ന്യൂഡൽഹി  / 2026   / ഒക്ടോബർ 29

സൂക്ഷ്മ, ചെറുകിട സംരംഭങ്ങൾക്ക് സർക്കാർ വാങ്ങലുകളിൽ പങ്കെടുക്കുന്നത് കൂടുതൽ എളുപ്പവും ചെലവുകുറഞ്ഞതുമാക്കാനുള്ള പരിഷ്കാരങ്ങൾ അവതരിപ്പിച്ച് ജെം സംവാദ് 2026. ഗവൺമെന്റ് ഇ മാർക്കറ്റ്‌പ്ലേസ് എന്ന ജെം, ലഘു ഉദ്യോഗ് ഭാരതിയുമായി ചേർന്നാണ് പരിപാടി സംഘടിപ്പിച്ചത്. ഇടപാട് നിരക്ക് കുറയ്ക്കൽ, നിരക്ക് ഇളവിന്റെ പരിധി ഉയർത്തൽ, നിർമാതാക്കളുടെ വിലയിരുത്തൽ ഫീസ് വെട്ടിക്കുറയ്ക്കൽ തുടങ്ങിയ മാറ്റങ്ങളാണ് പരിപാടിയിൽ എടുത്തുപറഞ്ഞത്. സംരംഭങ്ങൾക്ക് സർക്കാർ വിപണിയിലെ അവസരങ്ങൾ പ്രയോജനപ്പെടുത്താൻ സഹായിക്കുന്ന ജെം–ലഘു ഉദ്യോഗ് ഭാരതി സഹകരണത്തിന്റെ ഭാഗമായിരുന്നു പരിപാടി.

അവസരങ്ങൾ പരിചയപ്പെടുത്താൻ 108 ഓൺലൈൻ സമ്മേളനങ്ങൾ

2024ൽ ധാരണാപത്രത്തിലൂടെ ഔദ്യോഗികമാക്കിയ ഈ സഹകരണത്തിന്റെ ഭാഗമായി 108 ഓൺലൈൻ സമ്മേളനങ്ങൾ നടത്തി. ഇതിനുപുറമേ രാജ്യത്തിന്റെ വിവിധ ഭാഗങ്ങളിൽ നേരിട്ടുള്ള നിരവധി പരിപാടികളും സംഘടിപ്പിച്ചു. സൂക്ഷ്മ, ചെറുകിട, ഇടത്തരം സംരംഭങ്ങൾക്ക് ജെമ്മിനെക്കുറിച്ച് അവബോധം നൽകുക, ഓൺലൈൻ രജിസ്ട്രേഷന് സഹായിക്കുക, സംവിധാനത്തിന്റെ ഉപയോഗം പരിചയപ്പെടുത്തുക, സർക്കാർ വാങ്ങലുകളിലെ അവസരങ്ങളിലേക്ക് വഴിതുറക്കുക എന്നിവയായിരുന്നു ലക്ഷ്യം. പങ്കാളിത്തച്ചെലവ് കുറച്ചും നടപടികൾ ലളിതമാക്കിയും ധനസഹായം ലഭിക്കാനുള്ള അവസരം മെച്ചപ്പെടുത്തിയും ജെം സംരംഭങ്ങളെ സഹായിച്ചെന്ന് ചീഫ് എക്സിക്യൂട്ടീവ് ഓഫീസർ മിഹിർ കുമാർ പറഞ്ഞു. കൂടുതൽ ആത്മവിശ്വാസത്തോടെ സർക്കാർ വാങ്ങലുകളിൽ പങ്കെടുക്കാനും ആത്മനിർഭർ ഭാരത്, വികസിത ഭാരതം 2047 എന്നീ ലക്ഷ്യങ്ങളിൽ പങ്കാളികളാകാനും ഇതിലൂടെ കഴിയുമെന്നും അദ്ദേഹം വ്യക്തമാക്കി. വിശ്വസനീയരായ വിൽപ്പനക്കാരുടെ ശൃംഖല രൂപപ്പെടുത്താനും വ്യാപാരാവസരങ്ങൾ ഡിജിറ്റൽ സംവിധാനത്തിലൂടെ എല്ലാവർക്കും തുല്യമായി ലഭ്യമാക്കാനുമാണ് ജെം ശ്രമിക്കുന്നതെന്നും അദ്ദേഹം പറഞ്ഞു.

