തിരുവനന്തപുരം: മോക്ക ചുഴലിക്കാറ്റിന്റെ പശ്ചാത്തലത്തില് സംസ്ഥാനത്തു മഴ കനക്കും. ചുഴലിക്കാറ്റ് കേരളത്തെ ബാധിക്കില്ലെങ്കിലും അടുത്ത നാലു ദിവസം സംസ്ഥാനത്ത് ഒറ്റപ്പെട്ടയിടങ്ങളില് മിന്നലോടു കൂടിയ മഴയ്ക്കു സാധ്യത. 30 മുതല് 40 കിലോമീറ്റര് വേഗത്തില് കാറ്റു വീശാനും സാധ്യത.
തെക്ക് കിഴക്കന് ബംഗാള് ഉള്ക്കടലിലും സമീപപ്രദേശങ്ങളിലും രൂപപ്പെട്ട ചക്രവാതച്ചുഴി 08/05/23 തിങ്കളാഴ്ച ന്യൂനമര്ദമായും 09/05/23 ചൊവ്വാഴ്ച തീവ്രന്യൂനമര്ദമായും ശക്തി പ്രാപിച്ചേക്കും. അതിനുശേഷം വടക്ക് ദിശയിലേക്ക് പ്രവഹിച്ച് മധ്യ ബംഗാള് ഉള്ക്കടലിലേക്ക് നീങ്ങുന്ന പാതയില് ചുഴലിക്കാറ്റായി ശക്തി പ്രാപിക്കുമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്.
വരും ദിവസങ്ങളില് രാത്രി 11.30 വരെ 0.8 മുതല് 1.2 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കേരള, കര്ണാടക, ലക്ഷദ്വീപ് തീരങ്ങളില് മത്സ്യബന്ധനത്തിന് തടസമില്ലെന്നു കേന്ദ്ര കാലാവസ്ഥ വകുപ്പ് അറിയിച്ചു.
08/05/23 തിങ്കളാഴ്ച എറണാകുളം, വയനാട് ജില്ലകളില് യെല്ലോ അലര്ട്ട്. 09/05/23 ചൊവ്വാഴ്ച എറണാകുളം, ഇടുക്കി ജില്ലകളിലും 10/05/23 ബുധനാഴ്ച കോഴിക്കോട്, വയനാട് ജില്ലകളിലും യെല്ലോ അലര്ട്ട് പ്രഖ്യാപിച്ചു.
