ദേവസ്വം ബോർഡ് നിയമന വിവാദം; അതൃപ്തി അറിയിച്ച് മന്ത്രി കെ. മുരളീധരൻ തിരുവനന്തപുരം,

തിരുവിതാംകൂർ ദേവസ്വം ബോർഡിലെ വിവാദമായ സ്ഥലംമാറ്റ, നിയമന പട്ടിക തയ്യാറാക്കുന്നതുമായി ബന്ധപ്പെട്ട് ബോർഡിനുള്ളിൽ തന്നെ അഭിപ്രായ ഭിന്നത ഉണ്ടായിരുന്നുവെന്ന് റിപ്പോർട്ട്. മാനദണ്ഡങ്ങൾ ലംഘിച്ചാണ് പട്ടിക തയ്യാറാക്കിയതെന്ന ആക്ഷേപം ഉയർന്ന സാഹചര്യത്തിൽ, നേരത്തെ നടന്ന ബോർഡ് യോഗത്തിൽ ദേവസ്വം ബോർഡ് പ്രസിഡന്റും ഒരു അംഗവും പട്ടികയെ എതിർത്തിരുന്നുവെന്നാണ് വിവരം.

എന്നാൽ മറ്റൊരു അംഗം പട്ടിക ഉടൻ പുറത്തിറക്കണമെന്ന് ശക്തമായി ആവശ്യപ്പെട്ടതായും റിപ്പോർട്ടിൽ പറയുന്നു. പ്രസിഡന്റിന്റെ എതിർപ്പ് മറികടന്നാണ് പട്ടിക പുറത്തിറക്കിയതെന്നും ആരോപണമുണ്ട്. സ്ഥലംമാറ്റ നടപടികളിൽ വ്യാപക ഇടപെടൽ നടന്നതായി ദേവസ്വം എംപ്ലോയീസ് ഫ്രണ്ടും പരാതി ഉന്നയിച്ചിരുന്നു.

ശബരിമല സ്വർണക്കൊള്ളക്കേസിൽ ചോദ്യം ചെയ്യപ്പെട്ട ഉദ്യോഗസ്ഥരെയും മറ്റ് ആരോപണവിധേയരായ ജീവനക്കാരെയും പ്രധാന തസ്തികകളിൽ നിയമിച്ചതാണ് വിവാദത്തിന് വഴിവെച്ചത്. തുടർന്ന് ദേവസ്വം മന്ത്രി കെ. മുരളീധരൻ അതൃപ്തി അറിയിക്കുകയും നിയമനങ്ങൾ പുനഃപരിശോധിക്കണമെന്ന് ആവശ്യപ്പെടുകയും ചെയ്തു. പ്രത്യേക ബോർഡ് യോഗത്തിന് ശേഷം 75 പേരുടെ പട്ടികയിൽ വിവാദമായ 20 നിയമനങ്ങളിൽ ഭേദഗതി വരുത്താൻ തീരുമാനിക്കുകയും പുതിയ ഉത്തരവ് പുറത്തിറക്കുകയും ചെയ്തു. മേജർ ക്ഷേത്രങ്ങളിലെ നിയമനങ്ങൾക്ക് വിജിലൻസ് ക്ലിയറൻസ് നിർബന്ധമാക്കാനും ബോർഡ് തീരുമാനിച്ചു. നിയമന പട്ടികയിൽ ഉൾപ്പെട്ടവരുടെ പശ്ചാത്തലം പരിശോധിക്കാനും പരാതികൾ വിലയിരുത്താനും ദേവസ്വം ബോർഡ് നടപടി ആരംഭിച്ചിട്ടുണ്ട്. വിജിലൻസ് നടപടി നേരിടുന്നവരും വിവിധ ആരോപണങ്ങളിൽ ഉൾപ്പെട്ടവരുമായ ഉദ്യോഗസ്ഥരുടെ നിയമനമാണ് പ്രധാനമായും ചർച്ചയായിരിക്കുന്നത്. വിഷയത്തിൽ ബോർഡിന്റെ അന്തിമ തീരുമാനം നിർണായകമാകും.