ന്യൂഡൽഹി / 2026 / ഓഗസ്റ്റ് 17
രാജ്യത്തെ സ്കൂൾ വിദ്യാഭ്യാസത്തിന്റെ നിലവാരം വിലയിരുത്തുന്ന യു-ഡൈസ് പ്ലസ് 2025–26 റിപ്പോർട്ട് പുറത്തുവന്നു. 14.67 ലക്ഷം സ്കൂളുകൾ, 1.03 കോടി അധ്യാപകർ, 24.72 കോടി വിദ്യാർഥികൾ എന്നിവയെ ഉൾപ്പെടുത്തിയ റിപ്പോർട്ടിൽ പ്രവേശനം, മൊത്ത പ്രവേശന അനുപാതം, അധ്യാപകരുടെ ലഭ്യത, വിദ്യാർഥി-അധ്യാപക അനുപാതം, പഠനം തുടരുന്നവരുടെ നിരക്ക്, അടുത്ത ഘട്ടത്തിലേക്കുള്ള മാറ്റനിരക്ക് എന്നിവയിൽ പുരോഗതിയുണ്ടെന്ന് പറയുന്നു. കൊഴിഞ്ഞുപോക്ക് കുറഞ്ഞതായും ഡിജിറ്റൽ, ഭൗതിക അടിസ്ഥാന സൗകര്യങ്ങൾ മെച്ചപ്പെട്ടതായും വനിതാ അധ്യാപകരുടെ പങ്കാളിത്തം ഉയർന്നതായും ലിംഗസമത്വം, സാമൂഹിക ഉൾക്കൊള്ളൽ, എല്ലാവർക്കും വിദ്യാഭ്യാസലഭ്യത എന്നിവയിൽ മുന്നേറ്റമുണ്ടായതായും റിപ്പോർട്ട് വ്യക്തമാക്കുന്നു. ദേശീയ വിദ്യാഭ്യാസ നയം 2020 പ്രകാരമുള്ള തെളിവ് അധിഷ്ഠിത ആസൂത്രണത്തിനും ഇതു സഹായിക്കുന്നതായി റിപ്പോർട്ടിൽ പറയുന്നു.
14.67 ലക്ഷം സ്കൂളുകൾ, 24.72 കോടി വിദ്യാർഥികൾ
സ്കൂൾ വിദ്യാഭ്യാസ-സാക്ഷരത വകുപ്പ് രാജ്യത്തെ സ്കൂൾ വിദ്യാഭ്യാസ വിവരങ്ങൾ ശേഖരിക്കാനും കൈകാര്യം ചെയ്യാനുമായി വികസിപ്പിച്ച ഡിജിറ്റൽ സംവിധാനമാണ് യു-ഡൈസ് പ്ലസ്. 2018–19ൽ ആരംഭിച്ച ഈ സംവിധാനം തെളിവുകളുടെ അടിസ്ഥാനത്തിലുള്ള ആസൂത്രണം, നയരൂപീകരണം, വിദ്യാഭ്യാസ പുരോഗതിയുടെ നിരീക്ഷണം എന്നിവയ്ക്ക് സഹായിക്കുന്നു. എല്ലാവർക്കും വിദ്യാഭ്യാസലഭ്യത, തുല്യത, ഗുണമേന്മയുള്ള പഠനം, കുട്ടികൾ പഠനം തുടരുന്ന സാഹചര്യം എന്നിവ ലക്ഷ്യമിടുന്ന ദേശീയ വിദ്യാഭ്യാസ നയം 2020 നടപ്പാക്കുന്നതിന്റെ പുരോഗതി വിലയിരുത്തുന്നതിനുള്ള പ്രധാന വിവരശേഖരമായും ഇത് പ്രവർത്തിക്കുന്നു. 2025–26ൽ ഒരു സ്കൂളിൽ ശരാശരി ഏഴ് അധ്യാപകരും 169 വിദ്യാർഥികളുമാണുള്ളത്. മൊത്തം വിദ്യാർഥി-അധ്യാപക അനുപാതം 24:1 ആണ്. ദേശീയ വിദ്യാഭ്യാസ നയം നിർദേശിക്കുന്ന 30:1 എന്ന പരിധിക്കുള്ളിലാണിത്.
