പാലക്കാട്, 2026 ജൂൺ 13 –
പാലക്കാട് ജില്ലാ ആശുപത്രിയിലെ ചികിത്സാ പിഴവിനെ തുടർന്ന് കൈ മുറിച്ചുമാറ്റേണ്ടി വന്ന വിനോദിനിക്കുള്ള ധനസഹായം കുടിശിക ഉൾപ്പെടെ തിങ്കളാഴ്ച വിതരണം ചെയ്യാൻ മുഖ്യമന്ത്രി നിർദേശം നൽകി. സർക്കാർ പ്രഖ്യാപിച്ച ധനസഹായം നാല് മാസമായി മുടങ്ങിയതിനെ തുടർന്ന് കുടുംബം കടുത്ത പ്രതിസന്ധിയിലായിരുന്ന സാഹചര്യത്തിലാണ് മുഖ്യമന്ത്രിയുടെ അടിയന്തര ഇടപെടൽ.
വനിതാ ശിശുക്ഷേമ വകുപ്പിന്റെ സ്പോൺസർഷിപ്പ് പദ്ധതിയിൽ ഉൾപ്പെടുത്തിയാണ് വിനോദിനിക്ക് പ്രതിമാസം 4000 രൂപ നൽകാൻ കഴിഞ്ഞ എൽ.ഡി.എഫ് സർക്കാർ തീരുമാനിച്ചിരുന്നത്. ആദ്യ രണ്ട് മാസങ്ങളിൽ തുക ലഭിച്ചെങ്കിലും പിന്നീട് വിതരണം നിലച്ചിരുന്നു. വിനോദിനിയുടെ ചികിത്സയ്ക്കും വിദ്യാഭ്യാസ ആവശ്യങ്ങൾക്കുമാണ് കുടുംബം ഈ തുക ഉപയോഗിച്ചിരുന്നത്. ധനസഹായം മുടങ്ങിയതോടെ കുടുംബം സാമ്പത്തിക ബുദ്ധിമുട്ടുകൾ നേരിടുകയായിരുന്നു.
ധനസഹായം മുടങ്ങിയ വിഷയത്തിൽ അന്വേഷണം നടത്താൻ വനിതാ ശിശുക്ഷേമ വകുപ്പ് മന്ത്രി ബിന്ദു കൃഷ്ണയോടും മുഖ്യമന്ത്രി നിർദേശം നൽകി. നിലവിൽ ലഭ്യമായ മറ്റ് ഫണ്ടുകൾ ഉപയോഗിച്ച് കുടിശിക തുക ഉടൻ വിതരണം ചെയ്യുമെന്ന് വകുപ്പ് ഡയറക്ടർ മുഖ്യമന്ത്രിയെ അറിയിച്ചു. ഇതോടെ നാല് മാസമായി ലഭിക്കാതിരുന്ന ധനസഹായം കുടുംബത്തിന് ഉടൻ ലഭ്യമാകുമെന്നാണ് പ്രതീക്ഷ.
