ന്യൂഡല്ഹി: സംസ്ഥാന സര്ക്കാരിന് ആവശ്യമുണ്ടെങ്കില് സില്വര് ലൈനിനെ പിന്തുണയ്ക്കുമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ് രാജ്യസഭയില് അറിയിച്ചു. സംസ്ഥാന സര്ക്കാര് മുമ്പ് നിര്ദേശിച്ചിരുന്ന സില്വര്ലൈന് പദ്ധതിക്ക് വലിയ പാരിസ്ഥിതികാഘാതമുണ്ടെന്നും അത് സാധ്യമാകുമെന്ന് കരുതുന്നില്ലെന്നും സഭയില് പറഞ്ഞ അശ്വിനി വൈഷ്ണവ് പക്ഷേ പദ്ധതി മുന്നോട്ടു കൊണ്ടുപോകുന്നതിനുള്ള ഉത്തരവാദിത്വം സംസ്ഥാന സര്ക്കാരിന്റെമേല് ചാരിയിട്ടുണ്ട്.
പന്ത് സംസ്ഥാന സര്ക്കാരിന്റെ കോര്ട്ടിൽ
സില്വര്ലൈനില് പന്ത് സംസ്ഥാന സര്ക്കാരിന്റെ കോര്ട്ടിലാണെന്നും സര്ക്കാര് ഭൂമി ഏറ്റെടുക്കല് തുടങ്ങിയാല് പിന്തുണയ്ക്കുമെന്നും റെയില്വേ മന്ത്രി പറഞ്ഞു.2020 ജൂണ് 17ന് കേന്ദ്രസര്ക്കാരിന്റെ മുന്നില് സമര്പ്പിച്ച സില്വര് ലൈന് പദ്ധതിയുടെ ഡിപിആറിന് (ഡീറ്റെയില്ഡ് പ്രോജക്ട് റിപ്പോര്ട്ട്) നാളിതുവരെയായിട്ടും കേന്ദ്രാനുമതി ലഭിക്കാതെ സംസ്ഥാന സര്ക്കാര് ബദല് റെയില് പദ്ധതികള് തേടുമ്പോഴാണ് സില്വര് ലൈന് പദ്ധതി ഇപ്പോഴും പരിഗണിക്കാവുന്ന വിഷയമാണെന്ന തരത്തില് അശ്വിനി വൈഷ്ണവിന്റെ പ്രസ്താവന.
