പഴയങ്ങാടി, 2026 ജൂൺ 7 –
മാടായി പഞ്ചായത്ത് പ്രസിഡന്റ് ബി. സത്യഭാമയെ ചേംബറിൽ കയറി ആക്രമിച്ച് പരിക്കേൽപ്പിച്ചെന്ന കേസിൽ മൂന്ന് ഡിവൈഎഫ്ഐ പ്രവർത്തകരെ പോലീസ് അറസ്റ്റ് ചെയ്തു. ഡിവൈഎഫ്ഐ മാടായി നോർത്ത് മേഖല സെക്രട്ടറി കെ.വി. അഖിൽ, പ്രസിഡന്റ് പി.പി. അരുണ്, ജോയിന്റ് സെക്രട്ടറി എം.വി. യദുകൃഷ്ണൻ എന്നിവരെയാണ് പഴയങ്ങാടി എസ്.ഐ കെ. ഷുഹൈബ് അറസ്റ്റ് ചെയ്തത്. പിന്നീട് ഇവരെ കോടതിയിൽ ഹാജരാക്കുകയും റിമാൻഡ് ചെയ്യുകയും ചെയ്തു.
കഴിഞ്ഞ 20-ാം തീയതിയാണ് കേസിനാസ്പദമായ സംഭവം നടന്നത്. മാലിന്യ സംഭരണ കേന്ദ്രത്തിൽ നിന്ന് പ്ലാസ്റ്റിക് മാലിന്യം നീക്കം ചെയ്യാത്തതിൽ പ്രതിഷേധിച്ച് ഡിവൈഎഫ്ഐ നടത്തിയ സമരത്തിനിടെയായിരുന്നു സംഭവം. പ്രതിഷേധക്കാർ പഞ്ചായത്ത് പ്രസിഡന്റിന്റെ ചേംബറിൽ അതിക്രമിച്ച് കയറുകയും കൈയ്ക്ക് പരിക്കേൽപ്പിക്കുകയും ഔദ്യോഗിക കൃത്യനിർവഹണം തടസപ്പെടുത്തുകയും ചെയ്തെന്നാണ് കേസ്. സംഭവത്തിൽ പരിക്കേറ്റ ബി. സത്യഭാമ ആശുപത്രിയിൽ ചികിത്സ തേടിയിരുന്നു.
സത്യഭാമ നൽകിയ പരാതിയുടെ അടിസ്ഥാനത്തിൽ 25 പേർക്കെതിരെയാണ് പോലീസ് കേസ് രജിസ്റ്റർ ചെയ്തത്. കേസുമായി ബന്ധപ്പെട്ട അന്വേഷണം തുടരുകയാണെന്നും മറ്റ് പ്രതികളുടെ പങ്കും പരിശോധിച്ചുവരികയാണെന്നും സൂചനയുണ്ട്.
