ന്യൂഡൽഹി  /  2026  / ഒക്ടോബർ 30

ദേശീയ സഹകരണ വികസന കോർപ്പറേഷനായ എൻസിഡിസിയുടെ 93-ാമത് ജനറൽ കൗൺസിൽ യോഗം കേന്ദ്ര ആഭ്യന്തര, സഹകരണ മന്ത്രി അമിത് ഷായുടെ അധ്യക്ഷതയിൽ ന്യൂഡൽഹിയിലെ കോർപ്പറേഷൻ ആസ്ഥാനത്ത് നടന്നു. പ്രധാനമന്ത്രി നരേന്ദ്ര മോദിയുടെ ‘സഹകരണത്തിലൂടെ സമൃദ്ധി’ എന്ന കാഴ്ചപ്പാടിനനുസരിച്ച് വികസനം ഓരോ പൗരനിലേക്കും സമൂഹത്തിലെ എല്ലാ വിഭാഗങ്ങളിലേക്കും എത്തിക്കുകയാണ് ലക്ഷ്യമെന്ന് അമിത് ഷാ പറഞ്ഞു. എൻസിഡിസിയുടെ സാമ്പത്തിക നേട്ടങ്ങൾ, സ്ഥാപനതലത്തിലുള്ള വളർച്ച, സഹകരണ മേഖലയിലെ ധനസഹായം വിപുലീകരിക്കൽ, പുതിയ ബഹുസംസ്ഥാന സഹകരണ സംഘങ്ങൾ, ഗ്രാമീണ ഉപജീവനമാർഗങ്ങൾ, ഭാവി പ്രവർത്തനരേഖ എന്നിവ യോഗം ചർച്ച ചെയ്തു.

കഴിഞ്ഞ ഏകദേശം അഞ്ചുവർഷത്തിനിടെ എൻസിഡിസി മികച്ച പ്രകടനം നടത്തിയതായി അമിത് ഷാ പറഞ്ഞു. സാമ്പത്തിക പ്രകടനത്തിലും നിശ്ചയിച്ച ലക്ഷ്യങ്ങൾ കൈവരിക്കുന്നതിലും വലിയ പുരോഗതിയുണ്ടായി. ഓരോ ജീവനക്കാരനിൽനിന്നുമുള്ള ലാഭവിഹിതം ഉയർന്നു. വായ്പ അനുവദിക്കുന്നതും വിതരണം ചെയ്യുന്നതും വർധിച്ചു. അറ്റ നിഷ്ക്രിയ ആസ്തി പൂജ്യമായി നിലനിർത്താനുമായി. രാജ്യത്തെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും എൻസിഡിസിയുടെ സാന്നിധ്യം ഉറപ്പാക്കിയത് പ്രധാന നേട്ടമാണെന്നും അദ്ദേഹം പറഞ്ഞു. ലഡാക്കിലും വടക്കുകിഴക്കൻ മേഖലയിലെ ചെറിയ സംസ്ഥാനങ്ങളിലും ഓഫീസുകൾ തുറന്നത് സഹകരണ പ്രസ്ഥാനത്തെ വിദൂര പ്രദേശങ്ങളിലെത്തിക്കാൻ സഹായിച്ചു. ഈ നേട്ടങ്ങൾക്ക് ഉദ്യോഗസ്ഥരെയും ജീവനക്കാരെയും അദ്ദേഹം അഭിനന്ദിച്ചു.

