കോട്ടയം, 2026 ജൂൺ 15 –
മലയാള ക്രൈസ്തവ ഭക്തിഗാനരംഗത്ത് ശ്രദ്ധേയ സംഭാവനകള് നല്കിയ ഫാ. മൈക്കിള് പനച്ചിക്കല് വിസി (77) അന്തരിച്ചു. സംസ്കാരം പിന്നീട് നടക്കും. വിന്സെന്ഷ്യന് സഭ സെന്റ് ജോസഫ് പ്രോവിന്സ് അംഗമായിരുന്ന അദ്ദേഹം വചനപ്രഘോഷകന്, ഗാനരചയിതാവ്, സാഹിത്യകാരന്, മാധ്യമപ്രവര്ത്തകന് എന്നീ നിലകളിലും പ്രവര്ത്തിച്ചിരുന്നു.
“തിരുനാമകീര്ത്തനം പാടുവാനല്ലെങ്കിൽ”, “നിത്യത തീര്ക്കുന്ന നിമിഷങ്ങളില്”, “ശ്യാമാംബരത്തിലെ സൗന്ദര്യമായി നീ”, “പിതാവേ അനന്ത നന്മയാകും” തുടങ്ങിയവ ഉള്പ്പെടെ 700-ലധികം ഗാനങ്ങളുടെ രചയിതാവാണ് ഫാ. മൈക്കിള് പനച്ചിക്കല്. 1974 ഡിസംബര് 19ന് വൈദികനായ അദ്ദേഹം അഞ്ച് പതിറ്റാണ്ടിലേറെ നീണ്ട പൗരോഹിത്യ ജീവിതത്തിലൂടെ ഇന്ത്യയിലും വിദേശത്തുമായി ആത്മീയ നവോത്ഥാന രംഗത്ത് പ്രവര്ത്തിച്ചു. പോപ്പുലര് മിഷന് ഡയറക്ടര്, അടിച്ചിറ പരിത്രാണ ധ്യാനകേന്ദ്ര ഡയറക്ടര്, കട്ടപ്പന കൃപാലയ റിട്രീറ്റ് സെന്റര് ഡയറക്ടര്, അസിസ്റ്റന്റ് പ്രൊവിന്ഷ്യല് സുപ്പീരിയര് തുടങ്ങി വിവിധ ചുമതലകള് വഹിച്ചു.
വചനോത്സവം മാസികയുടെ സ്ഥാപക പത്രാധിപരായിരുന്ന അദ്ദേഹം പ്രഭാഷകനായും ധ്യാനഗുരുവായും എഴുത്തുകാരനായും ശ്രദ്ധ നേടി. സീറോ മലബാര് സഭയുടെ വിശുദ്ധ കുര്ബാന ടെക്സ്റ്റ് തയ്യാറാക്കിയ കമ്മിറ്റിയിലും അംഗമായിരുന്നു. കെസിബിസി അവാര്ഡ്, ശാലോം മീഡിയ അവാര്ഡ്, സിസിലിയന് അവാര്ഡ്, ഗുഡ്നസ് മീഡിയ അവാര്ഡ്, വിന്സെന്ഷ്യന് ജനറലൈറ്റിന്റെ ലൂമിനസ് അവാര്ഡ് തുടങ്ങി നിരവധി പുരസ്കാരങ്ങളും അദ്ദേഹത്തെ തേടിയെത്തി..
