റാഞ്ചി, 2026 ഒക്ടോബർ 15 –

ജാർഖണ്ഡിലെ റാഞ്ചി ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജിയിൽ 19 വയസ്സുകാരനായ വിദ്യാർഥിയെ ഹോസ്റ്റൽ മുറിയിൽ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ ഗുരുതര ആരോപണങ്ങളുമായി കുടുംബവും സഹപാഠികളും. ബിഹാർ സ്വദേശിയും ഒന്നാംവർഷ വിദ്യാർഥിയുമായ ആദിത്യ കുമാറിനെയാണ് ഒക്ടോബർ 10ന് റാഞ്ചിയിലെ ഖിൽഗാവ് ക്യാമ്പസിലെ ഹോസ്റ്റൽ മുറിയിൽ കണ്ടെത്തിയത്. വിദ്യാർഥിയെ ആശുപത്രിയിലെത്തിക്കുന്നതിൽ കോളേജ് അധികൃതർക്ക് ഗുരുതര വീഴ്ചയുണ്ടായെന്നാണ് സഹപാഠികളുടെ ആരോപണം. സംഭവത്തിൽ കേന്ദ്ര വിദ്യാഭ്യാസ മന്ത്രാലയം മൂന്നംഗ അന്വേഷണ സമിതിയെ നിയോഗിച്ചു. അന്വേഷണം പൂർത്തിയാകുന്നതുവരെ സ്ഥാപനത്തിന്റെ ഡയറക്ടർ രാജീവ് ശ്രീവാസ്തവയെ ഒരു മാസത്തെ അവധിയിൽ പ്രവേശിപ്പിച്ചു. പോസ്റ്റ്മോർട്ടം റിപ്പോർട്ട് പ്രകാരം മരണം ആത്മഹത്യയാണെന്നാണ് പൊലീസ് പറയുന്നത്. എന്നാൽ മരണത്തിലെ ദുരൂഹത അന്വേഷിക്കണമെന്നാണ് കുടുംബത്തിന്റെ ആവശ്യം.

വൈദ്യുതിയില്ല, ആംബുലൻസിൽ ഓക്സിജനില്ല; ഗുരുതര ആരോപണങ്ങൾ

ഒക്ടോബർ 10ന് രാത്രി പത്ത് മണിക്ക് ശേഷമാണ് ആദിത്യ ഹോസ്റ്റൽ മുറിയിലേക്ക് പോയതെന്നാണ് സഹപാഠികൾ പറയുന്നത്. പിന്നീട് പലതവണ വാതിലിൽ മുട്ടിയിട്ടും പ്രതികരണമുണ്ടായില്ല. തുടർന്ന് വാതിൽ തകർത്ത് അകത്തുകയറിയപ്പോഴാണ് വിദ്യാർഥിയെ തൂങ്ങിയ നിലയിൽ കണ്ടെത്തിയത്. ആ സമയത്ത് ആദിത്യയ്ക്ക് നേരിയ തോതിൽ നാഡിമിടിപ്പുണ്ടായിരുന്നുവെന്നാണ് ഒരു വിദ്യാർഥിയുടെ വെളിപ്പെടുത്തൽ. ഹോസ്റ്റലിൽ വൈദ്യുതി ഇല്ലാത്തതിനാൽ ലിഫ്റ്റും പ്രവർത്തിച്ചിരുന്നില്ല. ഇതോടെ വിദ്യാർഥിയെ പടികളിലൂടെ താഴെയെത്തിക്കേണ്ടിവന്നു. ക്യാമ്പസിൽ ആംബുലൻസ് ഉണ്ടായിരുന്നെങ്കിലും ഡ്രൈവറെയും താക്കോലും കണ്ടെത്താൻ അധികൃതർ ബുദ്ധിമുട്ടിയെന്നാണ് സഹപാഠിയായ രത്തൻ തിവാരിയുടെ ആരോപണം. ആംബുലൻസിൽ ഓക്സിജൻ സിലിണ്ടറും ഉണ്ടായിരുന്നില്ലെന്നും അദ്ദേഹം പറഞ്ഞു. പ്രാഥമിക ജീവൻരക്ഷാ നടപടിയായ സിപിആർ നൽകാൻ ഹോസ്റ്റൽ ജീവനക്കാർ തടസ്സം സൃഷ്ടിച്ചതായും മറ്റൊരു വിദ്യാർഥി ആരോപിച്ചു. പിന്നീട് സ്വകാര്യ ആശുപത്രിയിലെത്തിച്ചെങ്കിലും ആദിത്യ മരിച്ചതായി ഡോക്ടർമാർ സ്ഥിരീകരിച്ചു.

