തൃശൂർ: സെപ്റ്റംബർ 13

തൃപ്രയാറിൽ ജിംനേഷ്യത്തിന്റെയും ബ്യൂട്ടി പാർലറിന്റെയും മറവിൽ ലഹരിമരുന്ന് വിൽപ്പന നടത്തിയ കേസിൽ രണ്ടുപേർ കൂടി അറസ്റ്റിൽ. പുഴുവിൽ കുറുമ്പിലാവ് വില്ലേജ് കോട്ടം സ്വദേശി കളരിക്കൽ വീട്ടിൽ ശരത് കുമാർ (33), ഇരിങ്ങാലക്കുട മാപ്രാണം മാടായിക്കോണം സ്വദേശി അമ്പാട്ട് വീട്ടിൽ വൈശാഖ് (32) എന്നിവരെയാണ് വലപ്പാട് പോലീസ് അറസ്റ്റ് ചെയ്തത്.

കഴിഞ്ഞ മാർച്ച് 23ന് കേസിൽ യുവതി അറസ്റ്റിലായതിനെ തുടർന്നുള്ള അന്വേഷണത്തിലാണ് കൂടുതൽ പ്രതികളിലേക്ക് പോലീസ് എത്തിയത്. പെരിങ്ങോട്ടുകര താന്ന്യം സ്വദേശി ചിറയത്ത് വീട്ടിൽ ശ്രീലക്ഷ്മി (30)യെ കരയാമുട്ടം സൊസൈറ്റിക്ക് സമീപത്തെ വാടകവീട്ടിൽ നിന്നാണ് അന്ന് തൃശൂർ റൂറൽ ഡാൻസാഫ് സംഘവും വലപ്പാട് പോലീസും ചേർന്ന് പിടികൂടിയത്.

രണ്ട് കിലോ ഹാഷിഷ് ഓയിൽ പിടികൂടി

ശ്രീലക്ഷ്മിയുടെ പക്കൽ നിന്ന് രണ്ട് കിലോഗ്രാം ഹാഷിഷ് ഓയിൽ, ലഹരിമരുന്ന് വിൽപ്പനയിലൂടെ അനധികൃതമായി സമ്പാദിച്ച 90,500 രൂപ, ഹാഷിഷ് ഓയിൽ ചെറിയ അളവിൽ വിൽക്കാൻ ഉപയോഗിച്ചിരുന്ന 50 ഒഴിഞ്ഞ പ്ലാസ്റ്റിക് കുപ്പികൾ എന്നിവയും പിടികൂടിയിരുന്നു.

ജിംനേഷ്യത്തിന്റെയും ബ്യൂട്ടി സലൂണിന്റെയും മറവിൽ വൻതോതിൽ ലഹരിമരുന്ന് വിൽപ്പന നടത്തിയെന്ന കേസിലായിരുന്നു ശ്രീലക്ഷ്മിയുടെ അറസ്റ്റ്.

ലഹരിയെത്തിച്ചത് ശരത് കുമാറെന്ന് കണ്ടെത്തൽ

തുടർന്ന് നടത്തിയ അന്വേഷണത്തിലാണ് ശ്രീലക്ഷ്മിക്ക് ഹാഷിഷ് ഓയിൽ എത്തിച്ചിരുന്നത് ശരത് കുമാറാണെന്ന് പോലീസ് കണ്ടെത്തിയത്. ശരത് കുമാറിന് ഹാഷിഷ് ഓയിൽ എത്തിച്ചിരുന്നതും വൈശാഖാണെന്ന് അന്വേഷണത്തിൽ വ്യക്തമായതായി പോലീസ് അറിയിച്ചു.

ചില ദിവസങ്ങളിൽ ശ്രീലക്ഷ്മിക്കും വൈശാഖ് നേരിട്ട് ഹാഷിഷ് ഓയിൽ എത്തിച്ചിരുന്നതായും അന്വേഷണത്തിൽ കണ്ടെത്തിയതായി പോലീസ് പറയുന്നു.

ശൃംഖലയിലെ കണ്ണികളെന്ന് പോലീസ്

ശ്രീലക്ഷ്മിയെ കേന്ദ്രീകരിച്ച് നടത്തിയ അന്വേഷണത്തിലാണ് ലഹരിമരുന്ന് വിതരണ ശൃംഖലയിലെ കൂടുതൽ കണ്ണികളിലേക്ക് പോലീസിന് എത്താനായത്. ശാസ്ത്രീയമായ അന്വേഷണത്തിലൂടെയാണ് ശരത് കുമാറിനെയും വൈശാഖിനെയും തിരിച്ചറിഞ്ഞതെന്ന് പോലീസ് അറിയിച്ചു.

തുടർന്നാണ് ഇരുവരെയും അറസ്റ്റ് ചെയ്തത്. കേസിൽ ലഹരിമരുന്ന് എത്തിച്ചിരുന്നവരിലേക്കും വിൽപ്പന ശൃംഖലയിലെ മറ്റ് കണ്ണികളിലേക്കും അന്വേഷണം തുടരുകയാണ്.