ന്യൂഡൽഹി / 2026 / ഓഗസ്റ്റ് 18

ദേശീയ വ്യവസായ ഇടനാഴി വികസന-നടപ്പാക്കൽ ട്രസ്റ്റിന്റെ പരമോന്നത നിരീക്ഷണ അതോറിറ്റിയുടെ മൂന്നാമത്തെ യോഗം 2026 ഓഗസ്റ്റ് 17ന് ന്യൂഡൽഹിയിൽ ചേർന്നു. കേന്ദ്ര ധന-കോർപ്പറേറ്റ് കാര്യ മന്ത്രി നിർമല സീതാരാമൻ അധ്യക്ഷത വഹിച്ചു. ദേശീയ വ്യവസായ ഇടനാഴി വികസന പദ്ധതിയിലെ പ്രവർത്തനങ്ങളുടെ പുരോഗതിയും അടുത്തഘട്ട വികസന മുൻഗണനകളും യോഗം വിലയിരുത്തി.

യോഗത്തിൽ കേന്ദ്ര വാണിജ്യ-വ്യവസായ മന്ത്രി പിയൂഷ് ഗോയൽ, മധ്യപ്രദേശ് മുഖ്യമന്ത്രി മോഹൻ യാദവ്, നീതി ആയോഗ് ഉപാധ്യക്ഷൻ അശോക് കുമാർ ലാഹിരി എന്നിവരും പങ്കെടുത്തു. വ്യവസായ ഭൂമിക്കും അടിസ്ഥാനസൗകര്യത്തിനുമുള്ള അടുത്തഘട്ട സംവിധാനം ഇപ്പോഴുള്ള ലഭ്യത തീരുന്നതിന് മുമ്പേ ഒരുക്കണമെന്ന് നിർമല സീതാരാമൻ ആവശ്യപ്പെട്ടു. ഭൂമി, ഗതാഗതബന്ധം, അടിസ്ഥാന സേവനങ്ങൾ, നിയമാനുമതികൾ, പദ്ധതി പ്രത്യേകോദ്ദേശ സ്ഥാപനങ്ങളുടെ അധികാരം തുടങ്ങിയ തടസ്സങ്ങൾ സംസ്ഥാനങ്ങൾ വേഗത്തിൽ പരിഹരിക്കണമെന്നും അവർ പറഞ്ഞു.

വ്യവസായ ഇടനാഴികൾ രാജ്യത്തെ ഉത്പാദനം വർധിപ്പിക്കാനും ചരക്കുനീക്ക മത്സരക്ഷമത മെച്ചപ്പെടുത്താനും ആഗോള നിലവാരമുള്ള വ്യവസായ മേഖലകൾ സൃഷ്ടിക്കാനുമുള്ള പ്രധാന പദ്ധതിയാണെന്ന് ധനമന്ത്രി വ്യക്തമാക്കി. പദ്ധതി അനുമതിയിൽ മാത്രം ശ്രദ്ധിക്കാതെ അടിസ്ഥാനസൗകര്യം പൂർത്തിയാക്കൽ, ഭൂമി അനുവദിക്കൽ, നിക്ഷേപം എത്തിക്കൽ, ഉത്പാദനം തുടങ്ങൽ എന്നിവയിലേക്ക് ഇനി ശ്രദ്ധ മാറണമെന്നാണ് കേന്ദ്രത്തിന്റെ നിലപാട്. തൊഴിലാളികൾക്കുള്ള താമസം, ആരോഗ്യസംരക്ഷണം, നൈപുണ്യപരിശീലനം, പൊതുഗതാഗതം തുടങ്ങിയ സൗകര്യങ്ങളും വ്യവസായ വികസനത്തിന്റെ ഭാഗമാകണമെന്നും യോഗം നിർദേശിച്ചു.

