ന്യൂഡൽഹി  / 2026   / ഒക്ടോബർ 29

ഇന്ത്യയുടെ കയറ്റുമതി മത്സരശേഷി വർധിപ്പിക്കാനും കൂടുതൽ വിപണികളിലേക്ക് കടന്നുചെല്ലാനുമുള്ള നടപടികൾ വിലയിരുത്തി കേന്ദ്ര വാണിജ്യ വ്യവസായ മന്ത്രി പീയൂഷ് ഗോയൽ. ഒക്ടോബർ 28ന് ന്യൂഡൽഹിയിൽ കയറ്റുമതി പ്രോത്സാഹന കൗൺസിൽ പ്രതിനിധികളുമായി അദ്ദേഹം ചർച്ച നടത്തി. നിലവിലെ കയറ്റുമതി സാഹചര്യം, രാജ്യാന്തര വ്യാപാരത്തിൽ ഉയർന്നുവരുന്ന അവസരങ്ങൾ, കയറ്റുമതിക്കാർ നേരിടുന്ന വെല്ലുവിളികൾ എന്നിവ യോഗത്തിൽ പരിശോധിച്ചു. ആഗോള വ്യാപാരരംഗം മാറുന്ന പശ്ചാത്തലത്തിലായിരുന്നു ചർച്ച. ഭൂരാഷ്ട്രീയ അനിശ്ചിതത്വങ്ങൾ, ഇറക്കുമതിത്തീരുവയിലെ മാറ്റങ്ങൾ, വിതരണശൃംഖലകളുടെ പുനഃക്രമീകരണം, പ്രധാന വിദേശവിപണികളിലെ പുതിയ നിയന്ത്രണങ്ങൾ എന്നിവ മന്ത്രി ചൂണ്ടിക്കാട്ടി. ഇവ കയറ്റുമതിക്കാർക്ക് വെല്ലുവിളികളാണ്. അതേസമയം, വിശ്വസനീയവും മത്സരശേഷിയുള്ളതുമായ ആഗോള വ്യാപാരപങ്കാളിയായി ഇന്ത്യയുടെ സ്ഥാനം ശക്തിപ്പെടുത്താനുള്ള അവസരങ്ങളുമാണെന്ന് അദ്ദേഹം പറഞ്ഞു.

ഗുണമേന്മയും വിദേശ വ്യാപാരബന്ധങ്ങളും ശക്തമാക്കണം

രാജ്യാന്തര വ്യാപാരരംഗത്തെ മാറ്റങ്ങളോട് ഇന്ത്യൻ വ്യവസായങ്ങൾ വേഗത്തിൽ പ്രതികരിക്കണമെന്ന് ഗോയൽ ആവശ്യപ്പെട്ടു. ഉൽപ്പന്നങ്ങളുടെ ഗുണമേന്മ, പുതുമ, ചെലവിലെ മത്സരശേഷി, മുടക്കമില്ലാത്ത വിശ്വസനീയ വിതരണം, രാജ്യാന്തര മാനദണ്ഡങ്ങൾ പാലിക്കൽ എന്നിവയിൽ കയറ്റുമതിക്കാർ ശ്രദ്ധിക്കണം. ആഗോള മൂല്യശൃംഖലകളിൽ ഇന്ത്യയുടെ പങ്കാളിത്തം വർധിപ്പിക്കാൻ ഇത് സഹായിക്കും. ജർമനിയും നെതർലൻഡ്‌സും ഉൾപ്പെടെയുള്ള രാജ്യങ്ങളിൽ അടുത്തിടെ നടത്തിയ സന്ദർശനങ്ങളിലെ അനുഭവങ്ങളും മന്ത്രി പങ്കുവച്ചു. ഉൽപ്പാദനത്തിനും ഉൽപ്പന്നങ്ങൾ വാങ്ങുന്നതിനും നിക്ഷേപത്തിനുമുള്ള കേന്ദ്രമെന്ന നിലയിൽ ഇന്ത്യയോടുള്ള താൽപ്പര്യം വർധിക്കുകയാണെന്ന് അദ്ദേഹം പറഞ്ഞു. ഇന്ത്യൻ വ്യവസായങ്ങളും വിദേശ സ്ഥാപനങ്ങളും തുടർച്ചയായി ബന്ധപ്പെടണം. ഇത്തരം കൂടിക്കാഴ്ചകൾ വ്യക്തമായ വ്യാപാരനേട്ടങ്ങളിലേക്ക് എത്തിക്കണം. വിദേശത്തെ സമാന സംഘടനകളുമായി കൗൺസിലുകൾ സജീവമായി ബന്ധപ്പെടണം. ഉൽപ്പന്നങ്ങൾ വാങ്ങാൻ സാധ്യതയുള്ളവരെ കണ്ടെത്തുകയും നിലവിലുള്ളതും പുതുതായി വളരുന്നതുമായ വിപണികളിൽ വ്യാപാരപങ്കാളിത്തങ്ങൾ ഒരുക്കുകയും വേണം.

