പോർട്ട് ലൂയിസ്  / 2026  /  ഒക്ടോബർ 31

ദക്ഷിണ ഇന്ത്യൻ മഹാസമുദ്ര മേഖലയിലെ ദൗത്യത്തിന്റെ ഭാഗമായി ഇന്ത്യൻ നാവികസേനയുടെ യുദ്ധക്കപ്പലായ ഐഎൻഎസ് തർകാഷ് ഒക്ടോബർ 30ന് മൗറീഷ്യസിലെ പോർട്ട് ലൂയിസിൽ എത്തി. ഇരുരാജ്യങ്ങളും തമ്മിലുള്ള അടുത്ത സമുദ്ര പങ്കാളിത്തത്തിന്റെ ഭാഗമാണ് സന്ദർശനം. തൊഴിൽപരമായ ആശയവിനിമയം, സംയുക്ത പ്രവർത്തനങ്ങൾ, സാംസ്കാരിക കൈമാറ്റം എന്നിവയിലൂടെ നാവിക സഹകരണം കൂടുതൽ ശക്തമാക്കുകയാണ് ലക്ഷ്യം.

മൗറീഷ്യസ് തീരസംരക്ഷണ സേനയുമായി സംയുക്ത പരിശീലനം

സന്ദർശനത്തിനിടെ തർകാഷിലെ സേനാംഗങ്ങൾ മൗറീഷ്യസ് തീരസംരക്ഷണ സേനയുമായി വിവിധ പരിപാടികളിൽ പങ്കെടുക്കും. പ്രവർത്തന അനുഭവങ്ങളും മികച്ച രീതികളും പങ്കുവെക്കാനുള്ള സംയുക്ത പരിശീലനവും ഇതിലുണ്ടാകും. ഒരുമിച്ച് പ്രവർത്തിക്കാനുള്ള ശേഷി മെച്ചപ്പെടുത്താനും ഇരുസേനകളും തമ്മിലുള്ള ഏകോപനം ശക്തമാക്കാനും പരിശീലനം സഹായിക്കും.

സാംസ്കാരിക കൈമാറ്റവും ജനങ്ങളുമായുള്ള ഇടപെടലും

സാംസ്കാരിക കൈമാറ്റവും പ്രാദേശിക ജനങ്ങളുമായി ബന്ധപ്പെടുന്ന പരിപാടികളും സന്ദർശനത്തിന്റെ ഭാഗമാണ്. ഇരുരാജ്യങ്ങളിലെയും സേനാംഗങ്ങൾക്ക് പരസ്പരം അടുത്തറിയാൻ ഇതിലൂടെ അവസരമൊരുങ്ങും. ജനങ്ങൾ തമ്മിലുള്ള ബന്ധം കൂടുതൽ ശക്തമാക്കാനും ഈ പരിപാടികൾ വഴിയൊരുക്കും.

നൂറ്റിത്തൊണ്ണൂറ്റിരണ്ടാമത് അപ്രവാസി ദിനാചരണത്തിൽ പങ്കെടുക്കും

നവംബർ രണ്ടിന് മൗറീഷ്യസിൽ നടക്കുന്ന നൂറ്റിത്തൊണ്ണൂറ്റിരണ്ടാമത് അപ്രവാസി ദിനാചരണത്തിലും തർകാഷ് പങ്കെടുക്കും. ഇന്ത്യയിൽനിന്നുള്ള കരാർ തൊഴിലാളികളുടെ ആദ്യ സംഘം 1834 നവംബർ രണ്ടിന് പോർട്ട് ലൂയിസിലെ അപ്രവാസി ഘട്ടിൽ എത്തിയതിന്റെ ഓർമയ്ക്കാണ് എല്ലാ വർഷവും ദിനാചരണം നടത്തുന്നത്. ഈ തൊഴിലാളികളുടെ ചരിത്രപൈതൃകവും ത്യാഗങ്ങളും സംഭാവനകളും ദിനാചരണത്തിലൂടെ ആദരിക്കുന്നു. അവരുടെ പിൻഗാമികൾ ഇന്ന് മൗറീഷ്യസ് ജനസംഖ്യയിലെ ഗണ്യമായ വിഭാഗമാണ്. രാജ്യത്തിന്റെ സാംസ്കാരിക, സാമ്പത്തിക വളർച്ചയിലും അവർ സംഭാവനകൾ നൽകിയിട്ടുണ്ട്. അനുസ്മരണ പരിപാടികളിലെ തർകാഷിന്റെ പങ്കാളിത്തം ഇരുരാജ്യങ്ങളുടെയും ആഴത്തിലുള്ള ചരിത്ര, സാംസ്കാരിക ബന്ധങ്ങൾ എടുത്തുകാട്ടുന്നു.

പ്രാദേശിക സുരക്ഷയ്ക്കും സമുദ്ര പങ്കാളിത്തത്തിനും കരുത്ത്

പങ്കിട്ട ചരിത്രവും സാംസ്കാരിക അടുപ്പവും പരസ്പര വിശ്വാസവും അടിസ്ഥാനമായ ഇന്ത്യ–മൗറീഷ്യസ് ബന്ധത്തിന്റെ തുടർച്ചയാണ് ഈ സന്ദർശനം. ഇന്ത്യൻ മഹാസമുദ്ര മേഖലയിലെ സൗഹൃദ രാജ്യങ്ങളുമായി ഇന്ത്യൻ നാവികസേന തുടരുന്ന ഇടപെടലുകളുടെ ഭാഗവുമാണിത്. സമുദ്ര സഹകരണത്തിനും പ്രാദേശിക സുരക്ഷയ്ക്കും സ്ഥിരതയ്ക്കും ഇത്തരം ദൗത്യങ്ങൾ സംഭാവന നൽകുന്നു. മേഖലകളിലുടനീളം സുരക്ഷയ്ക്കും വളർച്ചയ്ക്കുമായി പരസ്പരവും സമഗ്രവുമായ മുന്നേറ്റം ലക്ഷ്യമിടുന്ന മഹാസാഗർ കാഴ്ചപ്പാട് മുന്നോട്ടുകൊണ്ടുപോകാനും സമുദ്ര പങ്കാളിത്തങ്ങൾ ശക്തമാക്കാനും നാവികസേന ഇതിലൂടെ ശ്രമിക്കുന്നു.

.