13 സംസ്ഥാനങ്ങളിൽ 20 പദ്ധതികൾ

ദേശീയ വ്യവസായ ഇടനാഴി വികസന പദ്ധതി ഇപ്പോൾ ഏഴ് വ്യവസായ ഇടനാഴികളിലായി 13 സംസ്ഥാനങ്ങളിലെ 20 അംഗീകൃത പദ്ധതികൾ ഉൾക്കൊള്ളുന്നു. ധോലേര, ഷേന്ദ്ര-ബിഡ്കിൻ, ഗ്രേറ്റർ നോയിഡ, വിക്രം ഉദ്യോഗ്പുരി എന്നീ നാല് വ്യവസായ സ്മാർട്ട് നഗരങ്ങളിൽ ഉത്പാദനം ആരംഭിച്ചിട്ടുണ്ട്. 2024 ഓഗസ്റ്റിൽ അംഗീകരിച്ച 12 പദ്ധതികളിലും അടിസ്ഥാനസൗകര്യ വികസനം, ഭൂമി അനുവദിക്കൽ, നിക്ഷേപകരെ ആകർഷിക്കൽ എന്നിവ ഒരേസമയം മുന്നോട്ടുപോകുകയാണ്.

ഇതുവരെ ഏകദേശം 5,348 ഏക്കറിലായി 469 പ്ലോട്ടുകൾ അനുവദിച്ചു. ഇവയ്ക്ക് ഏകദേശം 2.21 ലക്ഷം കോടി രൂപയുടെ നിക്ഷേപസാധ്യതയും 1.29 ലക്ഷം തൊഴിലവസര സാധ്യതയുമുണ്ടെന്നാണ് കണക്ക്. 134 യൂണിറ്റുകൾ ഇതിനകം ഉത്പാദനം തുടങ്ങിയിട്ടുണ്ട്. 95 യൂണിറ്റുകളുടെ നിർമാണം പുരോഗമിക്കുകയാണ്.

നിക്ഷേപകർക്ക് നേരിട്ട് പ്രവർത്തനം തുടങ്ങാവുന്ന മേഖലകൾ

പദ്ധതികൾ കൂടുതൽ വേഗത്തിലും ഫലപ്രദമായും നടപ്പാക്കണമെന്ന് പിയൂഷ് ഗോയൽ ആവശ്യപ്പെട്ടു. നിക്ഷേപകരുടെ ആവശ്യത്തിന് അനുയോജ്യമായ സ്ഥലങ്ങൾ കണ്ടെത്തണം. അടിസ്ഥാനസൗകര്യം മുൻകൂട്ടി ഒരുക്കിയ വ്യവസായ മേഖലകൾ, ബഹുനില ഫാക്ടറികൾ, തൊഴിലാളി പാർപ്പിടം, സാമ്പത്തിക-സാമൂഹിക സൗകര്യങ്ങൾ എന്നിവയും ഒരുക്കണം. ഇതിലൂടെ നിക്ഷേപകർക്ക് വേഗത്തിൽ പ്രവർത്തനം തുടങ്ങാനാകുമെന്ന് അദ്ദേഹം പറഞ്ഞു.

സ്വതന്ത്ര വ്യാപാര കരാറുകളിൽ നിന്നുള്ള അവസരങ്ങൾ പ്രയോജനപ്പെടുത്തി വ്യവസായ മേഖലകൾ കൂടുതൽ ശക്തമായി വിപണനം ചെയ്യണമെന്നും ഗോയൽ പറഞ്ഞു. രാജ്യങ്ങളെയും വ്യവസായ മേഖലകളെയും കേന്ദ്രീകരിച്ച പ്രത്യേക വ്യവസായ കേന്ദ്രങ്ങളുടെ സാധ്യതയും പരിശോധിക്കണം. ഭാവിയിലെ വ്യവസായ വികസനം പിഎം ഗതിശക്തിയുമായി ബന്ധിപ്പിച്ച സമഗ്ര മേഖലാ വികസന രീതിയിലാകണമെന്നും അദ്ദേഹം ആവശ്യപ്പെട്ടു.