പ്രത്യേക സഹകരണ മന്ത്രാലയം രൂപീകരിച്ചതിലൂടെ സഹകരണ മേഖലയുടെ പതിറ്റാണ്ടുകളായുള്ള ആവശ്യമാണ് പ്രധാനമന്ത്രി നിറവേറ്റിയതെന്ന് അമിത് ഷാ പറഞ്ഞു. സഹകരണ സ്ഥാപനങ്ങളുടെ എണ്ണം കൂട്ടുക മാത്രമല്ല ലക്ഷ്യം. രാജ്യത്തെ ഓരോ പൗരനെയും വികസനപ്രക്രിയയുമായി ബന്ധിപ്പിക്കണം. ഇന്ത്യപോലൊരു വലിയ രാജ്യത്തിന്റെ വികസനം മൊത്ത ആഭ്യന്തര ഉൽപ്പാദനം, ആളോഹരി വരുമാനം, വ്യാവസായിക നിക്ഷേപം എന്നിവകൊണ്ടുമാത്രം വിലയിരുത്താനാവില്ല. എല്ലാ വിഭാഗങ്ങൾക്കും അവസരങ്ങൾ ലഭിക്കണം. ഓരോരുത്തർക്കും അന്തസ്സോടെ ജീവിക്കാനും രാജ്യത്തിന്റെ പുരോഗതിയിൽ പങ്കാളികളാകാനും കഴിയണം. വികസനം ഓരോ പൗരനിലേക്കും എത്തുന്നതാണ് എല്ലാവരെയും സ്പർശിക്കുന്ന വികസനം. ലഡാക്ക് മുതൽ ലക്ഷദ്വീപ് വരെയുള്ള എല്ലാ പ്രദേശങ്ങൾക്കും തുല്യപങ്കാളിത്തം ഉറപ്പാക്കുന്നതാണ് എല്ലാവരെയും ഉൾക്കൊള്ളുന്ന വികസനമെന്നും അദ്ദേഹം വിശദീകരിച്ചു.

പരിമിതമായ മൂലധനമുള്ള ചെറുകിട കർഷകർ, കന്നുകാലി വളർത്തുന്നവർ, ഗ്രാമീണ സ്ത്രീകൾ, മത്സ്യത്തൊഴിലാളികൾ, സാമ്പത്തികമായി പിന്നാക്കം നിൽക്കുന്നവർ എന്നിവരുടെ കൂട്ടായ കരുത്തിനെ ദേശീയ വികസനവുമായി ബന്ധിപ്പിക്കാൻ ഏറ്റവും ഫലപ്രദമായ മാർഗമാണ് സഹകരണമെന്ന് മന്ത്രി പറഞ്ഞു. ചെറിയ നിക്ഷേപമുള്ള നിരവധി ആളുകളെ ഒരുമിപ്പിച്ച് ഉൽപ്പാദനം, സംസ്കരണം, വിപണനം, വരുമാനം കണ്ടെത്തൽ എന്നിവയിൽ പുതിയ അവസരങ്ങൾ സൃഷ്ടിക്കാം. സഹകരണ മൂല്യങ്ങളും പ്രൊഫഷണൽ നടത്തിപ്പും ചേർന്നാൽ ആഗോളതലത്തിൽ മത്സരിക്കാൻ കഴിയുന്ന സ്ഥാപനങ്ങൾ വളർത്തിയെടുക്കാമെന്നതിന് അമുൽ, ഇഫ്കോ തുടങ്ങിയവ ഉദാഹരണങ്ങളാണ്. അന്താരാഷ്ട്ര സഹകരണ റാങ്കിങ്ങുകളിൽ ഇന്ത്യൻ സ്ഥാപനങ്ങൾ കൈവരിച്ച മികച്ച സ്ഥാനങ്ങൾ രാജ്യത്തെ സഹകരണ മേഖലയ്ക്കാകെ അഭിമാനമാണെന്നും അദ്ദേഹം പറഞ്ഞു.

അഞ്ചുവർഷത്തെ നേട്ടങ്ങൾക്കപ്പുറം അടുത്ത 25 വർഷത്തിനുള്ള ഒരുക്കം

ഉൽപ്പാദനം, സംസ്കരണം, വിപണനം, ഗ്രാമീണ വ്യവസായം, ജലസംരക്ഷണം, കാർഷിക ഇൻഷുറൻസ്, സഹകരണ ബാങ്കിങ്, വിഭവങ്ങൾ പുനരുപയോഗിക്കുന്ന സമ്പദ്‌വ്യവസ്ഥയുമായി ബന്ധപ്പെട്ട മേഖലകൾ എന്നിവയിലേക്ക് എൻസിഡിസി പ്രവർത്തനം വ്യാപിപ്പിച്ചതായി അമിത് ഷാ പറഞ്ഞു. ദേശീയതലത്തിലുള്ള ബഹുസംസ്ഥാന സഹകരണ സംഘങ്ങളുടെ രൂപീകരണത്തിലും മൂലധന നിക്ഷേപത്തിലും പ്രവർത്തനത്തിലും കോർപ്പറേഷൻ പ്രധാന പങ്കുവഹിച്ചു. കഴിഞ്ഞ അഞ്ചുവർഷം എൻസിഡിസിയുടെ ഒരുതരത്തിലുള്ള സുവർണകാലമായി വിശേഷിപ്പിക്കാം. എന്നാൽ ഈ നേട്ടങ്ങളിൽ തൃപ്തരായി നിൽക്കരുത്. മാറുന്ന ആവശ്യങ്ങൾ നേരിടാൻ സ്ഥാപനഘടന, ധനസമാഹരണ ശേഷി, പ്രൊഫഷണൽ പ്രവർത്തനം, സഹകരണ സ്ഥാപനങ്ങളുമായുള്ള പങ്കാളിത്തരീതികൾ എന്നിവയിൽ സമഗ്ര പരിഷ്കാരം വേണമെന്നും അദ്ദേഹം പറഞ്ഞു.