സെക്കൻഡറി ഘട്ടത്തിലെ മൊത്ത പ്രവേശന അനുപാതം 71.7 ശതമാനമായി ഉയർന്നു. മിഡിൽ ഘട്ടത്തിൽ ഇത് 89.6 ശതമാനമാണ്. ആകെ പ്രവേശനത്തിൽ സെക്കൻഡറി ഘട്ടത്തിന്റെ പങ്ക് 27.16 ശതമാനമാണ്. പ്രിപ്പറേറ്ററി ഘട്ടം 25.60 ശതമാനം, മിഡിൽ ഘട്ടം 25.58 ശതമാനം, ഫൗണ്ടേഷണൽ ഘട്ടം 21.66 ശതമാനം എന്നിങ്ങനെയാണ്. സ്കൂൾ വിദ്യാഭ്യാസത്തിന്റെ വിവിധ ഘട്ടങ്ങളിലായി പ്രവേശനം താരതമ്യേന തുല്യമായി തുടരുന്നതും സെക്കൻഡറി പ്രവേശന അനുപാതം ഉയരുന്നതും വിദ്യാഭ്യാസലഭ്യത വർധിക്കുന്നതിന്റെ സൂചനയാണെന്ന് റിപ്പോർട്ട് പറയുന്നു.
ഒരു അധ്യാപകന് കുറച്ച് കുട്ടികൾ; വ്യക്തിഗത ശ്രദ്ധയ്ക്ക് കൂടുതൽ അവസരം
2025–26ൽ എല്ലാ സ്കൂൾ ഘട്ടങ്ങളിലും അധ്യാപകരുടെ ലഭ്യത മെച്ചപ്പെട്ടു. ഫൗണ്ടേഷണൽ ഘട്ടത്തിൽ വിദ്യാർഥി-അധ്യാപക അനുപാതം 10:1 ആണ്. പ്രിപ്പറേറ്ററി ഘട്ടത്തിൽ 12:1, മിഡിൽ ഘട്ടത്തിൽ 17:1, സെക്കൻഡറി ഘട്ടത്തിൽ 21:1 എന്നിങ്ങനെയാണ്. കുറഞ്ഞ വിദ്യാർഥി-അധ്യാപക അനുപാതം ഓരോ കുട്ടിക്കും കൂടുതൽ വ്യക്തിഗത ശ്രദ്ധ നൽകാനും അധ്യാപക-വിദ്യാർഥി ഇടപെടൽ ശക്തമാക്കാനും പഠനത്തിന്റെ ഗുണമേന്മ മെച്ചപ്പെടുത്താനും സഹായിക്കുമെന്ന് റിപ്പോർട്ട് പറയുന്നു. ഒരു പ്രത്യേക വിദ്യാഭ്യാസഘട്ടത്തിൽ ഒരു അധ്യാപകന് ശരാശരി എത്ര വിദ്യാർഥികളുണ്ടെന്ന് വ്യക്തമാക്കുന്നതാണ് ഈ അനുപാതം. ഉദാഹരണത്തിന് 10:1 എന്നത് പത്ത് വിദ്യാർഥികൾക്ക് ശരാശരി ഒരു അധ്യാപകൻ ലഭ്യമാണെന്നർഥമാണ്.
കുട്ടികളെ സ്കൂൾ സംവിധാനത്തിൽ നിലനിർത്തുന്നതിലും മുന്നേറ്റമുണ്ട്. പ്രിപ്പറേറ്ററി ഘട്ടത്തിലെ കൊഴിഞ്ഞുപോക്ക് 1.8 ശതമാനമായും സെക്കൻഡറി ഘട്ടത്തിൽ ഏഴ് ശതമാനമായും കുറഞ്ഞു. മിഡിൽ ഘട്ടത്തിൽ ഇത് നേരിയ തോതിൽ ഉയർന്ന് 3.6 ശതമാനമായി. എങ്കിലും മൂന്നു ഘട്ടങ്ങളിലെയും കൊഴിഞ്ഞുപോക്ക് 2022–23നെ അപേക്ഷിച്ച് ഗണ്യമായി കുറവാണ്. പഠനം തുടരുന്നവരുടെ നിരക്ക് ഫൗണ്ടേഷണൽ ഘട്ടത്തിൽ 98.5 ശതമാനം, പ്രിപ്പറേറ്ററിയിൽ 91.1 ശതമാനം, മിഡിൽ ഘട്ടത്തിൽ 83.7 ശതമാനം, സെക്കൻഡറിയിൽ 51.9 ശതമാനം എന്നിങ്ങനെയാണ്. ഫൗണ്ടേഷണലിൽ നിന്ന് പ്രിപ്പറേറ്ററിയിലേക്ക് 99.2 ശതമാനം കുട്ടികളും, പ്രിപ്പറേറ്ററിയിൽ നിന്ന് മിഡിലിലേക്ക് 93.8 ശതമാനവും, മിഡിലിൽ നിന്ന് സെക്കൻഡറിയിലേക്ക് 88.3 ശതമാനവും മുന്നേറി.
