ചെന്നൈ: തമിഴ്‌നാട്ടിലെ പ്രധാന നഗരങ്ങളില്‍ ഏപ്രില്‍ 26 ഞായറാഴ്ച വൈകുന്നേരം മുതല്‍ ലോക്ക്ഡൗണ്‍ കൂടുതല്‍ ശക്തമാക്കാന്‍ തീരുമാനിച്ചതോടെ അവശ്യ സാധനങ്ങള്‍ വാങ്ങാന്‍ ജനങ്ങളുടെ വന്‍ തിരക്ക്. ചെന്നൈ അടക്കമുള്ള വന്‍നഗരങ്ങളിലെ പച്ചക്കറി, പലവ്യഞ്ജന കടകളില്‍ വലിയ ജനത്തിരക്കാണ് ഇന്ന് അനുഭവപ്പെട്ടത്. ഇന്ന് വൈകുന്നേരം ആറ് മണിമുതല്‍ ലോക്ക്ഡൗണ്‍ കൂടുതല്‍ ശക്തമാക്കുമെന്ന് മുഖ്യമന്ത്രി എടപ്പാടി പളനിസാമി അറിയിച്ചിരുന്നു. ഇതിന്റെ ഭാഗമായി അവശ്യസാധന കടകള്‍ വില്‍ക്കുന്ന കടകള്‍ വൈകുന്നേരം മൂന്നു മണിവരെ തുറക്കാനും അദ്ദേഹം നിര്‍ദേശിച്ചിരുന്നു. ഇതേ തുടര്‍ന്നാണ് ആയിരക്കണക്കിനാളുകള്‍ ലോക്കഡൗണ്‍ നിര്‍ദേശങ്ങള്‍ മറികടന്ന് നഗരങ്ങളിലെ കടകള്‍ക്കു മുന്നില്‍ തടിച്ചു കൂടിയത്. തമിഴ്‌നാട്ടിലെ പ്രധാന നഗരങ്ങളായ ചെന്നൈ, മധുരൈ, കോയമ്പത്തൂര്‍ എന്നിവിടങ്ങളില്‍ ഞായറാഴ്ച മുതല്‍ നാലുദിവസത്തേക്ക് ശക്തമായ ലോക്ക്ഡൗണ്‍ നടപ്പിലാക്കുമെന്നാണ് വെള്ളിയാഴ്ച അറിയിച്ചിരുന്നത്. സേലം, തിരുപ്പൂര്‍ എന്നിവിടങ്ങളിലും മൂന്നു ദിവസത്തെ ശക്തമായ ലോക്ക്ഡൗണ്‍ പ്രഖ്യാപിച്ചിട്ടുണ്ട്. ഇത്തരം പ്രദേശങ്ങളില്‍ പച്ചക്കറി, പലവ്യജ്ഞന കടകള്‍ അടക്കം എല്ലാം അടച്ചിടുമെന്നാണ് സര്‍ക്കാര്‍ അറിയിച്ചിട്ടുള്ളത്. ഭക്ഷണ സാധനങ്ങളുടെ ഹോം ഡെലിവറിയും സര്‍ക്കാര്‍ നടത്തുന്ന അമ്മ ക്യാന്റീനുകളും മാത്രമേ തുറന്നു പ്രവര്‍ത്തിക്കുന്നതിന് അനുവദിക്കൂ.
ഞായറാഴ്ച വൈകുന്നേരം മുതല്‍ ലോക്ക്ഡൗണ്‍ കൂടുതല്‍ ശക്തമാക്കി തമിഴ്‌നാട് സര്‍ക്കാര്‍
