കെ.എസ്.ആർ.ടി.സി ബസിൽ നിന്ന് വീണ് യാത്രക്കാരിക്ക് പരിക്ക്; പരാതിയിലും കേസ് എടുക്കാതെ മംഗലപുരം പോലീസ്

കഴക്കൂട്ടം, 2026 ജൂൺ 12 –

പള്ളിപ്പുറത്ത് സി.ആർ.പി.എഫ് ജംഗ്ഷനിൽ ബസിൽ നിന്ന് ഇറങ്ങുന്നതിനിടെ മുന്നോട്ട് എടുത്ത കെ.എസ്.ആർ.ടി.സി ബസിൽ നിന്ന് വീണ് യാത്രക്കാരിക്ക് ഗുരുതര പരിക്കേറ്റ സംഭവത്തിൽ മംഗലപുരം പോലീസ് കേസ് എടുത്തില്ലെന്ന് പരാതി. കീഴാവൂർ വെള്ളൂർ മാമ്പഴവീട്ടിൽ എസ്. മുബീനയ്ക്കാണ് ചൊവ്വാഴ്ച രാവിലെ 11.30ഓടെ അപകടത്തിൽ പരിക്കേറ്റത്. ബസിന്റെ അവസാന പടിയിൽ നിന്ന് റോഡിലേക്ക് വീണ മുബീനയെ ബസ് കുറച്ചുദൂരം വലിച്ചിഴച്ചതായും പറയുന്നു.

കഴക്കൂട്ടത്ത് നിന്ന് മകൾ അജിമിക്കൊപ്പം ആറ്റിങ്ങൽ ഭാഗത്തേക്ക് പോകുകയായിരുന്ന മുബീന സി.ആർ.പി.എഫ് ജംഗ്ഷനിൽ ഇറങ്ങാനായി വാതിലിന് സമീപം എത്തിയിരുന്നു. ബസ് നിർത്തിയ ശേഷം ഡോർ തുറന്ന് ഇറങ്ങുന്നതിനിടെ മുബീന അവസാന പടിയിൽ നിൽക്കുമ്പോഴാണ് കണ്ടക്ടർ ബെൽ അടിച്ചതെന്നാണ് ആരോപണം. ഇതോടെ ബസ് മുന്നോട്ട് നീങ്ങുകയും മുബീന റോഡിലേക്കും പടിക്കെട്ടിലുമായി വീഴുകയും ചെയ്തു. പടിക്കെട്ടിലെ കമ്പിയിൽ പിടിച്ചുകിടന്ന മുബീനയെ വലിച്ചിഴച്ച് ബസ് മുന്നോട്ട് പോയതായും മകളുടെ നിലവിളി കേട്ട ശേഷമാണ് വാഹനം നിർത്തിയതെന്നും പറയുന്നു.

അപകടത്തിൽ കൈകാലുകൾക്ക് ഗുരുതര പരിക്കേറ്റ മുബീന ആദ്യം അണ്ടൂർക്കോണം ആരോഗ്യകേന്ദ്രത്തിൽ ചികിത്സ തേടി. തുടർന്ന് മംഗലപുരം പോലീസിൽ പരാതി നൽകി. എന്നാൽ സംഭവത്തിൽ ഇതുവരെ കേസ് രജിസ്റ്റർ ചെയ്തിട്ടില്ലെന്നാണ് പരാതി.