അഹമ്മദാബാദ് (ഗുജറാത്ത്) / 2026 / ഓഗസ്റ്റ് 28
കേന്ദ്ര ആഭ്യന്തര-സഹകരണ മന്ത്രി അമിത് ഷാ ഓഗസ്റ്റ് 27ന് ഗുജറാത്തിലെ അഹമ്മദാബാദിൽ ട്രോയിക്ക ഫാർമസ്യൂട്ടിക്കൽസ് സംഘടിപ്പിച്ച ഫാർമഇന്നോവ അവാർഡ് ചടങ്ങ് 2026ൽ മുഖ്യാതിഥിയായി പങ്കെടുത്തു. മരുന്നുകളുടെ കാര്യത്തിൽ ഇന്ത്യ സ്വയംപര്യാപ്തമാകുന്നതിനൊപ്പം ഇന്ത്യൻ നിർമിത മരുന്നുകൾ ലോകത്തിന്റെ എല്ലാ ഭാഗങ്ങളിലും എത്തിക്കണമെന്നും അദ്ദേഹം പറഞ്ഞു. ഔഷധമേഖല ഇന്ത്യയുടെ തന്ത്രപ്രധാന ദേശീയ സമ്പത്താണെന്നും ഗവേഷണത്തിനും നൂതനാശയങ്ങൾക്കും കൂടുതൽ പ്രാധാന്യം നൽകണമെന്നും അമിത് ഷാ ആവശ്യപ്പെട്ടു. ഔഷധ-മെഡിക്കൽ സാങ്കേതിക മേഖലയിൽ ഗവേഷണവും നൂതനാശയങ്ങളും പ്രോത്സാഹിപ്പിക്കാൻ കേന്ദ്ര സർക്കാർ വിവിധ പദ്ധതികളിലൂടെ പിന്തുണ നൽകുന്നുണ്ടെന്നും അദ്ദേഹം വ്യക്തമാക്കി.
2047ൽ എല്ലാ മേഖലയിലും ഒന്നാമതാകണം
സ്വാതന്ത്ര്യത്തിന്റെ നൂറാം വാർഷികം ആഘോഷിക്കുന്ന 2047ൽ ഇന്ത്യ എല്ലാ മേഖലയിലും ലോകത്ത് ഒന്നാമതെത്തണമെന്ന ലക്ഷ്യമാണ് പ്രധാനമന്ത്രി നരേന്ദ്ര മോദി രാജ്യത്തിന് മുന്നിൽ വെച്ചിരിക്കുന്നതെന്ന് അമിത് ഷാ പറഞ്ഞു. സുരക്ഷിതവും വിദ്യാഭ്യാസമുള്ളതുമായ രാജ്യമായി ഇന്ത്യ വളരണം. അതേസമയം രാജ്യത്തിന്റെ സാംസ്കാരിക മൂല്യങ്ങൾ സംരക്ഷിച്ചുകൊണ്ടായിരിക്കണം വികസനം. ലോകത്തെ മുൻനിര സമ്പദ്വ്യവസ്ഥകളിലൊന്നായും ഇന്ത്യ മാറണം.
ഇതിനുള്ള ശേഷി ഇന്ത്യയ്ക്കുണ്ടെന്ന് അദ്ദേഹം പറഞ്ഞു. ആ ശേഷിയെ ശരിയായ ദിശയിൽ ഉപയോഗിക്കണം. അതിനനുസരിച്ച് നയങ്ങൾ രൂപപ്പെടുത്തുകയും അവ നടപ്പാക്കുന്നതിനുള്ള സംവിധാനം താഴെത്തട്ടുവരെ എത്തിക്കുകയും വേണം. 2014ൽ നരേന്ദ്ര മോദി പ്രധാനമന്ത്രിയായപ്പോൾ ഇന്ത്യ ലോകത്തിലെ പതിനൊന്നാമത്തെ വലിയ സമ്പദ്വ്യവസ്ഥയായിരുന്നു. കഴിഞ്ഞ 12 വർഷത്തിനിടെ ഇന്ത്യ നാലാമത്തെ വലിയ സമ്പദ്വ്യവസ്ഥയായി മാറിയെന്നും അമിത് ഷാ പറഞ്ഞു.
