കാട്ടാനശല്യം അതിരൂക്ഷം; കുടുംബങ്ങൾ ഭീതിയിൽ, അടിയന്തര നടപടി ആവശ്യപ്പെട്ട് നാട്ടുകാർ

വടക്കാഞ്ചേരി, 2026 ജൂൺ 17 –

വടക്കാഞ്ചേരി നഗരസഭയിലെ അകമല മാരാത്തുകുന്ന് മേഖലയിൽ കാട്ടാനശല്യം വീണ്ടും രൂക്ഷമായി. കാട്ടാനകളെ തുരത്താൻ വനംവകുപ്പ് ശ്രമങ്ങൾ തുടരുന്നതിനിടെയും ജനവാസ മേഖലകളിലേക്ക് ആനകൾ ഇറങ്ങുന്നത് പ്രദേശവാസികളിൽ കടുത്ത ആശങ്ക സൃഷ്ടിക്കുകയാണ്. കഴിഞ്ഞ ദിവസം വീണ്ടും ഒരു കൊമ്പൻ ജനവാസ മേഖലയിലെത്തിയതായി റിപ്പോർട്ട് ചെയ്യപ്പെട്ടു.

മാരാത്തുകുന്ന് ഉന്നതിയിലെ കടമ്പാട്ട് മീനാക്ഷി, സരോജിനി, കാർത്യായനി എന്നീ വൃദ്ധ സഹോദരിമാരുടെ വീട്ടുപറമ്പിലെ പനമരം കാട്ടാന കുത്തിമറിച്ചിട്ടു. മരം വീടിന് മുകളിലേക്ക് വീഴാതിരുന്നതിനാൽ വലിയ അപകടം ഒഴിവായി. ചേപ്പലക്കോട് സ്വദേശി ശ്രീജിത്തിന്റെ വീടിന് സമീപവും കാട്ടാന എത്തിയതോടെ ഭീതിയിലായ കുടുംബത്തെ സുരക്ഷിത സ്ഥലത്തേക്ക് മാറ്റിപ്പാർപ്പിച്ചു. വാഴാനി ഡെപ്യൂട്ടി ഫോറസ്റ്റ് ഓഫീസർ പി. വിനോദിന്റെ നേതൃത്വത്തിലുള്ള സംഘം സ്ഥലത്തെത്തി പ്രതിരോധ നടപടികൾ സ്വീകരിച്ചു.

പ്രദേശത്തെ വനസമാനമായി കിടക്കുന്ന സ്വകാര്യ ഭൂമികൾ വെട്ടിത്തെളിക്കണമെന്ന് വനംവകുപ്പ് നിർദേശിച്ചിട്ടുണ്ട്. കാട്ടാനകൾ ഒളിഞ്ഞുകിടക്കാനും ജനവാസ മേഖലകളിലേക്ക് കടക്കാനും ഇത്തരം സ്ഥലങ്ങൾ കാരണമാകുന്നുവെന്നാണ് വിലയിരുത്തൽ. കാട്ടാന ഭീഷണി ഒഴിവാക്കാൻ വനംവകുപ്പ് അടിയന്തര ഇടപെടൽ നടത്തണമെന്ന് വടക്കാഞ്ചേരി നഗരസഭ സ്ഥിരംസമിതി അധ്യക്ഷ ഷീല മോഹൻ ആവശ്യപ്പെട്ടു.