ന്യൂഡൽഹി  / 2026  / ഓഗസ്റ്റ് 08

ദീൻദയാൽ അന്ത്യോദയ യോജന–ദേശീയ ഗ്രാമീണ ഉപജീവന ദൗത്യത്തിന്റെ ഭാഗമായി ഉൾപ്പെട്ട കുടുംബങ്ങളുടെ ശരാശരി വരുമാനം 49 ശതമാനം വർധിച്ചതായി നീതി ആയോഗിന്റെ വിലയിരുത്തൽ റിപ്പോർട്ട്. 2025–26 സാമ്പത്തിക വർഷത്തിൽ കേന്ദ്ര ഗ്രാമീണ മേഖലാ പദ്ധതികളെക്കുറിച്ച് നടത്തിയ പഠനത്തിലാണ് കണ്ടെത്തൽ. 11 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലുമായി 36 ജില്ലകളിലെ 216 ഗ്രാമങ്ങളിൽ താമസിക്കുന്ന 2,206 ഗ്രാമീണ കുടുംബങ്ങളെയാണ് പഠനത്തിൽ ഉൾപ്പെടുത്തിയത്.

നീതി ആയോഗിന് കീഴിലുള്ള വികസന നിരീക്ഷണ-വിലയിരുത്തൽ ഓഫീസ് വഴിയാണ് കേന്ദ്ര സർക്കാർ പഠനം നടത്തിയത്. പദ്ധതിയിലൂടെ പത്ത് കോടിയിലേറെ ഗ്രാമീണ കുടുംബങ്ങളെ ഏകദേശം 92 ലക്ഷം സ്വയംസഹായ സംഘങ്ങളിലേക്ക് എത്തിച്ചതായാണ് റിപ്പോർട്ട്. സ്ത്രീകളുടെ ആത്മവിശ്വാസം, സാമ്പത്തിക സേവനങ്ങളിലേക്കുള്ള പ്രവേശനം, വരുമാന അവസരങ്ങൾ എന്നിവ മെച്ചപ്പെട്ടതായും പഠനം കണ്ടെത്തി. ദാരിദ്ര്യനിർമാർജനം, സ്ത്രീശാക്തീകരണം, സാമ്പത്തിക ഉൾക്കൊള്ളൽ എന്നീ ദേശീയ ലക്ഷ്യങ്ങളുമായി പദ്ധതി ചേർന്നുനിൽക്കുന്നതായും വിലയിരുത്തി.

സ്ത്രീകളുടെ നേതൃത്വത്തിലുള്ള സംരംഭങ്ങൾ തയ്യൽ, ആടുവളർത്തൽ, കാർഷിക വ്യാപാരം തുടങ്ങിയ മേഖലകളിലേക്ക് വ്യാപിച്ചതും ഗ്രാമീണ കുടുംബങ്ങളുടെ വരുമാന മാർഗങ്ങൾ ശക്തിപ്പെടുത്തിയതായും റിപ്പോർട്ട് പറയുന്നു. സ്വയംസഹായ സംഘങ്ങളുടെ വായ്പകൾ പ്രധാനമായും ഉപജീവന പ്രവർത്തനങ്ങൾക്കാണ് ഉപയോഗിക്കുന്നത്. വായ്പാ തിരിച്ചടവിലെ നിഷ്‌ക്രിയ ആസ്തി നിരക്ക് നിലവിൽ 1.85 ശതമാനമാണെന്നും സർക്കാർ അറിയിച്ചു. പദ്ധതിയുടെ നിരീക്ഷണം കൂടുതൽ ശക്തമാക്കാനും കുടുംബങ്ങളുടെ വാർഷിക വരുമാനം പിന്തുടരാനും വിവിധ സംവിധാനങ്ങളും ഏർപ്പെടുത്തിയിട്ടുണ്ട്.

സ്ത്രീകളുടെ ആത്മവിശ്വാസത്തിൽ വലിയ മാറ്റം

പഠനത്തിൽ പങ്കെടുത്ത സ്ത്രീകളിൽ 58 ശതമാനം പേർ ആത്മവിശ്വാസം വർധിച്ചതായി അറിയിച്ചു. 52 ശതമാനം പേർക്ക് വരുമാനം നേടാനുള്ള പുതിയ അവസരങ്ങൾ ലഭിച്ചു. 46 ശതമാനം സ്ത്രീകൾക്ക് സ്വന്തം ബാങ്കിങ് ഇടപാടുകൾ സ്വതന്ത്രമായി കൈകാര്യം ചെയ്യാനും കഴിഞ്ഞതായി റിപ്പോർട്ട് പറയുന്നു.

