തിരുവനന്തപുരം, 2026 ജൂൺ 5 –
അന്തരിച്ച സി.പി.എം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ ഭാര്യ വിനോദിനി പാർട്ടി നേതൃത്വത്തിനെതിരെ രൂക്ഷ വിമർശനവുമായി രംഗത്തെത്തി. കോടിയേരി ബാലകൃഷ്ണന്റെ മരണശേഷം കുടുംബത്തെ പാർട്ടിയുടെ ഉന്നത നേതൃത്വം അവഗണിച്ചെന്നാണ് വിനോദിനിയുടെ ആരോപണം. ഒരു മാസികയ്ക്ക് നൽകിയ അഭിമുഖത്തിലാണ് പ്രതികരണം.
കേരളത്തിൽ ഉന്നത സ്ഥാനത്തിരിക്കുന്ന ഒരു പോളിറ്റ് ബ്യൂറോ അംഗത്തിൽ നിന്ന് ക്രൂരമായ അവഗണനയാണ് നേരിട്ടതെന്ന് വിനോദിനി പറഞ്ഞു. ആവശ്യത്തിന് വിളിച്ചാൽ പോലും ഫോൺ എടുക്കാറില്ലെന്നും നാല് വർഷത്തിനിടെ ഒരിക്കൽ പോലും കുടുംബത്തിന്റെ ക്ഷേമം അന്വേഷിച്ചില്ലെന്നും അവർ ആരോപിച്ചു. എന്നാൽ ആ നേതാവ് പിണറായി വിജയനല്ലെന്നും, പിണറായി വിജയനെ വിളിച്ചാൽ അദ്ദേഹം ഫോൺ എടുക്കുകയോ തിരിച്ചുവിളിക്കുകയോ ചെയ്യാറുണ്ടെന്നും വിനോദിനി വ്യക്തമാക്കി. സി.പി.എം സംസ്ഥാന സെക്രട്ടറി എം.വി. ഗോവിന്ദനെ ലക്ഷ്യമിട്ടുള്ള വിമർശനമാണിതെന്നാണ് രാഷ്ട്രീയ കേന്ദ്രങ്ങളിലെ വിലയിരുത്തൽ.
2022 ഒക്ടോബറിലാണ് കോടിയേരി ബാലകൃഷ്ണൻ അന്തരിച്ചത്. അദ്ദേഹത്തിന്റെ മരണശേഷം കുടുംബത്തോടുള്ള പാർട്ടി നേതൃത്വത്തിന്റെ സമീപനത്തെക്കുറിച്ചുള്ള അതൃപ്തി വിനോദിനി മുമ്പും പരോക്ഷമായി പ്രകടിപ്പിച്ചിരുന്നു. പുതിയ വെളിപ്പെടുത്തൽ സി.പി.എമ്മിനകത്തും രാഷ്ട്രീയ രംഗത്തും ചർച്ചയ്ക്ക് വഴിവെച്ചിരിക്കുകയാണ്. അതേസമയം, കുടുംബത്തെ അവഗണിച്ചെന്ന പരാതി അറിയില്ലെന്ന് ടി.പി. രാമകൃഷ്ണൻ പ്രതികരിച്ചതായും റിപ്പോർട്ടുകളുണ്ട്.
