ന്യൂഡൽഹി, 2026 ജൂൺ 11

സംഗീതം, നൃത്തം, നാടകം എന്നിവയുടെ ദേശീയ അക്കാദമിയായ സംഗീത നാടക അക്കാദമി 2024, 2025 വർഷങ്ങളിലേക്കുള്ള അക്കാദമി രത്ന, അക്കാദമി പുരസ്കാരം, ഉസ്താദ് ബിസ്മില്ലാ ഖാൻ യുവ പുരസ്കാരം എന്നിവയ്ക്കുള്ള ജേതാക്കളെ പ്രഖ്യാപിച്ചു. മാർച്ച് 22 മുതൽ 26 വരെ ന്യൂഡൽഹിയിൽ നടന്ന ജനറൽ കൗൺസിൽ യോഗത്തിലാണ് തീരുമാനം എടുത്തത്. കലാരംഗത്തെ ഏഴ് പ്രമുഖരെ അക്കാദമി രത്നയ്ക്കായി തെരഞ്ഞെടുത്തു. കൂടാതെ 108 കലാകാരന്മാരെ അക്കാദമി പുരസ്കാരത്തിനും 106 യുവ കലാകാരന്മാരെ യുവ പുരസ്കാരത്തിനുമായി തിരഞ്ഞെടുത്തു.

സംഗീതം, നൃത്തം, നാടകം, നാടൻ കലകൾ, ഗോത്ര കലകൾ, പാവക്കൂത്ത്, അനുബന്ധ നാടകകലകൾ തുടങ്ങി വിവിധ മേഖലകളിൽ പ്രവർത്തിക്കുന്നവരെയാണ് തെരഞ്ഞെടുത്തത്. രാജ്യത്തെ വിവിധ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമുള്ള കലാകാരന്മാരാണ് പട്ടികയിലുള്ളത്. യുവ പുരസ്കാരങ്ങൾ പ്രത്യേക ചടങ്ങിൽ അക്കാദമി അധ്യക്ഷൻ സമ്മാനിക്കും. അക്കാദമി രത്നം, അക്കാദമി പുരസ്കാരം എന്നിവ രാഷ്ട്രപതിയുടെ നേതൃത്വത്തിൽ നടക്കുന്ന പ്രത്യേക ചടങ്ങിൽ വിതരണം ചെയ്യും.

അക്കാദമി പുരസ്കാരങ്ങൾ 1952 മുതൽ നൽകിവരുന്നു. വ്യക്തികളുടെ ദീർഘകാല കലാസംഭാവനയും മികവും അംഗീകരിക്കുന്നതാണ് ഈ ബഹുമതികൾ. അക്കാദമി രത്നത്തിന് മൂന്ന് ലക്ഷം രൂപയും അക്കാദമി പുരസ്കാരത്തിന് ഒരു ലക്ഷം രൂപയും സമ്മാനമായി ലഭിക്കും. യുവ പുരസ്കാരത്തിന് ഇരുപത്തയ്യായിരം രൂപയാണ് സമ്മാനത്തുക. താമ്രപത്രവും അങ്കവസ്ത്രവും ഇതോടൊപ്പം നൽകും. അക്കാദമി രത്നം വളരെ അപൂർവമായ ബഹുമതിയാണ്. ഒരു സമയത്ത് പരമാവധി നാൽപ്പത് പേർക്ക് മാത്രമേ ഈ അംഗീകാരം ലഭിക്കൂ.