ന്യൂഡൽഹി, ജൂലൈ 9-

ഇ20 പെട്രോൾ ഉപയോഗത്തിനെതിരെയുള്ള വിമർശനങ്ങളെയും ആശങ്കകളെയും പൂർണ്ണമായി തള്ളി കേന്ദ്ര റോഡ് ഗതാഗത, ദേശീയപാത മന്ത്രി നിതിൻ ഗഡ്കരി. 20 ശതമാനം എതനോൾ കലർത്തിയ പെട്രോൾ ഉപയോഗിച്ചതു കൊണ്ട് രാജ്യത്ത് ഏതെങ്കിലും ഒരു കാറിനെങ്കിലും തകരാറുണ്ടായതായി ചൂണ്ടിക്കാണിക്കാൻ കഴിയുമോ എന്ന് അദ്ദേഹം വിമർശകരോട് ചോദിച്ചു. ‘വികസിത് ഭാരത് കോൺക്ലേവിൽ’ സംസാരിക്കുകയായിരുന്നു മന്ത്രി.

ഇ20 പെട്രോൾ ഉപയോഗിച്ചാൽ വാഹനങ്ങളുടെ ഇന്ധനക്ഷമത കുറയുമെന്നും എഞ്ചിന് കേടുപാടുകൾ സംഭവിക്കുമെന്നുമുള്ള പ്രചാരണങ്ങൾ അടിസ്ഥാനരഹിതമാണ്. പ്രത്യേക താല്പര്യങ്ങളോടെ പണം നൽകി നടത്തുന്ന വ്യാജപ്രചാരണങ്ങളാണിതെന്നും ഗഡ്കരി ആരോപിച്ചു. ഇന്ത്യ ഇന്ധന ഇറക്കുമതിക്കായി മാത്രം പ്രതിവർഷം 22 ലക്ഷം കോടി രൂപയോളമാണ് ചെലവഴിക്കുന്നത്. ഈ സാഹചര്യത്തിൽ പരിസ്ഥിതിസൗഹൃദ ഇന്ധനങ്ങളിലേക്ക് രാജ്യം മാറുകയെന്നത് അനിവാര്യമാണെന്നും അദ്ദേഹം കൂട്ടിച്ചേർത്തു.

പെട്രോളിൽ 20 ശതമാനം എതനോൾ കലർത്തുകയെന്ന ലക്ഷ്യം ഇന്ത്യ ഇതിനകം തന്നെ കൈവരിച്ചിട്ടുണ്ട്. കരിമ്പ്, ചോളം, അരി തുടങ്ങിയ ജൈവവസ്തുക്കളിൽ നിന്നാണ് എതനോൾ ഉത്പാദിപ്പിക്കുന്നത്. പരമ്പരാഗത പെട്രോളിനേക്കാൾ അന്തരീക്ഷ മലിനീകരണം കുറഞ്ഞ ബദൽ ഇന്ധനമാണിത്. ഇന്ധന ഇറക്കുമതിച്ചെലവ് ചുരുക്കാനും കാർബൺ പുറന്തള്ളൽ കുറയ്ക്കാനും ഈ നയം സഹായിക്കുമെന്നാണ് കേന്ദ്ര സർക്കാരിന്റെ വിലയിരുത്തൽ.

വിമർശകർക്ക് നേരിട്ട് വെല്ലുവിളി

ഇ20 പെട്രോൾ മൂലം രാജ്യത്ത് ഒരു വാഹനത്തിന് പോലും കേടുപാടുകൾ സംഭവിച്ചിട്ടില്ലെന്ന് മന്ത്രി വ്യക്തമാക്കി. ഇത്തരത്തിൽ ഇന്ധനം അടിച്ച് തകരാറിലായ ഒരൊറ്റ കാറെങ്കിലും ഉണ്ടെങ്കിൽ അതിന്റെ വിവരങ്ങൾ പുറത്തുവിടാൻ വിമർശകരെ അദ്ദേഹം വെല്ലുവിളിച്ചു.

നേട്ടം കർഷകർക്കും

ചോളത്തിൽ നിന്ന് എതനോൾ നിർമ്മിക്കാൻ തുടങ്ങിയതോടെ കർഷകരുടെ വരുമാനത്തിൽ വൻ വർധനവുണ്ടായതായി ഗഡ്കരി ചൂണ്ടിക്കാട്ടി. ചോളത്തിന്റെ വില ക്വിന്റലിന് 1,200 രൂപയിൽ നിന്ന് 2,800 രൂപയായി ഉയർന്നു. ഉത്തർപ്രദേശ്, ബിഹാർ തുടങ്ങിയ സംസ്ഥാനങ്ങളിലെ കർഷകർക്ക് ഇതിലൂടെ 45,000 കോടി രൂപയുടെ അധിക വരുമാനമാണ് ലഭിച്ചതെന്നും അദ്ദേഹം പറഞ്ഞു.

കുടുംബ ബിസിനസ് ആരോപണം അടിസ്ഥാനരഹിതം

എതനോൾ നയത്തിന് പിന്നിൽ തന്റെ കുടുംബത്തിന്റെ ബിസിനസ് താല്പര്യങ്ങളുണ്ടെന്ന ആരോപണവും മന്ത്രി നിഷേധിച്ചു. കുടുംബാംഗങ്ങൾക്ക് പഞ്ചസാര ഫാക്ടറികൾ ഉണ്ടെന്നത് നേരാണ്, എന്നാൽ അവയൊന്നും എതനോൾ ഉത്പാദനത്തെ ആശ്രയിച്ചല്ല നിലനിൽക്കുന്നതെന്ന് അദ്ദേഹം വിശദീകരിച്ചു.

ബദൽ ഇന്ധനങ്ങൾക്ക് കൂടുതൽ മുൻഗണന

ഇ85, ഇ100, ബി100 ബയോഡീസൽ, ഹൈഡ്രജൻ-സി.എൻ.ജി മിശ്രിതങ്ങൾ തുടങ്ങിയ ബദൽ ഇന്ധനങ്ങളുടെ ഉപയോഗം വിപുലമാക്കാൻ 1989-ലെ കേന്ദ്ര മോട്ടോർ വാഹന ചട്ടത്തിൽ ഭേദഗതി വരുത്താൻ നിർദേശിച്ചിട്ടുണ്ട്. എല്ലാ വിഭാഗം വാഹനങ്ങളിലും ഫ്ലെക്സ് ഫ്യൂവൽ, ജൈവ ഇന്ധന സാങ്കേതികവിദ്യകൾ പ്രോത്സാഹിപ്പിക്കാനാണ് സർക്കാർ ലക്ഷ്യമിടുന്നത്.