വ്യാപാരക്കരാറുകൾ കൂടുതൽ കയറ്റുമതിക്ക് വഴിയൊരുക്കണം

ഇന്ത്യയുടെ സ്വതന്ത്ര വ്യാപാരക്കരാറുകളും സാമ്പത്തിക പങ്കാളിത്തങ്ങളും വ്യാപിക്കുന്നതിലൂടെ ലഭിക്കുന്ന അവസരങ്ങൾ ഫലപ്രദമായി ഉപയോഗിക്കണമെന്ന് മന്ത്രി പറഞ്ഞു. ഈ കരാറുകളിലൂടെ ലഭിക്കുന്ന പ്രത്യേക വിപണിപ്രവേശന ആനുകൂല്യങ്ങൾ കയറ്റുമതി വർധനയിലേക്ക് നയിക്കണം. വിദേശവിപണികളിൽ കൂടുതൽ ഇടം നേടാനും കൂടുതൽ ഇന്ത്യൻ സംരംഭങ്ങളെ രാജ്യാന്തര വ്യാപാരത്തിലേക്ക് കൊണ്ടുവരാനും കഴിയണം. പങ്കാളി രാജ്യങ്ങളിലെ കയറ്റുമതി അവസരങ്ങൾ കൗൺസിലുകൾ മേഖല തിരിച്ച് വിലയിരുത്തണം. ലഭ്യമായ വ്യാപാര ആനുകൂല്യങ്ങൾ, പാലിക്കേണ്ട മാനദണ്ഡങ്ങൾ, വിപണികളുടെ ആവശ്യങ്ങൾ എന്നിവയെക്കുറിച്ച് കയറ്റുമതിക്കാർക്ക് കൂടുതൽ അവബോധം നൽകണം. ആഗോള ആവശ്യകതയിലെ മാറ്റങ്ങളും വിതരണശൃംഖലകളിലെ പുതിയ അവസരങ്ങളും കണക്കിലെടുത്ത് ഉൽപ്പന്നങ്ങളിലും വിപണികളിലും വൈവിധ്യം കൊണ്ടുവരണം. ഇതുവരെ പൂർണമായി പ്രയോജനപ്പെടുത്താത്ത കയറ്റുമതി സാധ്യതയുള്ള ഉൽപ്പന്നങ്ങൾ കണ്ടെത്തണം. പുതിയ വിപണികൾ തേടുകയും ഓരോ വിപണിക്കും അനുയോജ്യമായ തന്ത്രങ്ങൾ തയ്യാറാക്കുകയും വേണം. നിലവിലുള്ള മേഖലകളിലെ ഇന്ത്യയുടെ മത്സരനേട്ടങ്ങൾ ഉറപ്പിക്കുന്നതിനൊപ്പം പുതിയ മേഖലകളിൽ ശേഷി വളർത്തണമെന്നും ഗോയൽ പറഞ്ഞു.

ചെറുകിട സംരംഭങ്ങൾക്ക് കൂടുതൽ കൈത്താങ്ങ്

കയറ്റുമതി സുഗമമാക്കാൻ സർക്കാർ പ്രതിജ്ഞാബദ്ധമാണെന്ന് മന്ത്രി ആവർത്തിച്ചു. ബിസിനസ് നടത്തുന്നത് എളുപ്പമാക്കാനും വ്യാപാര അടിസ്ഥാനസൗകര്യങ്ങൾ ശക്തിപ്പെടുത്താനും കയറ്റുമതി സ്ഥാപനങ്ങളുടെ പ്രശ്നങ്ങൾ പരിഹരിക്കാനുമുള്ള ശ്രമങ്ങൾ തുടരുകയാണ്. കയറ്റുമതിക്കാവശ്യമായ ധനസഹായം, വിപണിപ്രവേശനം, രാജ്യാന്തര മത്സരശേഷി എന്നിവയിലെ തടസ്സങ്ങൾ പരിഹരിക്കുന്നതിനുള്ള പ്രധാന നടപടിയാണ് കയറ്റുമതി പ്രോത്സാഹന ദൗത്യമെന്ന് അദ്ദേഹം പറഞ്ഞു. പ്രത്യേകിച്ച് സൂക്ഷ്മ, ചെറുകിട, ഇടത്തരം സംരംഭങ്ങൾക്ക് ഇത് പ്രധാനമാണ്. ഇന്ത്യയുടെ കയറ്റുമതി സംവിധാനത്തിൽ ഈ സംരംഭങ്ങൾ നൽകുന്ന സംഭാവനയും മന്ത്രി എടുത്തുപറഞ്ഞു. ചെറുസംരംഭങ്ങൾ, സ്റ്റാർട്ടപ്പുകൾ, പുതിയ കയറ്റുമതിക്കാർ, വളർന്നുവരുന്ന കയറ്റുമതി കേന്ദ്രങ്ങളിലെയും ജില്ലകളിലെയും സ്ഥാപനങ്ങൾ എന്നിവയിലേക്ക് കൗൺസിലുകൾ കൂടുതൽ എത്തണം. ഇവർക്ക് പ്രായോഗിക സഹായവും മാർഗനിർദേശവും നൽകണം. വിപണിവിവരങ്ങൾ കൂടുതൽ എളുപ്പത്തിൽ ലഭ്യമാക്കുകയും ആഗോള വിപണികളുമായുള്ള ബന്ധം ശക്തമാക്കുകയും വേണം.