പത്ത് ലക്ഷം രൂപവരെയുള്ള ഓർഡറുകൾക്ക് ഇടപാട് നിരക്കില്ല

ഓർഡർ മൂല്യത്തിന്റെ 0.50 ശതമാനമായിരുന്ന ഇടപാട് നിരക്ക് ജെം 0.30 ശതമാനമാക്കി കുറച്ചു. ഇടപാട് നിരക്കിൽനിന്ന് ഒഴിവാക്കുന്ന ഓർഡറുകളുടെ പരിധി അഞ്ചുലക്ഷം രൂപയിൽനിന്ന് പത്തുലക്ഷം രൂപയായി ഉയർത്തി. പത്തുകോടി രൂപയ്ക്കുമുകളിലുള്ള ഓർഡറുകൾക്ക് പരമാവധി ഇടപാട് നിരക്ക് മൂന്നുലക്ഷം രൂപയാണ്. നേരത്തേ ഇത് 72.50 ലക്ഷം രൂപവരെയായിരുന്നു. ജെമ്മിലെ ഏകദേശം 97 ശതമാനം ഓർഡറുകൾക്കും ഇടപാട് നിരക്കില്ല. രജിസ്ട്രേഷൻ നടപടിയുടെ ഭാഗമായി കരുതൽ നിക്ഷേപം നൽകണമെന്ന നിബന്ധനയും 2025 ജൂലൈയിൽ ഒഴിവാക്കി. കൂടാതെ, യഥാർഥ ഉപകരണ നിർമാതാക്കൾക്ക് ബാധകമായ വിതരണക്കാരുടെ വിലയിരുത്തൽ ഫീസിൽ 2024 ജനുവരി മുതൽ 66 മുതൽ 92 ശതമാനംവരെ കുറവുവരുത്തിയിട്ടുണ്ട്.

പ്രവർത്തന മൂലധനത്തിനും സമയബന്ധിത പണമടയ്ക്കലിനും പിന്തുണ

ലഘു ഉദ്യോഗ് ഭാരതി പ്രസിഡന്റ് മധുസൂദൻ ദാദു, ദേശീയ ജനറൽ സെക്രട്ടറി ഓം പ്രകാശ് ഗുപ്ത, ദേശീയ ട്രഷററും ജെം നോഡൽ ചുമതലക്കാരനുമായ ജനക് ഭാട്ടിയ, ജെം അഡീഷണൽ ചീഫ് എക്സിക്യൂട്ടീവ് ഓഫീസർ അജിത് ബി. ചവാൻ എന്നിവർ ചർച്ചകളിൽ പങ്കെടുത്തു. പരിപാടിക്കെത്തിയ സൂക്ഷ്മ, ചെറുകിട, ഇടത്തരം സംരംഭകരുമായി ഇവർ ആശയവിനിമയവും നടത്തി. കേന്ദ്ര ബജറ്റ് 2026–27ലെ പ്രഖ്യാപനത്തിന് അനുസൃതമായി, വ്യാപാരത്തിൽ ലഭിക്കാനുള്ള തുകയെ അടിസ്ഥാനമാക്കി നേരത്തേ ധനസഹായം നേടാൻ സഹായിക്കുന്ന ട്രേഡ് റിസീവബിൾസ് ഡിസ്കൗണ്ടിങ് സിസ്റ്റത്തിലെ അഞ്ച് എക്സ്ചേഞ്ചുകളുമായും ജെമ്മിനെ ബന്ധിപ്പിച്ചതായി അജിത് ബി. ചവാൻ പറഞ്ഞു. ജെമ്മിലെ വാങ്ങൽ ഓർഡറുകളുടെ അടിസ്ഥാനത്തിൽ ഈടില്ലാതെ വായ്പ നൽകുന്ന ജെം സഹായ് സംവിധാനത്തിനൊപ്പം ഈ സൗകര്യവും ലഭിക്കുന്നത് സംരംഭങ്ങളുടെ പ്രവർത്തന മൂലധനപ്രശ്നങ്ങൾക്കും സമയബന്ധിതമായി പണം ലഭിക്കുന്നതിലെ വെല്ലുവിളികൾക്കും പരിഹാരം കാണാൻ ഏറെ സഹായിക്കുമെന്നും അദ്ദേഹം വ്യക്തമാക്കി.

രാജ്യവ്യാപകമായി സഹായ കൗണ്ടറുകൾ ഒരുക്കും

ജെമ്മുമായുള്ള സഹകരണം കൂടുതൽ ശക്തമാക്കാനുള്ള പദ്ധതികൾ മധുസൂദൻ ദാദുവും ഓം പ്രകാശ് ഗുപ്തയും വിശദീകരിച്ചു. ലഘു ഉദ്യോഗ് ഭാരതിയുടെ രാജ്യവ്യാപകമായ ഓഫീസ് ശൃംഖലയിലൂടെ കൂടുതൽ സൂക്ഷ്മ, ചെറുകിട, ഇടത്തരം സംരംഭങ്ങളിലേക്ക് എത്തുകയാണ് ലക്ഷ്യം. എല്ലാ ആഴ്ചയും പതിവായി ജെം–ലഘു ഉദ്യോഗ് ഭാരതി ഓൺലൈൻ സമ്മേളനങ്ങൾ സംഘടിപ്പിക്കും. വിവിധ ഓഫീസുകളിൽ പ്രത്യേക സഹായ കൗണ്ടറുകളും ഒരുക്കും. പരിശീലനം ലഭിച്ച സന്നദ്ധപ്രവർത്തകരാണ് ഈ കൗണ്ടറുകളിൽ സേവനം നൽകുക.

.