എറണാകുളത്ത് പനി ബാധിച്ച് വീണ്ടും മരണം; വെസ്റ്റ് നൈൽ പനിയെന്ന് സംശയം

എറണാകുളം, 2026 ജൂൺ 8 –

എറണാകുളം ജില്ലയിൽ പനി ബാധിച്ച് വീണ്ടും ഒരാൾ മരിച്ചു. ആലുവ സ്വദേശി മുരളീധരൻ (77) ആണ് മരിച്ചത്. കളമശ്ശേരി സർക്കാർ മെഡിക്കൽ കോളേജിൽ ചികിത്സയിലിരിക്കെയായിരുന്നു മരണം. മരണം വെസ്റ്റ് നൈൽ പനി മൂലമാണോ എന്ന സംശയത്തെ തുടർന്ന് സാമ്പിളുകൾ പരിശോധനയ്ക്ക് അയച്ചതായി ആരോഗ്യവകുപ്പ് അറിയിച്ചു.

ഇക്കഴിഞ്ഞ 27-നാണ് കടുത്ത പനിയെ തുടർന്ന് മുരളീധരനെ ആശുപത്രിയിൽ പ്രവേശിപ്പിച്ചത്. അദ്ദേഹത്തിന് അർബുദ രോഗമുണ്ടായിരുന്നുവെന്നാണ് ആശുപത്രിയിൽ നിന്ന് ലഭിക്കുന്ന വിവരം. വെസ്റ്റ് നൈൽ രോഗത്തിന്റെ ലക്ഷണങ്ങൾ ഉണ്ടായിരുന്നതിനാലാണ് സാമ്പിളുകൾ പരിശോധനയ്ക്ക് അയച്ചതെന്ന് ആശുപത്രി വൃത്തങ്ങൾ അറിയിച്ചു

രോഗം വെസ്റ്റ് നൈൽ പനിയാണോ എന്ന കാര്യത്തിൽ ഇതുവരെ സ്ഥിരീകരണം വന്നിട്ടില്ല. പരിശോധനാ ഫലം ലഭിച്ച ശേഷമേ മരണകാരണം സംബന്ധിച്ച് വ്യക്തത വരൂ. അതിനായുള്ള നടപടികളാണ് ഇപ്പോൾ ആരോഗ്യവകുപ്പ് തുടരുന്നത്.