അടുത്ത 25 വർഷത്തേക്കുള്ള സമഗ്ര പ്രവർത്തനരേഖ തയ്യാറാക്കാൻ എൻസിഡിസിക്ക് മന്ത്രി നിർദേശം നൽകി. സഹകരണ മേഖലയിലെ പരിചയസമ്പന്നരായ പ്രതിനിധികളെയും വിദഗ്ധരെയും ഉൾപ്പെടുത്തി ഒരു സംഘം രൂപീകരിക്കണം. നിലവിലെ ഘടന, മൂലധനം സമാഹരിക്കാനുള്ള മറ്റു മാർഗങ്ങൾ, സഹകരണ സ്ഥാപനങ്ങളുടെ പങ്കാളിത്തം, സാമ്പത്തിക സ്വയംഭരണം, സംഘടനാപരമായ പരിഷ്കാരങ്ങൾ, ഭാവിയിലെ വ്യവസായ സാധ്യതകൾ എന്നിവ സംഘം പരിശോധിക്കണം. ഈ വിഷയങ്ങളിൽ ശിൽപ്പശാല നടത്താനും അദ്ദേഹം നിർദേശിച്ചു. വിശദമായ അവതരണങ്ങൾക്കും ചർച്ചകൾക്കുമായി പ്രത്യേക യോഗം വിളിച്ച് ആവശ്യമായ തീരുമാനങ്ങളിലേക്ക് നീങ്ങണമെന്നും മന്ത്രി പറഞ്ഞു.

സഹകരണ സ്ഥാപനങ്ങളുടെ ഭരണസംവിധാനം പ്രൊഫഷണലായിരിക്കണം. അതേസമയം അടിസ്ഥാന സമീപനം സഹകരണ തത്ത്വങ്ങളിൽ ഉറച്ചുനിൽക്കണം. സർക്കാർ സഹായത്തെയും സർക്കാർ ബാങ്കുകളെയും അമിതമായി ആശ്രയിക്കുന്നത് സ്ഥാപനവളർച്ചയ്ക്ക് ചില പരിമിതികളുണ്ടാക്കും. വർധിക്കുന്ന ആവശ്യങ്ങൾക്കനുസരിച്ച് വിഭവങ്ങൾ സമാഹരിക്കാനും സഹകരണ മേഖലയിലെ സാധ്യതകൾ പൂർണമായി ഉപയോഗിക്കാനും കഴിയുന്ന സാമ്പത്തിക, സംഘടനാ മാതൃകകൾ എൻസിഡിസി വികസിപ്പിക്കണം. സഹകരണ മേഖലയെ വളർത്തുക എൻസിഡിസിയുടെ ഉത്തരവാദിത്വമാണ്. എൻസിഡിസിയുടെ വളർച്ച ഉറപ്പാക്കുക ജനറൽ കൗൺസിലിലെ എല്ലാവരുടെയും കൂട്ടായ പ്രതിജ്ഞയായിരിക്കണമെന്നും അദ്ദേഹം പറഞ്ഞു.