ഒറ്റ അധ്യാപക സ്കൂളുകളും വിദ്യാർഥികളില്ലാത്ത സ്കൂളുകളും കുറഞ്ഞു
ഒരു അധ്യാപകൻ മാത്രമുള്ള സ്കൂളുകളുടെ എണ്ണം ഏകദേശം മൂന്ന് ശതമാനം കുറഞ്ഞ് 1,00,843 ആയി. വിദ്യാർഥികളൊന്നും ചേർന്നിട്ടില്ലാത്ത സ്കൂളുകളുടെ എണ്ണം 2024–25നെ അപേക്ഷിച്ച് 29 ശതമാനം കുറഞ്ഞ് 5,663 ആയി. അധ്യാപകരുടെ വിന്യാസം കൂടുതൽ യുക്തിസഹമാക്കാനും ലഭ്യമായ വിദ്യാഭ്യാസ വിഭവങ്ങൾ കുട്ടികളുടെ ആവശ്യത്തിന് അനുസരിച്ച് ഉപയോഗിക്കാനുമുള്ള ശ്രമങ്ങളുടെ ഫലമാണ് ഈ മാറ്റമെന്ന് റിപ്പോർട്ട് വ്യക്തമാക്കുന്നു.
സ്കൂൾ പ്രവേശനത്തിൽ പെൺകുട്ടികളുടെ പങ്ക് 48.4 ശതമാനമാണ്. അധ്യാപകരിൽ വനിതകൾ 54.9 ശതമാനമാണ്. മറ്റ് പിന്നാക്ക വിഭാഗങ്ങളിൽപ്പെട്ട വിദ്യാർഥികളാണ് ആകെ പ്രവേശനത്തിൽ ഏറ്റവും കൂടുതൽ. ഇവരുടെ പങ്ക് 44.9 ശതമാനം. പൊതുവിഭാഗം 27.5 ശതമാനം, പട്ടികജാതി 17.7 ശതമാനം, പട്ടികവർഗം 10 ശതമാനം എന്നിങ്ങനെയാണ്. പട്ടികജാതി-പട്ടികവർഗ വിദ്യാർഥികളെ ചേർത്താൽ ആകെ പ്രവേശനത്തിന്റെ 27.7 ശതമാനമാണ്. പ്രത്യേക ആവശ്യങ്ങളുള്ള കുട്ടികളിൽ 57.16 ശതമാനം ആൺകുട്ടികളും 42.84 ശതമാനം പെൺകുട്ടികളുമാണ്. എല്ലാവർക്കും ലഭ്യമാകുന്ന അടിസ്ഥാന സൗകര്യങ്ങൾ, പ്രത്യേക പിന്തുണാ സേവനങ്ങൾ, തുല്യ പഠനാവസരങ്ങൾ എന്നിവയിലൂടെ ഉൾക്കൊള്ളുന്ന വിദ്യാഭ്യാസം ശക്തമാക്കാനുള്ള ശ്രമങ്ങളാണ് ഈ കണക്കുകൾ കാണിക്കുന്നതെന്നും റിപ്പോർട്ട് പറയുന്നു.