കണക്കുകളുടെ അടിസ്ഥാനത്തിൽ പ്രവർത്തനം, കൂട്ടായ മുന്നേറ്റത്തിന് ആഹ്വാനം

കയറ്റുമതി പ്രോത്സാഹന പ്രവർത്തനങ്ങൾ കൂടുതൽ കണക്കുകളെ അടിസ്ഥാനമാക്കിയുള്ളതും വ്യക്തമായ ഫലങ്ങൾ ലക്ഷ്യമിടുന്നതുമാകണമെന്ന് ഗോയൽ നിർദേശിച്ചു. വിപണിവിവരങ്ങൾ സമയത്ത് ലഭ്യമാക്കണം. ഓരോ മേഖലയിലെയും അവസരങ്ങൾ കണ്ടെത്തണം. രാജ്യാന്തര വ്യാപാരത്തിലെ പ്രവണതകൾ നിരീക്ഷിക്കുകയും പ്രവർത്തനതടസ്സങ്ങൾ പരിഹരിക്കുകയും വേണം. കയറ്റുമതി പ്രോത്സാഹന കൗൺസിലുകൾ, വ്യവസായ സംഘടനകൾ, സംസ്ഥാന സർക്കാരുകൾ, വിദേശ വ്യാപാര ഡയറക്ടറേറ്റ് ജനറലിന്റെ പ്രാദേശിക ഓഫീസുകൾ എന്നിവ തമ്മിൽ സഹകരണം വർധിപ്പിക്കണമെന്നും മന്ത്രി പറഞ്ഞു. രാജ്യാന്തര വ്യാപാരസാഹചര്യത്തെക്കുറിച്ചുള്ള അഭിപ്രായങ്ങൾ കൗൺസിൽ പ്രതിനിധികളും പങ്കുവച്ചു. കയറ്റുമതി മത്സരശേഷി, വിപണിപ്രവേശനം, ചരക്കുനീക്കവും അനുബന്ധ സൗകര്യങ്ങളും, നിയന്ത്രണങ്ങൾ പാലിക്കൽ, വ്യാപാരം സുഗമമാക്കൽ എന്നിവയിലെ മേഖലാടിസ്ഥാനത്തിലുള്ള പ്രശ്നങ്ങളും അവർ അവതരിപ്പിച്ചു. കയറ്റുമതിക്കാരുടെ ആശങ്കകൾ പരിഹരിക്കാനും സർക്കാരും വ്യവസായങ്ങളും തമ്മിലുള്ള ഏകോപനം ശക്തിപ്പെടുത്താനുമുള്ള അഭിപ്രായങ്ങൾ ചർച്ചയിൽ കൈമാറി. വ്യവസായരംഗത്തെ ബന്ധപ്പെട്ടവരുമായി പതിവായി ആശയവിനിമയം തുടരുമെന്ന് മന്ത്രി ഉറപ്പുനൽകി. ഇന്ത്യൻ ഉൽപ്പന്നങ്ങൾക്കും സേവനങ്ങൾക്കും ആഗോള മത്സരശേഷി നേടിക്കൊടുക്കാനും വിശ്വസനീയ വ്യാപാരപങ്കാളിയെന്ന ഇന്ത്യയുടെ പേര് ശക്തിപ്പെടുത്താനും കൂട്ടായ ശ്രമം വേണമെന്ന് അദ്ദേഹം പറഞ്ഞു. ഇന്ത്യയുടെ കയറ്റുമതി സാന്നിധ്യം വിപുലീകരിക്കാനും പുതിയ ആഗോള അവസരങ്ങൾ പ്രയോജനപ്പെടുത്താനും സുസ്ഥിരവും വിശാലമായ പങ്കാളിത്തമുള്ളതുമായ കയറ്റുമതി വളർച്ച കൈവരിക്കാനും ഒരുമിച്ച് പ്രവർത്തിക്കുമെന്ന സർക്കാരിന്റെയും കൗൺസിലുകളുടെയും പ്രതിബദ്ധത കൂടിക്കാഴ്ചയിൽ പ്രതിഫലിച്ചു.

.