നാഷണൽ കോഓപ്പറേറ്റീവ് എക്സ്പോർട്സ് ലിമിറ്റഡ്, ഭാരതീയ ബീജ് സഹകാരി സമിതി ലിമിറ്റഡ്, നാഷണൽ കോഓപ്പറേറ്റീവ് ഓർഗാനിക്സ് ലിമിറ്റഡ്, ഭാരത് ടാക്സി, സഹകാർ സാരഥി എന്നിവയുടെ വളർച്ചയിൽ എൻസിഡിസി വഹിച്ച പങ്കിനെ മന്ത്രി അഭിനന്ദിച്ചു. നഗര സഹകരണ ബാങ്കുകളുടെ പൊതുസംവിധാനമായ നാഷണൽ അർബൻ കോഓപ്പറേറ്റീവ് ഫിനാൻസ് ആൻഡ് ഡെവലപ്മെന്റ് കോർപ്പറേഷന്റെ വികസനത്തിലെ പങ്കും അദ്ദേഹം എടുത്തുപറഞ്ഞു. വരുംവർഷങ്ങളിൽ ഇവ ദേശീയതലത്തിൽ വലിയ സ്വാധീനമുള്ള ബഹുസംസ്ഥാന സഹകരണ സ്ഥാപനങ്ങളായി മാറുമെന്ന പ്രതീക്ഷയും പങ്കുവച്ചു. വലിയ സഹകരണ സംരംഭങ്ങൾക്ക് ധനസഹായം നൽകുന്നതിനൊപ്പം ചെറുകിട കർഷകരുടെയും കന്നുകാലി വളർത്തുന്നവരുടെയും മത്സ്യത്തൊഴിലാളികളുടെയും ഉപജീവനത്തിൽ നേരിട്ട് മാറ്റമുണ്ടാക്കുന്നതും എൻസിഡിസിയുടെ പ്രധാന ഉത്തരവാദിത്വമാണെന്ന് അദ്ദേഹം വ്യക്തമാക്കി.

ആഴക്കടൽ മത്സ്യബന്ധനം മുതൽ പഞ്ചസാര മില്ലുകൾ വരെ പുതിയ അവസരങ്ങൾ

ആഴക്കടൽ മത്സ്യബന്ധനത്തിൽ ഏർപ്പെടുന്ന ഏകദേശം നൂറ് ട്രോളറുകൾക്ക് എൻസിഡിസി വഴി ധനസഹായം അനുവദിച്ചതായി അമിത് ഷാ പറഞ്ഞു. ഇത്തരം സഹായങ്ങൾ നിരവധി മത്സ്യത്തൊഴിലാളി കുടുംബങ്ങളുടെ പ്രതിമാസ വരുമാനം ഗണ്യമായി ഉയർത്താൻ സഹായിക്കും. വലിയ ധനകാര്യ സ്ഥാപനത്തിന് താരതമ്യേന ചെറിയ പദ്ധതിയായി തോന്നാമെങ്കിലും ബന്ധപ്പെട്ട കുടുംബങ്ങളുടെ ജീവിതത്തിലും കുട്ടികളുടെ വിദ്യാഭ്യാസത്തിലും ഭാവി അവസരങ്ങളിലും വലിയ മാറ്റമുണ്ടാക്കാനാകും. ജനങ്ങളുടെ ജീവിതത്തിൽ നേരിട്ട് മാറ്റമുണ്ടാക്കുന്ന ഇത്തരം പദ്ധതികൾ കൂടുതൽ വ്യാപിപ്പിക്കണമെന്നും അദ്ദേഹം ആവശ്യപ്പെട്ടു.

സഹകരണ പഞ്ചസാര മില്ലുകൾക്കായി വിഭവങ്ങൾ പുനരുപയോഗിക്കുന്ന സമ്പദ്‌വ്യവസ്ഥയെ അടിസ്ഥാനമാക്കിയുള്ള പുതിയ വ്യവസായ മാതൃകകൾ വികസിപ്പിക്കണമെന്നും മന്ത്രി പറഞ്ഞു. മഹാരാഷ്ട്രയിലെ കോലാപുരിലും പുണെയിലും നിർദേശിച്ചിരിക്കുന്ന പുതിയ ബഹുസംസ്ഥാന സഹകരണ സംരംഭങ്ങളെക്കുറിച്ചും അദ്ദേഹം പരാമർശിച്ചു. എഥനോൾ, സിഎൻജി, രാസവസ്തുക്കൾ, മറ്റു മൂല്യവർധിത ഉൽപ്പന്നങ്ങൾ എന്നിവയ്ക്കായി പൊതുവായ സംസ്കരണ, വ്യാവസായിക സൗകര്യങ്ങൾ ഒരുക്കാം. ഒറ്റയ്ക്ക് വലിയ നിക്ഷേപം നടത്താനോ ആധുനിക സംസ്കരണശാല സ്ഥാപിക്കാനോ കഴിയാത്ത സഹകരണ പഞ്ചസാര മില്ലുകൾക്ക് ഇത് സഹായകരമാകും. ഇതിലൂടെ ലഭിക്കുന്ന നേട്ടങ്ങൾ ബന്ധപ്പെട്ട മില്ലുകളിലേക്ക് എത്തുന്നുവെന്ന് ഉറപ്പാക്കണമെന്നും അദ്ദേഹം പറഞ്ഞു.