വായ്പയുടെ വലിയ പങ്കും ഉപജീവനത്തിന്

ആദ്യ വായ്പയുടെ ഉപയോഗം വ്യക്തമാക്കിയവരിൽ 34 ശതമാനം പേർ പുതിയ ഉപജീവന പ്രവർത്തനം തുടങ്ങാനാണ് പണം വിനിയോഗിച്ചത്. 29.1 ശതമാനം പേർ നിലവിലുള്ള ഉപജീവന പ്രവർത്തനങ്ങൾ വികസിപ്പിക്കാൻ വായ്പ ഉപയോഗിച്ചു. സംഘതല പ്രവർത്തനം തുടങ്ങിയ സ്വയംസഹായ സംഘങ്ങളിൽ 51.7 ശതമാനം സംഘങ്ങളും അതിനായി വായ്പ എടുത്തിട്ടുണ്ട്.

ഗ്രാമങ്ങളുടെ സാമൂഹിക മാറ്റത്തിലും പങ്ക്

പഠനത്തിൽ പങ്കെടുത്തവരിൽ 75 ശതമാനം പേർ സ്വയംസഹായ സംഘങ്ങൾ ഗ്രാമങ്ങളിലെ സാമൂഹിക-സാമുദായിക വികസനത്തിന് സഹായിച്ചതായി അഭിപ്രായപ്പെട്ടു. 54.6 ശതമാനം പേർ ദുർബല വിഭാഗങ്ങളിലെയും ദരിദ്ര കുടുംബങ്ങളിലെയും സ്ത്രീകളെ സ്വയംസഹായ സംഘങ്ങളിലേക്ക് എത്തിക്കുന്ന പ്രവർത്തനങ്ങളിൽ പങ്കെടുത്തതായും അറിയിച്ചു.

വായ്പാ നിരീക്ഷണത്തിന് വിപുലമായ സംവിധാനം

മൂന്നാം കക്ഷി വിലയിരുത്തൽ, ലോകോസ് സംവിധാനം വഴിയുള്ള തത്സമയ നിരീക്ഷണം, വിവരങ്ങളുടെ കാലാകാല പരിശോധന, ഫീൽഡ് തല പരിശോധന, ഫലാധിഷ്ഠിത വിലയിരുത്തൽ എന്നിവ ഉൾപ്പെടുന്ന നിരീക്ഷണ-പഠന സംവിധാനം പദ്ധതിക്കുണ്ട്. റിവോൾവിങ് ഫണ്ട്, കമ്മ്യൂണിറ്റി ഇൻവെസ്റ്റ്മെന്റ് ഫണ്ട്, കമ്മ്യൂണിറ്റി എന്റർപ്രൈസ് ഫണ്ട് എന്നിവയുടെ വിതരണം, വിനിയോഗം എന്നിവയും നിരീക്ഷിക്കുന്നുണ്ട്.

55,371 ബാങ്ക് സഖിമാർ സേവനത്തിൽ

സ്വയംസഹായ സംഘങ്ങൾക്ക് ഔദ്യോഗിക ബാങ്ക് വായ്പ ലഭ്യമാക്കാൻ ബാങ്ക് സഖിമാരും മറ്റ് സാമൂഹിക പ്രവർത്തകരും സഹായിക്കുന്നു. ഉപഭോക്തൃ തിരിച്ചറിയൽ നടപടികൾ, ബാങ്ക് അക്കൗണ്ട് നടപടികൾ, വായ്പാ സഹായം എന്നിവയും ഇവർ നൽകുന്നു. സമൂഹാധിഷ്ഠിത വായ്പാ തിരിച്ചടവ് സംവിധാനം 62,946 ബാങ്ക് ശാഖകളിൽ പ്രവർത്തിക്കുന്നുണ്ട്. വിവിധ ബാങ്ക് ശാഖകളിൽ 55,371 ബാങ്ക് സഖിമാരെയും നിയോഗിച്ചിട്ടുണ്ട്. സ്വയംസഹായ കുടുംബങ്ങളുടെ വാർഷിക വരുമാനം ജില്ല, സംസ്ഥാന അടിസ്ഥാനത്തിൽ നിരീക്ഷിക്കാൻ ലക്ഷ്പതി ദീദി പോർട്ടലും സർക്കാർ സ്ഥാപിച്ചിട്ടുണ്ട്. ഗ്രാമവികസന സഹമന്ത്രി ഡോ. ചന്ദ്രശേഖർ പെമ്മസാനി രാജ്യസഭയിൽ നൽകിയ എഴുത്തുപരമായ മറുപടിയിലാണ് ഈ വിവരങ്ങൾ അറിയിച്ചത്.

.