കാർവാർ  / 2026  / ഒക്ടോബർ 17

കാർവാർ നാവികത്താവളത്തിൽ പ്രോജക്ട് സീബേർഡിന്റെ രണ്ടാംഘട്ടത്തിലെ എ വിഭാഗത്തിൽ പൂർത്തിയാക്കിയ താമസസൗകര്യങ്ങളും സ്റ്റേഷൻ ഹെൽത്ത് ഓർഗനൈസേഷൻ സമുച്ചയവും ഉദ്ഘാടനം ചെയ്തു. പശ്ചിമ നാവിക കമാൻഡ് മേധാവി വൈസ് അഡ്മിറൽ സഞ്ജയ് വത്സ്യായൻ ഒക്ടോബർ 15നാണ് ഉദ്ഘാടനം നിർവഹിച്ചത്. നാവികസേനയിലെ സിവിലിയൻ പ്രതിരോധ ജീവനക്കാർക്കുള്ള വീടുകൾക്കൊപ്പം അടിസ്ഥാന സേവനങ്ങളും പ്രവേശന സൗകര്യങ്ങളും തുറന്നു. സീബേർഡ് ഡയറക്ടർ ജനറൽ വൈസ് അഡ്മിറൽ വിവേക് ദഹിയയും മറ്റ് മുതിർന്ന ഉദ്യോഗസ്ഥരും ചടങ്ങിൽ പങ്കെടുത്തു.

അഞ്ച് ടവറുകളിലായി 300 വീടുകൾ

നാവികസേനയിലെ സിവിലിയൻ പ്രതിരോധ ജീവനക്കാർക്കായി അഞ്ച് ടവറുകളിലായി 300 വീടുകളാണ് ഒരുക്കിയത്. നിലവിലുള്ള ഐഎൻഎച്ച്എസ് പതഞ്ജലി ആശുപത്രിയുടെ കിടക്കശേഷി 409 ആയി ഉയർത്തുന്ന വികസനത്തിന്റെ ഭാഗമായാണ് സ്റ്റേഷൻ ഹെൽത്ത് ഓർഗനൈസേഷൻ സമുച്ചയവും സജ്ജമാക്കിയത്. ഈ സൗകര്യങ്ങൾക്ക് അനുബന്ധമായി മലമുകളിൽ രണ്ടു ലക്ഷം ലിറ്റർ ശേഷിയുള്ള ജലസംഭരണിയും മലിനജല ശുദ്ധീകരണ പ്ലാന്റും ഒരുക്കിയിട്ടുണ്ട്.

നാലുവരി പ്രവേശനപാതയും മാലിന്യ സംസ്കരണ കേന്ദ്രവും

കാർവാർ നാവികത്താവളം വളരുന്നതിനൊപ്പം പരിസരശുചിത്വം ഉറപ്പാക്കാനും സുഗമമായ യാത്രാസൗകര്യം വർധിപ്പിക്കാനും കൂടുതൽ സംവിധാനങ്ങൾ ആവശ്യമാണ്. ഇതിന്റെ ഭാഗമായി ആധുനിക സംയോജിത ഖരമാലിന്യ സംസ്കരണ കേന്ദ്രവും പ്രവേശന കവാടവും പാലം ഉൾപ്പെടെയുള്ള അനുബന്ധ സൗകര്യങ്ങളും ഉദ്ഘാടനം ചെയ്തു. നാലുവരിയായി വാഹനങ്ങൾക്ക് സഞ്ചരിക്കാവുന്ന സംവിധാനത്തിനൊപ്പം കാൽനടയാത്രക്കാർക്കും സൈക്കിൾ യാത്രക്കാർക്കും പ്രത്യേകം പാതകളുമുണ്ട്.

വ്യോമതാവളവും കപ്പൽശാലയും പദ്ധതിയുടെ ഭാഗം

പ്രോജക്ട് സീബേർഡിന്റെ പുരോഗമിക്കുന്ന രണ്ടാംഘട്ടത്തിലെ എ വിഭാഗത്തിന്റെ ഭാഗമാണ് ഈ വികസന പ്രവർത്തനങ്ങൾ. സൈനിക ആവശ്യങ്ങൾക്കും സിവിലിയൻ ആവശ്യങ്ങൾക്കും ഉപയോഗിക്കാവുന്ന നാവിക വ്യോമതാവളം, പൂർണസജ്ജമായ നാവിക കപ്പൽശാല, കപ്പലുകൾക്കും വിമാനങ്ങൾക്കുമുള്ള ചരക്കുനീക്ക–വിതരണ സൗകര്യങ്ങൾ എന്നിവയുടെ നിർമാണവും ഈ ഘട്ടത്തിൽ ഉൾപ്പെടുന്നു. ഏകദേശം 10,000 സൈനിക, സിവിലിയൻ ജീവനക്കാരും അവരുടെ കുടുംബങ്ങളും താമസിക്കുന്ന നാവികത്താവളം പ്രാദേശിക സമ്പദ്‌വ്യവസ്ഥയ്ക്കും വ്യവസായത്തിനും വിനോദസഞ്ചാരത്തിനും വലിയ കരുത്താകും. ഉത്തര കന്നഡ മേഖലയിൽ നിരവധി നേരിട്ടും പരോക്ഷവുമായ തൊഴിലവസരങ്ങളും സൃഷ്ടിക്കും.

സാധനസാമഗ്രികളിൽ 90 ശതമാനത്തിലധികം രാജ്യത്തുനിന്ന്

കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രാലയത്തിന്റെയും ഇന്ത്യൻ ഗ്രീൻ ബിൽഡിങ് കൗൺസിലിന്റെയും നിലവിലുള്ള മാനദണ്ഡങ്ങൾ പാലിച്ചാണ് പദ്ധതി നടപ്പാക്കുന്നത്. പൂർത്തിയാകുമ്പോൾ ഇന്ത്യൻ ഗ്രീൻ ബിൽഡിങ് കൗൺസിലിന്റെ ഗോൾഡ് റേറ്റിങ് ലഭിക്കുന്ന നിലവാരത്തിലാണ് പദ്ധതി ഒരുക്കുന്നത്. ആത്മനിർഭർ ഭാരത് ആശയത്തിന് അനുസൃതമായി നിർമാണസാമഗ്രികളുടെയും ഉപകരണങ്ങളുടെയും 90 ശതമാനത്തിലധികം രാജ്യത്തിനകത്തുനിന്നാണ് കണ്ടെത്തുന്നത്.

.