യുവാക്കളുടെ പങ്കാളിത്തം വർധിപ്പിക്കാനും യോഗത്തിൽ നിർദേശമുണ്ടായി. ‘സഹകാർ മിത്ര’ പദ്ധതിയിലൂടെ പരിശീലനവും ഇന്റേൺഷിപ്പും പൂർത്തിയാക്കിയ യോഗ്യതയുള്ള യുവാക്കളെ പുതിയ ബഹുസംസ്ഥാന സഹകരണ സംഘങ്ങളുമായി ബന്ധിപ്പിക്കണം. ആധുനിക നടത്തിപ്പുരീതികളും കാര്യക്ഷമതയും പ്രൊഫഷണൽ നേതൃത്വവും വളർത്താൻ ഇത് സഹായിക്കും. ബനാസ് ഡെയറിയുടെ വിജയകരമായ നടത്തിപ്പുമാതൃകയെക്കുറിച്ചുള്ള പഠനവും മന്ത്രി പരാമർശിച്ചു. ആ അനുഭവങ്ങൾ എൻസിഡിസിയുടെ ഭാവി പ്രവർത്തനവും സ്ഥാപനവളർച്ചയും ശക്തിപ്പെടുത്താൻ ഉപയോഗിക്കണമെന്നും അദ്ദേഹം നിർദേശിച്ചു.

വരുംവർഷങ്ങളിൽ എൻസിഡിസിയുടെ ധനസഹായ വിതരണം വേഗത്തിൽ വർധിപ്പിക്കണമെന്നും മന്ത്രി പറഞ്ഞു. 2026–27 സാമ്പത്തികവർഷം 1.70 ലക്ഷം കോടി രൂപയും 2027–28ൽ 2.10 ലക്ഷം കോടി രൂപയും 2028–29ൽ 2.50 ലക്ഷം കോടി രൂപയുമാണ് ലക്ഷ്യങ്ങൾ. തുടർന്നുള്ള വർഷങ്ങളിൽ കൂടുതൽ ഉയർന്ന ലക്ഷ്യങ്ങൾ നിശ്ചയിക്കണം. 2029–30ൽ ഏകദേശം 3.50 ലക്ഷം കോടി രൂപയും 2030–31ൽ നാലുലക്ഷം കോടി രൂപയും വിതരണം ചെയ്യാൻ ലക്ഷ്യമിടണമെന്ന് അദ്ദേഹം ആവശ്യപ്പെട്ടു. ക്ഷീരമേഖല, മത്സ്യബന്ധനം, സഹകരണ ബാങ്കിങ് തുടങ്ങിയ മേഖലകളിലെ അവസരങ്ങൾ വർധിക്കുന്നതിനനുസരിച്ച് എൻസിഡിസിയുടെ സാമ്പത്തിക ശേഷിയും ഉയരണം. സഹകരണ മേഖലയ്ക്കാവശ്യമായ ധനസഹായം സഹകരണാടിസ്ഥാനത്തിലുള്ള സ്ഥാപനസംവിധാനത്തിലൂടെ ലഭ്യമാക്കുകയാണ് ലക്ഷ്യം.