കോവിഡ് കാലത്തെ ഇന്ത്യയുടെ നേട്ടങ്ങൾ
കോവിഡ് പ്രതിസന്ധി ലോകത്ത് ഏറ്റവും മികച്ച രീതിയിൽ കൈകാര്യം ചെയ്ത രാജ്യങ്ങളിലൊന്നാണ് ഇന്ത്യയെന്ന് അമിത് ഷാ പറഞ്ഞു. മറ്റു രാജ്യങ്ങളിൽ സർക്കാരുകൾ മഹാമാരിക്കെതിരെ പോരാടിയപ്പോൾ ഇന്ത്യയിൽ ജനങ്ങളും സംസ്ഥാന സർക്കാരുകളും കേന്ദ്ര സർക്കാരും ഒരുമിച്ചാണ് പ്രതിസന്ധിയെ നേരിട്ടതെന്നും അദ്ദേഹം പറഞ്ഞു.
കോവിഡ് കാലത്ത് വാക്സിൻ വികസിപ്പിച്ച ലോകത്തിലെ ആദ്യ മൂന്ന് രാജ്യങ്ങളിൽ ഇന്ത്യയും ഉൾപ്പെട്ടു. സ്വന്തം ജനങ്ങൾക്ക് വാക്സിൻ നൽകിയതിനു പുറമേ 70 രാജ്യങ്ങളിലേക്ക് ഇന്ത്യ വാക്സിൻ അയച്ചു. ഇതിലൂടെ അവിടങ്ങളിലെ ജനങ്ങളുടെ ജീവൻ രക്ഷിക്കാനും സഹായിച്ചെന്ന് അദ്ദേഹം പറഞ്ഞു.
വളരെ പ്രതികൂലമായ സാഹചര്യത്തിലും 140 കോടി ജനങ്ങളുടെ ആവശ്യങ്ങൾ നിറവേറ്റിയ ശേഷം വ്യക്തിഗത സുരക്ഷാ കിറ്റുകളും എൻ-95 മാസ്കുകളും കയറ്റുമതി ചെയ്യുന്ന രാജ്യമായി ഇന്ത്യ മാറി. 13 മാസത്തിനുള്ളിൽ കോവാക്സിൻ, കോവിഷീൽഡ് എന്നീ രണ്ട് വാക്സിനുകളും വികസിപ്പിച്ചതായും അമിത് ഷാ ചൂണ്ടിക്കാട്ടി.
ഇന്ത്യൻ യുവാക്കൾ അമേരിക്കയിലേതിനെക്കാൾ 22 മടങ്ങ് കുറഞ്ഞ ചെലവിൽ സ്വകാര്യ ഉപഗ്രഹം നിർമിച്ച് ബഹിരാകാശത്തേക്ക് വിക്ഷേപിച്ചെന്നും അദ്ദേഹം പറഞ്ഞു. ഇന്ന് രാജ്യത്തുടനീളം ദശലക്ഷക്കണക്കിന് സ്റ്റാർട്ടപ്പുകൾ ഉയർന്നുവരുന്നുണ്ട്. ഇന്ത്യയ്ക്ക് കഴിയില്ലെന്ന അപകർഷബോധത്തിൽനിന്ന് പുറത്തുവരണം. യുവാക്കളെ പ്രോത്സാഹിപ്പിക്കുകയും അവരിൽ ആത്മവിശ്വാസവും ആവേശവും വളർത്തുകയും വേണം. നമുക്ക് അത് ചെയ്യാൻ കഴിയുമെന്ന് ഇതിനകം തെളിയിച്ചിട്ടുണ്ടെന്നും അമിത് ഷാ പറഞ്ഞു.
ആരോഗ്യരംഗത്ത് സമഗ്ര സമീപനം
2014ൽ ഇന്ത്യയെ ദുർബലമായ അഞ്ച് സമ്പദ്വ്യവസ്ഥകളിലൊന്നായി വിശേഷിപ്പിച്ചിരുന്നുവെന്നും രാജ്യം നയപരമായ സ്തംഭനത്തിലാണെന്ന് പറഞ്ഞിരുന്നുവെന്നും അമിത് ഷാ പറഞ്ഞു. എന്നാൽ ഇന്ന് അതേ ഇന്ത്യ ലോകത്തെ ഏറ്റവും ആകർഷകമായ ഉൽപ്പാദന കേന്ദ്രങ്ങളിലൊന്നായി മാറി ആഗോള അംഗീകാരം നേടിയിരിക്കുകയാണ്. നിയമങ്ങളും ചിന്താഗതിയും സംവിധാനങ്ങളും നടപടിക്രമങ്ങളും മാറ്റിയതാണ് ഇതിന് സഹായിച്ചതെന്നും അദ്ദേഹം പറഞ്ഞു.
