ന്യൂഡൽഹി, 2026 ജൂൺ 8 –
നീറ്റ് പുനഃപരീക്ഷയുടെ ചോദ്യപേപ്പർ തയ്യാറാക്കുന്ന സംഘത്തിന് ദേശീയ പരീക്ഷാ ഏജൻസി കർശന നിയന്ത്രണങ്ങൾ ഏർപ്പെടുത്തി. ചോദ്യപേപ്പർ തയ്യാറാക്കുന്ന അധ്യാപകരെ പ്രത്യേക കേന്ദ്രത്തിൽ പാർപ്പിച്ചിരിക്കുകയാണ്. പരീക്ഷ പൂർത്തിയാകുന്നതുവരെ ഇവർ അവിടെ തന്നെ തുടരണം.
അധ്യാപകർക്ക് ഫോൺ, ഇന്റർനെറ്റ് എന്നിവ ഉപയോഗിക്കാൻ അനുമതിയില്ല. ലാപ്ടോപ്, സ്മാർട്ട് വാച്ച് തുടങ്ങിയ ഉപകരണങ്ങൾ ഉപയോഗിക്കുന്നതിനും നിയന്ത്രണമുണ്ട്. സംഘത്തോടൊപ്പം പ്രവർത്തിക്കുന്ന സഹായികൾക്കും പുറത്തുപോകാൻ അനുമതിയില്ല. മറ്റ് ജീവനക്കാർ പുറത്തേക്ക് പോകുന്നതും തിരിച്ചുവരുന്നതും കൃത്യമായി നിരീക്ഷിക്കുമെന്നും അധികൃതർ വ്യക്തമാക്കിയിട്ടുണ്ട്.
മുൻ വർഷങ്ങളിലെ വിവാദങ്ങളുടെ പശ്ചാത്തലത്തിലാണ് ദേശീയ പരീക്ഷാ ഏജൻസി ഇത്രയും ശക്തമായ സുരക്ഷാ ക്രമീകരണങ്ങൾ ഏർപ്പെടുത്തിയിരിക്കുന്നത്. പുനഃപരീക്ഷ പെൻ-പേപ്പർ രീതിയിൽ നടത്തുന്നതിലാണ് ഇപ്പോൾ ശ്രദ്ധ കേന്ദ്രീകരിച്ചിരിക്കുന്നതെന്ന് ഏജൻസി ഉദ്യോഗസ്ഥർ പാർലമെന്ററി സമിതിയെ അറിയിച്ചു. അടുത്ത വർഷം മുതൽ പരീക്ഷ കമ്പ്യൂട്ടർ അധിഷ്ഠിത രീതിയിലേക്ക് മാറ്റാൻ തീരുമാനിച്ചിട്ടുണ്ടെന്നും ദേശീയ പരീക്ഷാ ഏജൻസി ഡയറക്ടർ ജനറൽ അഭിഷേക് സിങ് പറഞ്ഞു. രണ്ട് പരീക്ഷാ രീതികളുടെയും ഗുണങ്ങളും പരിമിതികളും യോഗത്തിൽ വിശദമായി ചർച്ച ചെയ്തു.