എൻസിഡിസിയുടെ വളർച്ചയ്ക്ക് റിസർവ് ബാങ്കും കേന്ദ്ര ധനമന്ത്രാലയവും നൽകുന്ന പിന്തുണയെ അമിത് ഷാ അഭിനന്ദിച്ചു. സാമ്പത്തികവും നിയന്ത്രണപരവുമായ വെല്ലുവിളികൾ പരിഹരിക്കാൻ വിവിധ തലങ്ങളിൽ അനുകൂല സഹകരണം ലഭിച്ചിട്ടുണ്ട്. ശേഷിക്കുന്ന തടസ്സങ്ങൾ നീക്കാനുള്ള ശ്രമങ്ങൾ തുടരും. നബാർഡ്, സംസ്ഥാന സഹകരണ ബാങ്കുകൾ, വാണിജ്യ ബാങ്കുകൾ എന്നിവയുമായി ചേർന്ന് കൂട്ടായ വായ്പാസഹായത്തിനും സംയുക്ത ധനസഹായത്തിനുമുള്ള മാതൃകകൾ പരിശോധിക്കണം. ക്ഷീര സഹകരണ മേഖലയിലെ മുഴുവൻ സാമ്പത്തിക ആവശ്യങ്ങളും നിറവേറ്റാൻ പുതിയ ധനസഹായ മാതൃകകൾ വികസിപ്പിക്കണമെന്നും അദ്ദേഹം നിർദേശിച്ചു.

വടക്കുകിഴക്കിന് സ്വയംപര്യാപ്തത; ധനസഹായ വിതരണത്തിൽ അഞ്ചിരട്ടി വളർച്ച

2030ഓടെ പാൽ, മുട്ട, മത്സ്യം, മാംസം എന്നിവയുടെ ഉൽപ്പാദനത്തിൽ വടക്കുകിഴക്കൻ മേഖലയെ സ്വയംപര്യാപ്തമാക്കുകയാണ് ലക്ഷ്യമെന്ന് അമിത് ഷാ പറഞ്ഞു. ക്ഷീരോൽപ്പാദനം, മത്സ്യബന്ധനം, മൃഗസംരക്ഷണം എന്നിവയിൽ വലിയ സാധ്യതകളുണ്ടെങ്കിലും നിലവിൽ ആവശ്യത്തിന്റെ ഗണ്യമായൊരു പങ്ക് പുറത്തുനിന്നാണ് എത്തുന്നത്. ഈ നാലു മേഖലകളിലും സ്വയംപര്യാപ്തത കൈവരിച്ചാൽ വരുമാനത്തിൽ അഭൂതപൂർവമായ വർധനയും തൊഴിലവസരങ്ങളും ഉണ്ടാകും. ഇതിനായി പ്രായോഗിക പദ്ധതികൾ തയ്യാറാക്കാനും ധനസഹായം നൽകാനും അതത് സംസ്ഥാന സർക്കാരുകളുമായി ചേർന്ന് നടപ്പാക്കാനും വടക്കുകിഴക്കൻ മേഖലയിലെ എൻസിഡിസി ഓഫീസുകൾക്ക് മന്ത്രി നിർദേശം നൽകി.

സഹകരണ മന്ത്രാലയം രൂപീകരിച്ചതുമുതൽ 2026 ഒക്ടോബർ 25 വരെ രാജ്യത്തെ സഹകരണ സ്ഥാപനങ്ങൾക്ക് എൻസിഡിസി ആകെ 4,14,586 കോടി രൂപയുടെ ധനസഹായം വിതരണം ചെയ്തതായി യോഗത്തിൽ അവതരിപ്പിച്ച കണക്കുകൾ വ്യക്തമാക്കുന്നു. 2025–26 സാമ്പത്തികവർഷം 1,55,408 കോടി രൂപയുടെ പദ്ധതികൾക്ക് അനുമതി നൽകി. 1,27,596 കോടി രൂപ വിതരണം ചെയ്തു. ഇതേ കാലയളവിൽ 1,475 കോടി രൂപ അറ്റാദായം നേടി. വായ്പാ തിരിച്ചടവ് നിരക്ക് 99.84 ശതമാനമായിരുന്നു. അറ്റ നിഷ്ക്രിയ ആസ്തി പൂജ്യമായി തുടർന്നു.

2020–21ലെ 24,733 കോടി രൂപയിൽനിന്ന് 2025–26ൽ വാർഷിക ധനസഹായ വിതരണം 1,27,596 കോടി രൂപയായി ഉയർന്നു. അഞ്ചുവർഷത്തിനിടെ ഏകദേശം അഞ്ചിരട്ടി വർധനയാണിത്. 2025–26ൽ അനുമതി നൽകിയ 3,339 യൂണിറ്റുകളും പദ്ധതികളും വഴി 14,881 സഹകരണ സംഘങ്ങൾക്ക് പ്രയോജനം ലഭിക്കുന്നതിനുള്ള വ്യവസ്ഥകളുണ്ട്.

