്രണ്ടാമത് അന്താരാഷ്ട്ര യോഗദിനാഘോഷങ്ങൾക്ക് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ ഇന്ന് ന്യൂഡൽഹിയിലെ ഡൽഹി സർവകലാശാലയുടെ ദക്ഷിണ ക്യാമ്പസ് മൈതാനത്ത് നേതൃത്വം നൽകി. ചടങ്ങിൽ സംസാരിച്ച അദ്ദേഹം യോഗം ശരീരവും മനസ്സും ആത്മാവും തമ്മിലുള്ള ഐക്യം സൃഷ്ടിക്കുന്ന ശക്തമായ മാർഗമാണെന്നും ആരോഗ്യകരവും സന്തുലിതവുമായ ജീവിതശൈലി വളർത്തുന്നതിൽ പ്രധാന പങ്കുവഹിക്കുന്നുവെന്നും പറഞ്ഞു.

യോഗം ശാരീരിക ആരോഗ്യം, മാനസിക സമാധാനം, സമഗ്ര വികസനം എന്നിവയിലേക്ക് വ്യക്തികളെ നയിക്കുന്നുവെന്ന് ധർമേന്ദ്ര പ്രധാൻ പറഞ്ഞു. പ്രധാനമന്ത്രി നരേന്ദ്ര മോദിയുടെ ശ്രമഫലമായി യോഗം ഇന്ത്യയുടെ സമ്പന്നമായ സാംസ്കാരിക പൈതൃകത്തിന്റെയും ആരോഗ്യകരമായ ജീവിതരീതിയുടെയും ആഗോള പ്രതീകമായി മാറിയെന്നും അദ്ദേഹം കൂട്ടിച്ചേർത്തു. ചടങ്ങിൽ സ്കൂൾ വിദ്യാഭ്യാസ-സാക്ഷരത വകുപ്പ് സെക്രട്ടറി സഞ്ജയ് കുമാർ, ഉന്നത വിദ്യാഭ്യാസ വകുപ്പ് സെക്രട്ടറി വിനീത് ജോഷി, ഡൽഹി സർവകലാശാല വൈസ് ചാൻസലർ യോഗേഷ് സിങ് എന്നിവർ ഉൾപ്പെടെ നിരവധി പേർ പങ്കെടുത്തു. വിദ്യാർഥികളും അധ്യാപകരും യോഗാഭ്യാസത്തിൽ പങ്കാളികളായി. പ്രധാനമന്ത്രി നയിച്ച യോഗദിന പരിപാടിയുടെ തത്സമയ സംപ്രേഷണവും ചടങ്ങിനിടെ പ്രദർശിപ്പിച്ചു.

വിദ്യാഭ്യാസം, നവീകരണം, സംരംഭകത്വം എന്നീ മേഖലകളിൽ രാജ്യത്തിന്റെ വളരുന്ന സ്ഥാനം ചൂണ്ടിക്കാട്ടിയ മന്ത്രി, ഭാവിയെ നേരിടാൻ കഴിവുള്ള പ്രതിഭകളെ വളർത്തുന്നതിൽ വിദ്യാഭ്യാസ മേഖലയ്ക്കുള്ള പങ്ക് എടുത്തുപറഞ്ഞു. ആഗോള സർവകലാശാല റാങ്കിങ്ങിൽ മുന്നേറ്റം തുടരുന്ന ഡൽഹി സർവകലാശാലയെ അദ്ദേഹം അഭിനന്ദിക്കുകയും വിദ്യാർഥികളുടെയും അധ്യാപകരുടെയും ജീവനക്കാരുടെയും സംഭാവനകൾ പ്രശംസിക്കുകയും ചെയ്തു. സർവകലാശാലാ ജീവിതത്തിന്റെ ഭാഗമാക്കി യോഗത്തെ കൂടുതൽ പ്രോത്സാഹിപ്പിക്കേണ്ടതിന്റെ ആവശ്യകതയും അദ്ദേഹം ഊന്നിപ്പറഞ്ഞു.