കുട്ടി ഉറങ്ങിപ്പോയതിന്റെ പേരിൽ ദമ്പതികൾക്ക് മർദനം; ബസ് ജീവനക്കാരന് പൊലീസ് നോട്ടീസ്

കടുത്തുരുത്തി | മേയ് 24

കുട്ടി ഉറങ്ങിപ്പോയതിനെ തുടർന്ന് ബസിൽ നിന്ന് ഇറങ്ങാൻ വൈകിയ ദമ്പതികളെ മർദിച്ച സംഭവത്തിൽ സ്വകാര്യ ബസ് ജീവനക്കാരന് കടുത്തുരുത്തി പൊലീസ് നോട്ടീസ് നൽകി. കോട്ടനല്ലൂർ സ്വദേശിയായ സോനുവിനാണ് ഹാജരാകാൻ നിർദേശം നൽകിയിരിക്കുന്നത്. ദമ്പതികളുടെ പരാതിയിൽ കണ്ടക്ടർക്കെതിരെ നേരത്തെ തന്നെ കേസ് എടുത്തിരുന്നു.

അറുനൂറ്റിമംഗലം ഈട്ടിമല സ്വദേശികളായ സജീവ്, ഭാര്യ രാജിഷ, പത്ത് വയസുകാരിയായ മകൾ എന്നിവരാണ് ആക്രമണത്തിനിരയായത്. ഹൈദരാബാദിൽ നഴ്സിംഗ് പഠിക്കുന്ന മൂത്തമകളെ കോട്ടയത്ത് ട്രെയിനിൽ കയറ്റിവിട്ട ശേഷം ഇവർ എറണാകുളത്തേക്കുള്ള ഗുഡ്‌വിൽ ബസിൽ കടുത്തുരുത്തിയിലേക്ക് മടങ്ങുകയായിരുന്നു.

സംഭവം വ്യാഴാഴ്ച ഉച്ചയ്ക്ക് പന്ത്രണ്ടോടെ കടുത്തുരുത്തി ടൗണിലായിരുന്നു. ഡ്രൈവറുടെ സീറ്റിന് സമീപം ഇരുന്നിരുന്ന രാജിഷയും മകളും ഇറങ്ങേണ്ട സ്റ്റോപ്പിലെത്തുമ്പോൾ കുട്ടി ഉറങ്ങിപ്പോയതിനാൽ ഇറങ്ങാൻ വൈകി. ഇതിനെച്ചൊല്ലി കണ്ടക്ടർ രാജിഷയോട് മോശമായി പെരുമാറുകയും അസഭ്യം പറയുകയും ചെയ്തതായാണ് പരാതി.

ഇത് ചോദ്യം ചെയ്ത സജീവിനെ കണ്ടക്ടർ മർദിച്ചുവെന്നാണ് ആരോപണം. പിന്നാലെ ബസ് നിർത്തിയിറങ്ങിയ ഡ്രൈവറും ദമ്പതികളോട് അസഭ്യം പറഞ്ഞതായി പറയുന്നു. ഭർത്താവിനെ രക്ഷിക്കാൻ എത്തിയ രാജിഷയെയും കണ്ടക്ടർ ആക്രമിച്ചതോടെ സ്ഥലത്ത് ബഹളമായി. നാട്ടുകാരും മറ്റു യാത്രക്കാരും ഇടപെട്ടതോടെയാണ് കൂടുതൽ സംഘർഷം ഒഴിവായത്.

സ്ഥിതി വഷളാകുമെന്ന് മനസിലാക്കിയ ബസ് ജീവനക്കാർ ബസുമായി സ്ഥലത്ത് നിന്ന് കടന്നുകളഞ്ഞതായും പരാതിയിലുണ്ട്. പിന്നാലെ ദമ്പതികൾ കടുത്തുരുത്തി പൊലീസ് സ്റ്റേഷനിലെത്തി പരാതി നൽകുകയായിരുന്നു.

മർദനത്തിൽ രാജിഷയുടെ മുഖത്തും തലയിലും പരിക്കേറ്റു. ചെവിയിലും കണ്ണിലും നീര് വച്ച നിലയിലായിരുന്നു. സജീവിനും മുഖത്ത് പരിക്കേറ്റിട്ടുണ്ട്. മാതാപിതാക്കളെ മർദിക്കുന്നത് നേരിൽ കണ്ട പത്ത് വയസുകാരി ഭീതിയിലായെന്നും കുടുംബം പറയുന്നു. ഇരുവരും തലയോലപ്പറമ്പ് സർക്കാർ ആശുപത്രിയിൽ ചികിത്സ തേടി.

സംഭവം സോഷ്യൽ മീഡിയയിലും വലിയ ചർച്ചയായിട്ടുണ്ട്. യാത്രക്കാരോടുള്ള സ്വകാര്യ ബസ് ജീവനക്കാരുടെ പെരുമാറ്റം വീണ്ടും ചോദ്യം ചെയ്യപ്പെടുകയാണ്. പൊലീസ് കേസെടുത്ത സാഹചര്യത്തിൽ കൂടുതൽ ചോദ്യം ചെയ്യലും നിയമനടപടികളും ഉടൻ ഉണ്ടാകാനിടയുണ്ട്.