കമ്പ്യൂട്ടറും ഇന്റർനെറ്റും കൂടുതൽ സ്കൂളുകളിലേക്ക്
സ്കൂൾ അടിസ്ഥാന സൗകര്യങ്ങളുടെ നവീകരണത്തിലും മുന്നേറ്റമുണ്ട്. കമ്പ്യൂട്ടർ സൗകര്യമുള്ള സ്കൂളുകളുടെ വിഹിതം 69.9 ശതമാനമായി ഉയർന്നു. ഇന്റർനെറ്റ് ബന്ധമുള്ള സ്കൂളുകൾ 67.4 ശതമാനമായി. ഇതോടെ സാങ്കേതികവിദ്യ ഉപയോഗിച്ചുള്ള പഠനത്തിന് കൂടുതൽ അവസരം ലഭിക്കുന്നതായി റിപ്പോർട്ട് പറയുന്നു. വൈദ്യുതി 95 ശതമാനം സ്കൂളുകളിലും സുരക്ഷിത കുടിവെള്ളം 99.5 ശതമാനം സ്കൂളുകളിലും ലഭ്യമാണ്. പെൺകുട്ടികൾക്കുള്ള ശൗചാലയം 98.5 ശതമാനത്തിലും ആൺകുട്ടികൾക്കുള്ള ശൗചാലയം 97.2 ശതമാനത്തിലും ഉണ്ട്. കൈകഴുകാനുള്ള സൗകര്യം 96.9 ശതമാനം സ്കൂളുകളിലും ലൈബ്രറി 90.5 ശതമാനത്തിലും മഴവെള്ള സംഭരണ സംവിധാനം 29.9 ശതമാനത്തിലും കൈപ്പിടിയോടുകൂടിയ റാമ്പുകൾ 58.2 ശതമാനത്തിലും ലഭ്യമാണ്. ഡിജിറ്റൽ, ഭൗതിക സൗകര്യങ്ങളുടെ ഈ വ്യാപനം വിദ്യാഭ്യാസത്തിന്റെ ലഭ്യതയും ഉൾക്കൊള്ളലും ഗുണമേന്മയും മെച്ചപ്പെടുത്താനുള്ള തുടർച്ചയായ ശ്രമമാണെന്ന് റിപ്പോർട്ട് പറയുന്നു.
തെളിവുകളെ ആശ്രയിച്ച വിദ്യാഭ്യാസ ആസൂത്രണത്തിന് യു-ഡൈസ് പ്ലസ്
2025–26ലെ യു-ഡൈസ് പ്ലസ് റിപ്പോർട്ട് വിദ്യാഭ്യാസലഭ്യത, തുല്യത, ഗുണമേന്മ, അടിസ്ഥാന സൗകര്യങ്ങൾ എന്നിവയിൽ രാജ്യത്തെ സ്കൂൾ വിദ്യാഭ്യാസ സംവിധാനം മുന്നേറുന്നതായി വിലയിരുത്തുന്നു. അധ്യാപകരുടെ ലഭ്യത, അനുകൂലമായ വിദ്യാർഥി-അധ്യാപക അനുപാതം, കുട്ടികൾ പഠനം തുടരുന്ന നിരക്ക്, അടുത്ത ഘട്ടത്തിലേക്കുള്ള മാറ്റം, ലിംഗസമത്വം, സാമൂഹിക ഉൾക്കൊള്ളൽ, ഡിജിറ്റൽ സജ്ജീകരണം, സ്കൂൾ അടിസ്ഥാന സൗകര്യങ്ങൾ എന്നിവയിലെ നേട്ടങ്ങളാണ് റിപ്പോർട്ട് ചൂണ്ടിക്കാട്ടുന്നത്. ദേശീയതലത്തിലെ സമഗ്ര വിവരശേഖരമെന്ന നിലയിൽ യു-ഡൈസ് പ്ലസ് തെളിവ് അധിഷ്ഠിത ആസൂത്രണം, വിവരങ്ങളുടെ അടിസ്ഥാനത്തിലുള്ള നയരൂപീകരണം, സ്കൂൾ വിദ്യാഭ്യാസ മേഖലയിലെ ഫലപ്രദമായ നിരീക്ഷണം എന്നിവയ്ക്ക് തുടർന്നും സഹായിക്കുന്നു. തുല്യവും ഉൾക്കൊള്ളുന്നതും സാങ്കേതികവിദ്യ പ്രയോജനപ്പെടുത്തുന്നതും പഠിതാവിനെ കേന്ദ്രമാക്കുന്നതുമായ വിദ്യാഭ്യാസ സംവിധാനം സൃഷ്ടിക്കുകയെന്ന ദേശീയ വിദ്യാഭ്യാസ നയം 2020ന്റെ ലക്ഷ്യത്തിലേക്ക് സ്ഥിരമായ മുന്നേറ്റമുണ്ടെന്നും റിപ്പോർട്ട് വിലയിരുത്തുന്നു.
