ആന്ധ്രയിലെ അക്വാ കർഷകർക്ക് വിപണിവില ഇടിവും തീറ്റച്ചെലവും വെല്ലുവിളി

ന്യൂഡൽഹി / 2026 / ഓഗസ്റ്റ് 12

ആന്ധ്രപ്രദേശിലെ അക്വാകൾച്ചർ കർഷകർ വിപണിവില ഇടിയുന്നതും മത്സ്യത്തീറ്റയുടെ വില ഉയരുന്നതും കാരണം ബുദ്ധിമുട്ട് നേരിടുന്നതായി സംസ്ഥാന സർക്കാർ അറിയിച്ചു. സംസ്ഥാനത്ത് ഏകദേശം 2.16 ലക്ഷം അക്വാകൾച്ചർ കർഷകരാണ് ഈ മേഖലയിലുള്ളത്. ശുദ്ധജലവും ഉപ്പുരസമുള്ള ജലവും ഉൾപ്പെടെ ഏകദേശം 5.79 ലക്ഷം ഏക്കറിലാണ് കൃഷി നടക്കുന്നത്. കേന്ദ്ര മത്സ്യബന്ധന, മൃഗസംരക്ഷണ, ക്ഷീരവികസന മന്ത്രി രാജീവ് രഞ്ജൻ സിങ് എന്ന ലാലൻ സിങ് രാജ്യസഭയിൽ ചോദ്യത്തിന് മറുപടിയായാണ് വിവരങ്ങൾ അറിയിച്ചത്.

തീറ്റവില കുറയ്ക്കാൻ ധാരണ

വിപണിവില കുറഞ്ഞതും മത്സ്യത്തീറ്റയുടെ ചെലവ് കൂടിയതുമാണ് കർഷകർ നേരിടുന്ന പ്രധാന പ്രശ്നമെന്ന് ആന്ധ്രപ്രദേശ് സർക്കാർ അറിയിച്ചു. പ്രശ്നം പരിഹരിക്കാൻ തീറ്റച്ചെലവ് കുറയ്ക്കുന്നതുൾപ്പെടെ വിവിധ നടപടികൾ സർക്കാർ സ്വീകരിച്ചിട്ടുണ്ട്. ചെമ്മീൻ തീറ്റയുടെ വില കിലോഗ്രാമിന് നാല് രൂപ കുറയ്ക്കാൻ തീറ്റനിർമാതാക്കൾ സമ്മതിച്ചതായും സർക്കാർ വ്യക്തമാക്കി.

കർഷക സംഘടനകളുമായി ഏകോപനം

മത്സ്യ-ചെമ്മീൻ കർഷകരുടെ പ്രശ്നങ്ങൾ പരിഹരിക്കാൻ സംസ്ഥാന മത്സ്യബന്ധന വകുപ്പ് അക്വാ കർഷക സംഘടനകൾ, മൂല്യവർധിത ഉൽപന്ന സ്ഥാപനങ്ങൾ, കയറ്റുമതിക്കാർ, മറ്റ് ബന്ധപ്പെട്ട വിഭാഗങ്ങൾ എന്നിവരുമായി സജീവമായി ഏകോപനം നടത്തുകയാണ്. സംസ്ഥാനതലത്തിൽ കൃഷി അവധി ഔദ്യോഗികമായി നടപ്പാക്കിയിട്ടില്ലെന്നും ആന്ധ്രപ്രദേശ് സർക്കാർ അറിയിച്ചു.

വൈദ്യുതിക്ക് സബ്സിഡി നിരക്ക്

ആന്ധ്രപ്രദേശ് സർക്കാരുമായി ചേർന്ന് കേന്ദ്ര മത്സ്യബന്ധന വകുപ്പ് അക്വാ കർഷകരുടെ താൽപര്യം സംരക്ഷിക്കാൻ വിവിധ നടപടികൾ സ്വീകരിക്കുന്നുണ്ട്. രജിസ്റ്റർ ചെയ്ത അക്വാ കർഷകർക്ക് യൂണിറ്റിന് 1.50 രൂപ സബ്സിഡി നിരക്കിൽ വൈദ്യുതി നൽകുന്നുണ്ടെന്ന് സംസ്ഥാന സർക്കാർ അറിയിച്ചു. തീറ്റനിർമാതാക്കളുമായുള്ള ചർച്ചകളിലൂടെ ചെമ്മീൻ തീറ്റയുടെ വില കിലോഗ്രാമിന് നാല് രൂപ കുറച്ചതായും അറിയിച്ചു.

ഉൽപാദനച്ചെലവ് കുറയ്ക്കാൻ നികുതി ഇളവ്

ചെമ്മീൻ കൃഷിയുടെ സാമ്പത്തിക നില മെച്ചപ്പെടുത്താനും അക്വാകൾച്ചർ ഉൽപാദനച്ചെലവ് കുറയ്ക്കാനുമായി കേന്ദ്ര സർക്കാർ വിവിധ നയനടപടികൾ സ്വീകരിച്ചു. 2024–25, 2025–26 കേന്ദ്ര ബജറ്റുകളിൽ അക്വാകൾച്ചറിന് ആവശ്യമായ 16 പ്രധാന ഉൽപന്നങ്ങളുടെ കസ്റ്റംസ് തീരുവയിൽ മാറ്റം വരുത്തി. 30 ശതമാനം വരെയുണ്ടായിരുന്ന നിരക്കുകൾ പൂജ്യം മുതൽ അഞ്ച് ശതമാനം വരെ താഴ്ത്തി. ഇതിലൂടെ പ്രധാന ഉൽപാദന സാമഗ്രികളുടെ ചെലവ് കുറയ്ക്കുകയാണ് ലക്ഷ്യം.

ഇരുപതിലധികം ഉൽപന്നങ്ങൾക്ക് നികുതി കുറവ്

2025 സെപ്റ്റംബറിൽ മത്സ്യബന്ധനവും അക്വാകൾച്ചറുമായി ബന്ധപ്പെട്ട ഇരുപതിലധികം ഉൽപന്നങ്ങളുടെ ചരക്ക് സേവന നികുതി 12 മുതൽ 18 ശതമാനം വരെയുണ്ടായിരുന്നത് അഞ്ച് ശതമാനമായി കുറയ്ക്കാൻ കേന്ദ്ര സർക്കാർ അനുമതി നൽകി. കൃഷിയുപകരണങ്ങൾ, തീറ്റ ചേരുവകൾ, ജലസംസ്കരണ വസ്തുക്കൾ, മത്സ്യബന്ധന വലകൾ, മൂല്യവർധിത സമുദ്രോൽപന്നങ്ങൾ എന്നിവ ഇതിൽ ഉൾപ്പെടുന്നു. ഈ നടപടികൾ ഉൽപാദനച്ചെലവ് കുറയ്ക്കാനും കർഷകരുടെ ലാഭക്ഷമത ഉയർത്താനും ഇന്ത്യയുടെ അക്വാകൾച്ചർ മേഖലയുടെ മത്സരശേഷി മെച്ചപ്പെടുത്താനും സഹായിക്കുമെന്നാണ് പ്രതീക്ഷ. വിളവെടുപ്പിന് ശേഷമുള്ള നഷ്ടം കുറയ്ക്കാനും മത്സ്യകർഷകരുടെ വരുമാനം വർധിപ്പിക്കാനും കേന്ദ്ര-സംസ്ഥാന സർക്കാരുകൾ മൂല്യവർധിത സംരംഭങ്ങളും പ്രോത്സാഹിപ്പിക്കുന്നുണ്ട്.