ഭവ്യയ്ക്ക് സംസ്ഥാനങ്ങളിൽ നിന്ന് 87 അപേക്ഷകൾ

രാജ്യത്താകെ നിക്ഷേപത്തിന് സജ്ജമായ 100 വ്യവസായ പാർക്കുകൾ വികസിപ്പിക്കാൻ ലക്ഷ്യമിടുന്ന ഭാരത് ഔദ്യോഗിക് വികാസ് യോജനയായ ‘ഭവ്യ’യുടെ പുരോഗതിയും യോഗം വിലയിരുത്തി. ആദ്യഘട്ടത്തിൽ പരമാവധി 20 പദ്ധതികൾ അംഗീകരിക്കാൻ ഉദ്ദേശിച്ചിരുന്നെങ്കിലും സംസ്ഥാനങ്ങളിൽ നിന്ന് 87 അപേക്ഷകളാണ് ലഭിച്ചത്. പദ്ധതിയോടുള്ള ശക്തമായ താൽപര്യമാണ് ഇത് കാണിക്കുന്നതെന്ന് കേന്ദ്രം വിലയിരുത്തി.

ഭൂമി ഉടൻ ലഭ്യമാണോ, യഥാർഥ വ്യവസായ ആവശ്യമുണ്ടോ, മികച്ച ഗതാഗതബന്ധമുണ്ടോ, വെള്ളം-വൈദ്യുതി തുടങ്ങിയ സേവനങ്ങൾ ഉറപ്പാണോ, പദ്ധതി ഘട്ടങ്ങൾ പ്രായോഗികമാണോ, തുടക്കത്തിൽ തന്നെ നിക്ഷേപകരെ ആകർഷിക്കാനാകുമോ തുടങ്ങിയ കാര്യങ്ങൾ പരിശോധിച്ചായിരിക്കും ഭവ്യ പദ്ധതികളുടെ വിലയിരുത്തൽ. വ്യവസായ ഇടനാഴി പദ്ധതികളിൽ നിന്നുള്ള അനുഭവവും ഇതിനായി ഉപയോഗിക്കും.

ജലപാതകളും വടക്കുകിഴക്കൻ മേഖലയും പരിഗണിക്കണം

കേന്ദ്ര തുറമുഖ-ഷിപ്പിങ്-ജലപാത മന്ത്രി സർബാനന്ദ സോനോവാൾ ദേശീയ ജലപാതകളെ വ്യവസായ ഇടനാഴികളുമായി ബന്ധിപ്പിക്കണമെന്ന് നിർദേശിച്ചു. മികച്ച ഗതാഗതബന്ധം, ഭൂമിയുടെ ലഭ്യത, പ്രാദേശിക വിഭവങ്ങൾ, വിപണി സാധ്യത എന്നിവയുള്ള വടക്കുകിഴക്കൻ സംസ്ഥാനങ്ങളിലും വ്യവസായ അടിസ്ഥാനസൗകര്യം വികസിപ്പിക്കണമെന്ന് അദ്ദേഹം പറഞ്ഞു.

പദ്ധതി പ്രത്യേകോദ്ദേശ സ്ഥാപനങ്ങൾക്ക് ആസൂത്രണം, വികസനം, നഗരഭരണം എന്നിവയിൽ ആവശ്യമായ അധികാരം നൽകണമെന്ന് നീതി ആയോഗ് ഉപാധ്യക്ഷൻ അശോക് കുമാർ ലാഹിരി സംസ്ഥാനങ്ങളോട് ആവശ്യപ്പെട്ടു. ഇതിലൂടെ പല സർക്കാർ ഏജൻസികളിലുമുള്ള ആശ്രയം കുറച്ച് തീരുമാനങ്ങൾ വേഗത്തിലാക്കാനാകുമെന്നാണ് വിലയിരുത്തൽ. വ്യവസായ ഇടനാഴികളുടെ അടുത്തഘട്ട വിജയം നിർമിച്ച അടിസ്ഥാനസൗകര്യത്തിന്റെ അളവിലല്ല, നിക്ഷേപവും ഉത്പാദനവും തൊഴിലവസരവും എത്ര വേഗത്തിൽ സൃഷ്ടിക്കുന്നു എന്നതിലായിരിക്കുമെന്നും യോഗം വ്യക്തമാക്കി.

.