ചിക്കാഗോ, 2026 സെപ്റ്റംബർ 4 –

അമേരിക്കയിൽ ഡീസൽ വില ചരിത്രത്തിലെ ഏറ്റവും ഉയർന്ന നിരക്കിലെത്തി. വെള്ളിയാഴ്ച ഒരു ഗാലൻ ഡീസലിന്റെ ദേശീയ ശരാശരി വില ആദ്യമായി 5.85 ഡോളറായി. ആറുമാസമായി തുടരുന്ന ഇറാൻ യുദ്ധം ആഗോള ഇന്ധനവിതരണത്തെ ബാധിച്ചതാണ് വിലക്കയറ്റത്തിന്റെ പ്രധാന കാരണം. സാധാരണ പെട്രോളിന്റെ ശരാശരി വിലയും ഗാലന് 4.15 ഡോളറായി ഉയർന്നു. കഴിഞ്ഞ വർഷം ഇതേ സമയത്ത് ഇത് 3.20 ഡോളറായിരുന്നു.

ഹോർമുസിലെ തടസ്സം വില ഉയർത്തി

ഫെബ്രുവരി അവസാനം യുഎസും ഇസ്രയേലും ഇറാനെതിരെ യുദ്ധം തുടങ്ങുന്നതിന് മുമ്പ് ഡീസലിന്റെ ശരാശരി വില ഗാലന് 3.76 ഡോളറായിരുന്നു. മിഡിൽ ഈസ്റ്റിലെ ഉൽപാദനക്കുറവും വിതരണ ശൃംഖലയിലെ തടസ്സങ്ങളും പിന്നീട് അസംസ്കൃത എണ്ണവില ഉയർത്തി. പ്രധാനമായും ഹോർമുസ് കടലിടുക്കിലൂടെയുള്ള ടാങ്കർ ഗതാഗതം തടസ്സപ്പെട്ടത് പ്രതിസന്ധി രൂക്ഷമാക്കി. പോരാട്ടം വീണ്ടും ശക്തമായതോടെ ബ്രെന്റ് ക്രൂഡ് വില ബാരലിന് 95 ഡോളറിന് മുകളിലെത്തി. യുദ്ധത്തിന് മുമ്പ് ഇത് ഏകദേശം 70 ഡോളറായിരുന്നു.

ഭക്ഷ്യവിലയിലും പ്രതിഫലിക്കാം

ഡീസൽ വില ഉയരുന്നത് ചരക്കുനീക്കത്തിന്റെയും വിതരണത്തിന്റെയും ചെലവ് കൂട്ടുകയാണ്. കൃഷിയന്ത്രങ്ങൾ മുതൽ ട്രക്കുകൾ, ട്രെയിനുകൾ, ചരക്കുകപ്പലുകൾ വരെ ഡീസലിനെ ആശ്രയിക്കുന്നതിനാൽ ഭക്ഷ്യവിതരണ ശൃംഖലയെയും ഇത് ബാധിക്കും. ഭക്ഷണത്തിന്റെ മൊത്തം ചെലവിൽ ഏകദേശം 15 മുതൽ 30 ശതമാനം വരെ ഇന്ധനച്ചെലവാണെന്ന് ഇൻഡിപെൻഡന്റ് ഗ്രോസേഴ്സ് അലയൻസ് പറയുന്നു. പച്ചക്കറി, മാംസം, മത്സ്യം തുടങ്ങിയ വേഗത്തിൽ കേടാകുന്ന ഭക്ഷ്യവസ്തുക്കളുടെ വിലയിലാണ് ആഘാതം ആദ്യം പ്രകടമാകാൻ സാധ്യത.

ഓൺലൈൻ ഓർഡറുകൾക്കും അധിക നിരക്ക്

ഇന്ധനച്ചെലവ് കൂടിയതോടെ ചില കമ്പനികൾ ഇതിനകം അധിക നിരക്ക് ഈടാക്കിത്തുടങ്ങി. ഏപ്രിലിൽ ആമസോൺ ചില മൂന്നാംകക്ഷി വിൽപ്പനക്കാർക്ക് താൽക്കാലികമായി 3.5 ശതമാനം ഇന്ധന-ലോജിസ്റ്റിക്സ് സർചാർജ് ഏർപ്പെടുത്തി. യുപിഎസ്, ഫെഡ്എക്സ്, യുഎസ് പോസ്റ്റൽ സർവീസ് എന്നിവയും ചില പാഴ്സലുകൾക്ക് അധിക നിരക്ക് ഏർപ്പെടുത്തിയിട്ടുണ്ട്. ഡീസൽ വില ഉയർന്ന നിലയിൽ കൂടുതൽ കാലം തുടർന്നാൽ അതിന്റെ ചെലവ് ഉപഭോക്താക്കളിലേക്ക് കൂടുതലായി എത്തുമെന്ന് വിദഗ്ധർ മുന്നറിയിപ്പ് നൽകുന്നു.

ആഗോള പ്രതിസന്ധി രൂക്ഷമാകുമെന്ന് മുന്നറിയിപ്പ്

ഡീസൽ ഉൾപ്പെടെയുള്ള ശുദ്ധീകരിച്ച പെട്രോളിയം ഉൽപന്നങ്ങളുടെ ലഭ്യത കുറയുന്നതും ആശങ്ക ഉയർത്തുന്നുണ്ട്. വില മാത്രമല്ല, ഇന്ധന ശേഖരവും കുറയുകയാണെന്ന് ഊർജ വിദഗ്ധൻ നീൽ അറ്റ്കിൻസൺ മുന്നറിയിപ്പ് നൽകി. മിഡിൽ ഈസ്റ്റിൽ നിന്നുള്ള ഇറക്കുമതിയെ കൂടുതൽ ആശ്രയിക്കുന്ന ഏഷ്യൻ, ആഫ്രിക്കൻ രാജ്യങ്ങളിലാണ് പ്രതിസന്ധിയുടെ ആഘാതം കൂടുതൽ രൂക്ഷമാകാൻ സാധ്യത. നവംബറിലെ യുഎസ് ഇടക്കാല തിരഞ്ഞെടുപ്പിൽ സാമ്പത്തിക വിഷയങ്ങൾ പ്രധാനമാകുന്നതിനാൽ ഇന്ധനവില വർധന രാഷ്ട്രീയമായും പ്രതിഫലിച്ചേക്കാം.