ദേശീയ സഹകരണ വികസന കോർപ്പറേഷൻ ഭേദഗതി നിയമം, 2026ന്റെ പ്രാധാന്യവും യോഗം ചർച്ച ചെയ്തു. പാർലമെന്റിന്റെ ഇരുസഭകളും പാസാക്കി രാഷ്ട്രപതിയുടെ അംഗീകാരം ലഭിച്ച നിയമം 2026 ഓഗസ്റ്റ് 14ന് ഇന്ത്യയുടെ ഗസറ്റിൽ പ്രസിദ്ധീകരിച്ചു. സഹകരണ വികസനത്തിന് ധനസഹായം നൽകാനുള്ള മാർഗങ്ങൾ ഭേദഗതിയിലൂടെ വിപുലമായി. ഇക്വിറ്റിയും ഓഹരി മൂലധനവും വഴിയുള്ള സ്ഥാപനപങ്കാളിത്തത്തിനും പുതിയ നിക്ഷേപ അവസരങ്ങൾക്കും ഇതിലൂടെ വഴിയൊരുങ്ങി.

സഹകരണ സ്ഥാപനങ്ങൾക്ക് കൂടുതൽ എളുപ്പത്തിലും മത്സരക്ഷമമായ വ്യവസ്ഥകളിലും ധനസഹായം ലഭ്യമാക്കാൻ എൻസിഡിസിക്ക് കേന്ദ്ര സർക്കാർ 2,000 കോടി രൂപയുടെ ഗ്രാന്റ് അനുവദിച്ചിട്ടുണ്ട്. നാലുവർഷത്തിനിടെ വിപണിയിൽനിന്ന് 20,000 കോടി രൂപ സമാഹരിക്കാനുള്ള ക്രമീകരണങ്ങൾ നടത്താൻ ഇത് കോർപ്പറേഷനെ സഹായിക്കും. ഈ നടപടിയുടെ ഭാഗമായി 2025–26ൽ 9,380 കോടി രൂപയുടെ വായ്പ വിതരണം ചെയ്തു. 2026–27ൽ ഒക്ടോബർ 25 വരെ 6,172 കോടി രൂപയും വിതരണം ചെയ്തു.

പുതുമകൾക്ക് 25 ലക്ഷം രൂപ വരെ ഗ്രാന്റ്; പരിശീലനത്തിനും വിപുലമായ പിന്തുണ

സഹകരണ മേഖലയിലെ പുതുമകൾക്കും സംരംഭകത്വത്തിനുമായി എൻസിഡിസി ‘സഹകാർ നവാചാർ യോജന’ ആരംഭിച്ചിട്ടുണ്ട്. അർഹരായ സഹകരണ സ്ഥാപനങ്ങൾക്ക് 25 ലക്ഷം രൂപ വരെ പൂർണമായും ഗ്രാന്റായി നൽകുന്നതാണ് പദ്ധതി. തുടക്കത്തിൽ പത്തുകോടി രൂപയുടെ നിധി രൂപീകരിച്ചു. ഇതിലെ 20 ശതമാനം വടക്കുകിഴക്കൻ മേഖല, മലയോര പ്രദേശങ്ങൾ, പിന്നാക്ക വിഭാഗങ്ങൾ എന്നിവിടങ്ങളിലെ സഹകരണ സ്ഥാപനങ്ങൾക്കായി മാറ്റിവച്ചിട്ടുണ്ട്. ഇതുവരെ അഞ്ച് സഹകരണ സ്ഥാപനങ്ങൾക്ക് ആകെ 85 ലക്ഷം രൂപയുടെ ഗ്രാന്റ് അനുവദിച്ചു. വ്യവസായ വികസനം, ഡിജിറ്റൽ അക്കൗണ്ടിങ്, സാമ്പത്തിക നടത്തിപ്പ്, ബ്രാൻഡിങ്, വിപണിയുമായുള്ള ബന്ധം എന്നിവയിലും സ്ഥാപനങ്ങൾക്ക് മാർഗനിർദേശവും പിന്തുണയും നൽകുന്നു.

