ഇടിമിന്നലിൽ റോഡ് തകർന്നു; യാത്രക്കാർ ദുരിതത്തിൽ

തിരുമേനി, 2026 ജൂൺ 7 –

ശക്തമായ ഇടിമിന്നലിനെ തുടർന്ന് തിരുമേനി കോറാളി റോഡിന്റെ ഭാഗം തകർന്നു. ചെറുപുഴ പഞ്ചായത്തിലെ 13-ാം വാർഡിൽ സെന്റ് അൽഫോൻസ കുരിശുപള്ളിക്ക് സമീപമാണ് സംഭവം. കഴിഞ്ഞ ദിവസം ഉണ്ടായ ശക്തമായ ഇടിമിന്നലിലാണ് റോഡിന്റെ ടാറിംഗ് ഇളകിത്തെറിച്ച് വലിയ കുഴികൾ രൂപപ്പെട്ടത്.

റോഡ് തകർന്നതോടെ വാഹനഗതാഗതവും കാൽനടയാത്രയും ദുരിതത്തിലായി. സ്കൂൾ കുട്ടികൾ ഉൾപ്പെടെ നിരവധി പേർ ദിവസേന ഉപയോഗിക്കുന്ന പ്രധാന റോഡാണിത്. കാവേരിക്കുളം ക്ഷേത്രത്തിലേക്കുള്ള പ്രധാന വഴികളിലൊന്നായ ഈ റോഡിൽ കുത്തനെയുള്ള കയറ്റവും കുറഞ്ഞ വീതിയും നിലവിലുണ്ട്. കൂടാതെ മതിയായ ഓവുചാലുകൾ ഇല്ലാത്തതും റോഡിന്റെ തകർച്ചയ്ക്ക് കാരണമായതായി പ്രദേശവാസികൾ ചൂണ്ടിക്കാട്ടുന്നു.

സംഭവത്തെ തുടർന്ന് പഞ്ചായത്ത് അംഗം പ്രിൻസ് വെള്ളക്കട സ്ഥലം സന്ദർശിച്ചു. റോഡ് കോൺക്രീറ്റ് ചെയ്യുന്നതിനും ഓവുചാലുകൾ നിർമിക്കുന്നതിനുമായി ബ്ലോക്ക് പഞ്ചായത്തിന്റെ റോഡ് ഫണ്ടിൽ നിന്ന് അഞ്ച് ലക്ഷം രൂപയും ചെറുപുഴ പഞ്ചായത്തിന്റെ മെയിന്റനൻസ് ഫണ്ടിൽ നിന്ന് അഞ്ച് ലക്ഷം രൂപയും ഉൾപ്പെടെ 10 ലക്ഷം രൂപ അനുവദിച്ചിട്ടുണ്ടെന്ന് അദ്ദേഹം അറിയിച്ചു. കാലാവസ്ഥ അനുകൂലമായാൽ നിർമ്മാണ പ്രവർത്തനങ്ങൾ ആരംഭിക്കുമെന്നും അദ്ദേഹം വ്യക്തമാക്കി.