മെമ്മറി കാർഡ് ദൃശ്യങ്ങൾ ചോർന്നെന്ന ഹർജി: പരിഗണനയിൽ നിന്ന് ജഡ്ജി പിന്മാറി

കൊച്ചി, 2026 ജൂൺ 8

നടിയെ ആക്രമിച്ച കേസിന്റെ അന്വേഷണത്തിനിടെ മെമ്മറി കാർഡിലെ ദൃശ്യങ്ങൾ ചോർന്നുവെന്ന ആരോപണത്തിൽ പുനരന്വേഷണം ആവശ്യപ്പെട്ട് അതിജീവിത സമർപ്പിച്ച ഹർജി പരിഗണിക്കുന്നതിൽ നിന്ന് ഹൈക്കോടതി ജഡ്ജി പിന്മാറി. ജസ്റ്റിസ് ജോബിൻ സെബാസ്റ്റ്യനാണ് ഹർജി പരിഗണിക്കുന്നതിൽ നിന്ന് പിന്മാറിയത്. ഇതോടെ ഹർജി മറ്റൊരു ബെഞ്ച് പരിഗണിക്കും. മെമ്മറി കാർഡിലെ ദൃശ്യങ്ങൾ ചോർന്ന സംഭവത്തിൽ കോടതി മേൽനോട്ടത്തിൽ പുതിയ അന്വേഷണം വേണമെന്നാണ് അതിജീവിത ആവശ്യപ്പെട്ടിരിക്കുന്നത്

കഴിഞ്ഞ ദിവസമാണ് അതിജീവിത ഹൈക്കോടതിയിൽ ഹർജി നൽകിയത്. ദൃശ്യങ്ങൾ ചോർന്നതുമായി ബന്ധപ്പെട്ട കേസ് അട്ടിമറിക്കാൻ ബോധപൂർവമായ ശ്രമങ്ങൾ നടന്നിട്ടുണ്ടെന്നും ഹർജിയിൽ ആരോപിക്കുന്നു. സുപ്രീംകോടതിയിലെ അഭിഭാഷക വൃന്ദ ഗ്രോവർ വഴിയാണ് ഹർജി സമർപ്പിച്ചത്. വിചാരണക്കോടതിയിൽ മെമ്മറി കാർഡ് കൈകാര്യം ചെയ്തതിൽ ദുരൂഹതയുണ്ടെന്നും അതിജീവിത ആരോപിക്കുന്നു.

 പീഡന ദൃശ്യങ്ങൾ ഉൾപ്പെട്ട മെമ്മറി കാർഡിൽ മൂന്ന് തവണ നിയമവിരുദ്ധ പരിശോധന നടന്നതായി ആരോപണത്തിൽ പറയുന്നു . 2018 ജനുവരി 9-ന് അങ്കമാലി മജിസ്ട്രേറ്റ് മെമ്മറി കാർഡ് പരിശോധിച്ചെന്നും, 2018 ഡിസംബർ 13-ന് ജില്ലാ പ്രിൻസിപ്പൽ സെഷൻസ് കോടതി ബെഞ്ച് ക്ലാർക്ക് മെമ്മറി കാർഡ് പരിശോധിച്ചെന്നും  പറയുന്നു. ശിരസ്തദാറിന്റെ മൊബൈൽ ഫോണിലാണ് ദൃശ്യങ്ങൾ കണ്ടതെന്നും  പരാമർശമുണ്ട്. മെമ്മറി കാർഡ് അതീവ സുരക്ഷിതമായി സൂക്ഷിക്കണമെന്ന സുപ്രീംകോടതി നിർദ്ദേശങ്ങളും പാലിക്കപ്പെട്ടില്ലെന്ന ആക്ഷേപം നേരത്തെ ഉയർന്നിരുന്നു. ഇപ്പോൾ അതിജീവിതയുടെ പുനരന്വേഷണ ആവശ്യം മറ്റൊരു ബെഞ്ചിന്റെ പരിഗണനയിലേക്ക് കടക്കുകയാണ്.