അടൂർ, 2026 ജൂൺ 14 –
നിർമാണം നടന്നുകൊണ്ടിരിക്കുന്ന ഗാന്ധിസ്മൃതി മൈതാനത്തിന്റെ ഭിത്തിയുടെ ഒരു ഭാഗം സാമൂഹികവിരുദ്ധർ തകർത്തതായി പരാതി. വെള്ളിയാഴ്ച നിർമിച്ച ഭിത്തിയുടെ ഭാഗമാണ് തകർത്തത്. സംഭവം ഇന്നലെ രാവിലെയാണ് ശ്രദ്ധയിൽപ്പെട്ടത്. തുടർന്ന് സി.വി. ശാന്തകുമാർ എം.എൽ.എ, നഗരസഭ ചെയർപേഴ്സൺ റീനാ ഷാമുവൽ എന്നിവരുൾപ്പെടെയുള്ളവർ സ്ഥലം സന്ദർശിച്ചു.
ഭിത്തി തകർത്തവരെ കണ്ടെത്തി നടപടി സ്വീകരിക്കണമെന്നാവശ്യപ്പെട്ട് നഗരസഭ ചെയർപേഴ്സൺ അടൂർ പോലീസിൽ പരാതി നൽകി. നിർമാണ സ്ഥലത്ത് സൂക്ഷിച്ചിരുന്ന ഇരുമ്പുസാധനങ്ങളും മറ്റ് സാമഗ്രികളും പതിവായി മോഷണം പോകുന്ന സാഹചര്യമുണ്ടെന്നും രാത്രികാലങ്ങളിൽ പോലീസ് നിരീക്ഷണം ശക്തമാക്കണമെന്നും പരാതിയിൽ ആവശ്യപ്പെട്ടു.
സംഭവത്തിൽ സമഗ്ര അന്വേഷണം നടത്തണമെന്ന് മുൻ ഡെപ്യൂട്ടി സ്പീക്കറും സി.പി.ഐ ജില്ലാ സെക്രട്ടറിയുമായ ചിറ്റയം ഗോപകുമാർ ആവശ്യപ്പെട്ടു. മുൻപും സമാന സംഭവങ്ങൾ ഉണ്ടായിട്ടും ശക്തമായ നടപടി സ്വീകരിക്കാത്തതാണ് ഇത്തരം സംഭവങ്ങൾ ആവർത്തിക്കാൻ കാരണമാകുന്നതെന്നും അദ്ദേഹം ആരോപിച്ചു. ചിറ്റയം ഗോപകുമാറും മുൻ നഗരസഭ ചെയർമാൻ ഡി. സജിയും സ്ഥലം സന്ദർശിച്ചു.