2014ൽ രാജ്യത്തെ 1.8 കോടി കുടുംബങ്ങളിൽ മാത്രമാണ് ശൗചാലയങ്ങൾ ഉണ്ടായിരുന്നത്. ഇന്ന് 13 കോടി കുടുംബങ്ങളിൽ ശൗചാലയങ്ങളുണ്ട്. വീട്ടിൽ ശൗചാലയം ലഭ്യമാകുന്നതും ഒരാളുടെ ആരോഗ്യവും തമ്മിൽ ശക്തമായ ബന്ധമുണ്ട്. രോഗങ്ങൾ തടയുന്നതിനുള്ള ഏറ്റവും ഫലപ്രദമായ മാർഗങ്ങളിൽ പ്രധാനപ്പെട്ടതാണ് ശുചിത്വമെന്നും അദ്ദേഹം പറഞ്ഞു. ഇന്ന് 16 കോടി കുടുംബങ്ങൾക്ക് പൈപ്പിലൂടെ ശുദ്ധമായ കുടിവെള്ളവും ലഭിക്കുന്നുണ്ട്.
സമൂഹത്തിലെ ഏറ്റവും ദരിദ്ര വിഭാഗങ്ങൾക്കായി കേന്ദ്ര സർക്കാർ ആയുഷ്മാൻ ഭാരത് പദ്ധതി കൊണ്ടുവന്നതായും അമിത് ഷാ പറഞ്ഞു. ഇതിലൂടെ അഞ്ചുലക്ഷം രൂപ വരെയുള്ള ചികിത്സാച്ചെലവ് കേന്ദ്ര സർക്കാർ വഹിക്കുന്നു. രാജ്യത്തെ 70 കോടി ആളുകളുടെ ചികിത്സാച്ചെലവിന് പദ്ധതിയിലൂടെ പരിരക്ഷ നൽകാൻ തുടക്കമിട്ടതായും അദ്ദേഹം വ്യക്തമാക്കി.
ആരോഗ്യരംഗത്ത് രോഗീപരിചരണം, ആരോഗ്യ അടിസ്ഥാനസൗകര്യങ്ങൾ, മരുന്നുകൾ, ഗവേഷണവും വികസനവും, ഉൽപ്പാദനം എന്നിവ ഒരേസമയം പരിഗണിക്കുന്ന സമഗ്ര സമീപനമാണ് സ്വീകരിച്ചത്. ഗ്രാമീണ ആരോഗ്യ അടിസ്ഥാനസൗകര്യങ്ങൾക്കായി 1.60 ലക്ഷം കോടി രൂപ ചെലവഴിച്ചു. തുടർന്ന് ആശുപത്രികളുടെ ശൃംഖല സ്ഥാപിക്കുകയും ഗ്രാമപ്രദേശങ്ങളിലേക്ക് ആശുപത്രി സൗകര്യങ്ങൾ വ്യാപിപ്പിക്കുകയും ചെയ്തു. ഇനി ഔഷധ വ്യവസായത്തിന്റെ ഊഴമാണെന്നും അമിത് ഷാ പറഞ്ഞു.
ഔഷധനിർമാണത്തിൽ ലോകോത്തര സംവിധാനം
ആത്മനിർഭർ ഭാരത് ലക്ഷ്യത്തിന്റെ ഭാഗമായി ഔഷധമേഖലയിലും ഉൽപ്പാദനബന്ധിത പ്രോത്സാഹന പദ്ധതി നടപ്പാക്കിയതായി അമിത് ഷാ പറഞ്ഞു. നിർണായക ഔഷധ ഘടകങ്ങൾ, മരുന്നുനിർമാണത്തിനാവശ്യമായ പ്രാരംഭ വസ്തുക്കൾ, മെഡിക്കൽ ഉപകരണങ്ങൾ എന്നിവ ഇന്ത്യയിൽ നിർമിക്കുന്നതിന് പ്രോത്സാഹനം നൽകുന്നുണ്ട്.