മരണത്തിന് മണിക്കൂറുകൾ മുമ്പ് വീട്ടിലേക്ക് വിളിച്ചു

ബിഹാറിലെ പൂർണിയ ജില്ലക്കാരനായ ആദിത്യയുടെ പിതാവ് വൈഷ്ണവ് ദേവ് കുമാർ ബിഹാർ പൊലീസിലെ സബ് ഇൻസ്പെക്ടറാണ്. മരണത്തിന് മുമ്പ് രാത്രി ഒമ്പതരയ്ക്കും പത്തിനുമിടയിൽ മകൻ വീഡിയോ കോളിലൂടെ സംസാരിച്ചിരുന്നതായി അദ്ദേഹം പറഞ്ഞു. അത്താഴത്തിന് ബിരിയാണി കഴിച്ചെന്നും ബുദ്ധിമുട്ടുകളൊന്നുമില്ലെന്നും ആദിത്യ പറഞ്ഞിരുന്നു. ഒക്ടോബർ 18ന് വീട്ടിലേക്ക് വരാൻ ടിക്കറ്റ് ബുക്ക് ചെയ്തതായും അറിയിച്ചു. എന്നാൽ മണിക്കൂറുകൾക്കുശേഷം മകന്റെ മരണവാർത്തയാണ് കുടുംബത്തെ തേടിയെത്തിയത്. മരണത്തിൽ ദുരൂഹതയുണ്ടെന്നും കേസ് രജിസ്റ്റർ ചെയ്യുന്നതിൽ തടസ്സമുണ്ടായെന്നും പിതാവ് ആരോപിച്ചു. പരാതിയിൽനിന്ന് ഡയറക്ടറുടെ പേര് ഒഴിവാക്കാൻ പൊലീസ് ആവശ്യപ്പെട്ടതായും അദ്ദേഹം പറഞ്ഞു. എന്നാൽ പരാതിയിൽ മാറ്റം വരുത്തിയിട്ടില്ലെന്നാണ് പൊലീസിന്റെ വിശദീകരണം. നിലവിൽ അസ്വാഭാവിക മരണത്തിനാണ് കേസെടുത്തിരിക്കുന്നത്. അന്വേഷണത്തിൽ കോളേജ് അധികൃതരുടെ കുറ്റകരമായ പങ്ക് കണ്ടെത്തിയാൽ എഫ്ഐആർ രജിസ്റ്റർ ചെയ്യുമെന്ന് ഖിൽഗാവ് പൊലീസ് സ്റ്റേഷൻ ചുമതലയുള്ള നിർഭയ് കുമാർ അറിയിച്ചു.

അന്വേഷണത്തിന് രണ്ടാഴ്ച; ഡയറക്ടർ അവധിയിൽ

ഒക്ടോബർ 12നാണ് കേന്ദ്ര വിദ്യാഭ്യാസ മന്ത്രാലയം അന്വേഷണത്തിന് ഉത്തരവിട്ടത്. ഡൽഹി സർവകലാശാല സൗത്ത് ക്യാമ്പസ് ഡയറക്ടർ രജനി അബ്ബിയുടെ നേതൃത്വത്തിലുള്ള മൂന്നംഗ സമിതി രണ്ടാഴ്ചയ്ക്കകം റിപ്പോർട്ട് സമർപ്പിക്കണം. ഉന്നത വിദ്യാഭ്യാസ സ്ഥാപനങ്ങളിൽ വിദ്യാർഥികളുടെ മാനസികാരോഗ്യവും ക്ഷേമവും ഉറപ്പാക്കാനുള്ള മാർഗനിർദേശങ്ങൾ എത്രത്തോളം പാലിച്ചുവെന്നും പരിശോധിക്കും. ദേശീയ മനുഷ്യാവകാശ കമ്മീഷനും സംഭവത്തിൽ ഇടപെട്ടിട്ടുണ്ട്. ഡയറക്ടർ രാജീവ് ശ്രീവാസ്തവയുടെ രാജി ആവശ്യപ്പെട്ട് വിദ്യാർഥികൾ നടത്തിയ പ്രതിഷേധം അന്വേഷണം തുടരുന്ന സാഹചര്യത്തിൽ അവസാനിപ്പിച്ചു. ഷിബ്പൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് എൻജിനീയറിങ് സയൻസ് ആൻഡ് ടെക്നോളജി ഡയറക്ടർ വി.എം.എസ്.ആർ. മൂർത്തിക്ക് സ്ഥാപനത്തിന്റെ അധികചുമതല നൽകി. അന്വേഷണത്തിൽ വീഴ്ച കണ്ടെത്തിയാൽ ഉത്തരവാദികൾക്കെതിരെ നടപടിയുണ്ടാകുമെന്ന് ഡയറക്ടർ വ്യക്തമാക്കി. അതേസമയം, അന്വേഷണത്തിൽ തൃപ്തിയില്ലെന്നും നീതി തേടി കോടതിയെ സമീപിച്ചേക്കുമെന്നും ആദിത്യയുടെ പിതാവ് അറിയിച്ചു.