സഹകരണ സ്ഥാപനങ്ങളിലെ മനുഷ്യവിഭവ വികസനത്തിനും പ്രവർത്തനശേഷി വർധിപ്പിക്കാനുമായി എൻസിഡിസിയുടെ ലക്ഷ്മൺറാവു ഇനാംദാർ നാഷണൽ അക്കാദമി ഫോർ കോഓപ്പറേറ്റീവ് റിസർച്ച് ആൻഡ് ഡെവലപ്മെന്റും പ്രാദേശിക പരിശീലന കേന്ദ്രങ്ങളും വിപുലമായ പരിശീലന പരിപാടികൾ നടത്തുന്നുണ്ട്. 2025–26 സാമ്പത്തികവർഷം 227 പരിശീലന പരിപാടികളിലായി 21,688 പേർ പങ്കെടുത്തു. ആധുനിക നടത്തിപ്പ്, ഡിജിറ്റൽ സാങ്കേതികവിദ്യ, സാമ്പത്തിക അച്ചടക്കം, ബ്രാൻഡിങ്, തൊഴിൽപരമായ പ്രാവീണ്യം എന്നിവ മെച്ചപ്പെടുത്താൻ എൻസിഡിസിയും ത്രിഭുവൻ സഹകാരി സർവകലാശാലയും തമ്മിലുണ്ടാക്കിയ കരാർ അഭിനന്ദനാർഹമായ നടപടിയാണെന്നും യോഗത്തിൽ വിലയിരുത്തി.

2025–26ലെ ഓഡിറ്റ് ചെയ്ത വാർഷിക കണക്കുകൾ, വാർഷിക റിപ്പോർട്ട്, സാമ്പത്തിക പ്രകടനം എന്നിവയും ജനറൽ കൗൺസിൽ പരിശോധിച്ചു. വരുംവർഷങ്ങളിലെ സാമ്പത്തിക പരിപാടികൾ, വിഭവസമാഹരണ സാധ്യതകൾ, സഹകരണ മേഖലയിലെ വർധിക്കുന്ന ധനസഹായ ആവശ്യങ്ങൾ എന്നിവ ചർച്ച ചെയ്തു. യോഗത്തിന്റെ കാര്യപരിപാടിയിലുണ്ടായിരുന്ന സാമ്പത്തിക നിർദേശങ്ങളും അമിത് ഷാ മുന്നോട്ടുവച്ച ഉയർന്ന വിതരണലക്ഷ്യങ്ങളും കണക്കിലെടുത്ത് ദീർഘകാല തന്ത്രത്തിന് പ്രത്യേക പ്രാധാന്യം നൽകി.

സാമ്പത്തിക നേട്ടങ്ങൾക്കും അറ്റ നിഷ്ക്രിയ ആസ്തി പൂജ്യമായി നിലനിർത്തിയതിനും സ്ഥാപനതലത്തിലുള്ള വിപുലീകരണത്തിനും എൻസിഡിസി ഉദ്യോഗസ്ഥരെയും ജനറൽ കൗൺസിൽ അംഗങ്ങളെയും ജീവനക്കാരെയും അഭിനന്ദിച്ചാണ് അമിത് ഷാ പ്രസംഗം അവസാനിപ്പിച്ചത്. പ്രവർത്തനപരിധിയും സാമ്പത്തിക ശേഷിയും പ്രൊഫഷണൽ നടത്തിപ്പും എൻസിഡിസി കൂടുതൽ ശക്തിപ്പെടുത്തുമെന്ന പ്രതീക്ഷ അദ്ദേഹം പങ്കുവച്ചു. ഗ്രാമീണ സമൃദ്ധി, തൊഴിൽ സൃഷ്ടി, സാമ്പത്തിക സ്വയംപര്യാപ്തത, എല്ലാവരെയും ഉൾക്കൊള്ളുന്ന ദേശീയ വികസനം എന്നിവയ്ക്കുള്ള ശക്തമായ മാർഗമായി സഹകരണത്തെ മാറ്റാൻ കോർപ്പറേഷൻ പ്രധാന പങ്കുവഹിക്കുമെന്നും അദ്ദേഹം പറഞ്ഞു.

.

…