ബൾക്ക് ഡ്രഗ് പാർക്ക്, മെഡിക്കൽ ഡിവൈസ് പാർക്ക് പദ്ധതികളിലൂടെ ലോകോത്തര ഉൽപ്പാദന സംവിധാനം ഇന്ത്യയിൽ സൃഷ്ടിക്കുകയാണ്. ഔഷധമേഖലയ്ക്കായി രൂപപ്പെടുത്തിയ ബൾക്ക് ഡ്രഗ് പാർക്കുകളും ഉൽപ്പാദനബന്ധിത പ്രോത്സാഹന പദ്ധതിയും വരുംദിവസങ്ങളിൽ ഇന്ത്യൻ ഔഷധ വ്യവസായത്തെ കൂടുതൽ ശക്തിപ്പെടുത്തുമെന്ന് അമിത് ഷാ പറഞ്ഞു. ഈ മേഖലയിലെ ചൈനയുടെ ആധിപത്യം തകർക്കുന്നതിനും പദ്ധതികൾ സഹായിക്കുമെന്നാണ് അദ്ദേഹത്തിന്റെ വിലയിരുത്തൽ.
ഈ പദ്ധതികൾക്ക് കീഴിൽ ഇതുവരെ 42,700 കോടി രൂപയുടെ നിക്ഷേപം നടന്നിട്ടുണ്ട്. 3.64 ലക്ഷം കോടി രൂപയിലധികം മൂല്യമുള്ള മരുന്നുകൾ ഇന്ത്യ കയറ്റുമതി ചെയ്തതായും അദ്ദേഹം പറഞ്ഞു.
ഗവേഷണത്തിന് കമ്പനികളും മുന്നിട്ടിറങ്ങണം
ഓരോ കമ്പനിയും ഗവേഷണത്തിൽ ശ്രദ്ധ കേന്ദ്രീകരിക്കണമെന്നും ഗവേഷണത്തിൽ ഏർപ്പെട്ടിരിക്കുന്ന വിദ്യാർത്ഥികളെയും മികവുറ്റ വിദ്യാർത്ഥികളെയും വിദഗ്ധരെയും പ്രോത്സാഹിപ്പിക്കണമെന്നും അമിത് ഷാ ആവശ്യപ്പെട്ടു. ഗവേഷണത്തെ പ്രോത്സാഹിപ്പിക്കാൻ കേന്ദ്ര സർക്കാർ മൂന്ന് പദ്ധതികൾ കൊണ്ടുവന്നിട്ടുണ്ട്. ഗവേഷണത്തിന് പിന്തുണ നൽകാതെ രാജ്യത്തിന് മുന്നോട്ടുപോകാനാകില്ലെന്നും അദ്ദേഹം പറഞ്ഞു.
ഔഷധ-മെഡിക്കൽ സാങ്കേതിക മേഖലകളിൽ ഗവേഷണവും നൂതനാശയങ്ങളും പ്രോത്സാഹിപ്പിക്കാൻ ദേശീയ നയവും രൂപപ്പെടുത്തിയിട്ടുണ്ട്. പി.ആർ.ഐ.പി പദ്ധതി ആയിരക്കണക്കിന് കോടി രൂപയുടെ പദ്ധതിയാണെന്നും ഇതിലൂടെ വ്യവസായ മേഖലയ്ക്ക് സർക്കാർ പിന്തുണ ലഭിക്കുമെന്നും അദ്ദേഹം പറഞ്ഞു.
ഇന്ന് ഇന്ത്യ വെന്റിലേറ്ററുകളും നിർമിക്കുന്നുണ്ട്. ബാൻഡേജ് മുതൽ എം.ആർ.ഐ യന്ത്രങ്ങൾ വരെയുള്ള എല്ലാ മെഡിക്കൽ ഉപകരണങ്ങളും 2028ന് മുമ്പ് ഇന്ത്യയിൽ നിർമിക്കാൻ കഴിയുന്ന സംവിധാനം ഒരുക്കുകയാണെന്നും അമിത് ഷാ വ്യക്തമാക്കി.
നിരവധി പരാജയങ്ങൾ നേരിടേണ്ടിവന്നാലും ഭയമില്ലാതെ മുന്നോട്ടുപോകാനുള്ള ധൈര്യമാണ് വിജയത്തിന്റെ അർഥമെന്നും അമിത് ഷാ പറഞ്ഞു.
