ദുബായ്, 2026 ജൂലൈ 8-

ആഗോള എണ്ണവ്യാപാരത്തിന്റെ പ്രധാന നാവികപാതയായ ഹോർമുസ് കടലിടുക്കിൽ വീണ്ടും കപ്പലുകൾക്ക് നേരെ ആക്രമണം. ചൊവ്വാഴ്ച മൂന്ന് വാണിജ്യ ടാങ്കറുകൾക്ക് നേരെ പ്രൊജക്ടൈൽ (അജ്ഞാത വസ്തുക്കൾ) പതിച്ചതായി ബ്രിട്ടീഷ് സൈന്യം സ്ഥിരീകരിച്ചു. മേഖലയിലെ കപ്പൽ ഗതാഗതം പുനഃസ്ഥാപിക്കാൻ അന്താരാഷ്ട്ര തലത്തിൽ ശ്രമങ്ങൾ തുടരുന്നതിനിടെയാണ് ആശങ്കയുണർത്തുന്ന പുതിയ സംഭവം.

ഒമാൻ തീരത്ത് കപ്പലിന് തീപിടിച്ചു; ഇറാനെതിരെ സംശയം

ആക്രമണത്തിനിരയായ കപ്പലുകളിലൊന്ന് ഒമാൻ തീരത്തിന് സമീപമാണ് യാത്ര ചെയ്തിരുന്നത്. പ്രൊജക്ടൈൽ കപ്പലിന്റെ ഇടതുഭാഗത്ത് (പോർട്ട് സൈഡ്) പതിച്ചതിനെത്തുടർന്ന് തീപിടിത്തമുണ്ടായതായി യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് (UKMTO) അറിയിച്ചു. ചരക്കുകപ്പലുകൾക്ക് നൽകിയ മുന്നറിയിപ്പുകൾ അവഗണിച്ചതിനെത്തുടർന്നാണ് ദ്രവീകൃത പ്രകൃതി വാതക (LNG) ടാങ്കറിന് നേരെ ആക്രമണമുണ്ടായതെന്ന് ഇറാനിയൻ സ്റ്റേറ്റ് ടെലിവിഷൻ റിപ്പോർട്ട് ചെയ്തു. എന്നാൽ, ആക്രമണത്തിന്റെ ഉത്തരവാദിത്വം ഇറാൻ ഔദ്യോഗികമായി ഏറ്റെടുത്തിട്ടില്ല.

ഡ്രോൺ ആക്രമണമെന്ന് റിപ്പോർട്ട്; കപ്പലുകൾക്ക് നാശനഷ്ടം

മറ്റു രണ്ട് ടാങ്കറുകൾക്ക് നേരെയും സമാനമായ രീതിയിൽ ആക്രമണമുണ്ടായി. ഇതിലൊന്നിൽ ഡ്രോൺ ഉപയോഗിച്ചാണ് ആക്രമണം നടത്തിയതെന്നാണ് സൂചന. ആക്രമണത്തിൽ കപ്പലുകൾക്ക് നാശനഷ്ടങ്ങൾ സംഭവിച്ചെങ്കിലും ജീവനക്കാർക്ക് ആർക്കും പരിക്കേറ്റിട്ടില്ലെന്ന് മാരിടൈം ഏജൻസി വ്യക്തമാക്കി. ആക്രമണത്തിനിരയായ ഒരു കപ്പൽ യാത്ര തുടർന്നതായാണ് വിവരം. എന്നാൽ, ഈ കപ്പലുകൾ നിലവിൽ എവിടെയാണെന്നത് സംബന്ധിച്ച് കൃത്യമായ വിവരങ്ങൾ പുറത്തുവിട്ടിട്ടില്ല.

ആഗോള ഊർജസുരക്ഷ വീണ്ടും ആശങ്കയിൽ

ലോകത്ത് വിപണനം ചെയ്യപ്പെടുന്ന എണ്ണ, പ്രകൃതി വാതകം എന്നിവയുടെ അഞ്ചിലൊന്നും കടന്നുപോകുന്നത് തന്ത്രപ്രധാനമായ ഹോർമുസ് കടലിടുക്കിലൂടെയാണ്. അതുകൊണ്ടുതന്നെ പുതിയ ആക്രമണങ്ങൾ ആഗോള ഊർജസുരക്ഷയ്ക്കും അന്താരാഷ്ട്ര വ്യാപാരത്തിനും കനത്ത ഭീഷണിയാണ് ഉയർത്തുന്നത്. യുഎസും ഇറാനും തമ്മിലുള്ള സംഘർഷങ്ങളെത്തുടർന്നുള്ള സാമ്പത്തിക സമ്മർദ്ദങ്ങൾ ലഘൂകരിക്കാനും നാവികപാത സാധാരണ നിലയിലാക്കാനും ശ്രമങ്ങൾ നടക്കുന്നതിനിടെയാണ് ഈ തിരിച്ചടി.

അന്താരാഷ്ട്ര നിയമങ്ങളുടെ ലംഘനം; ഇറാനെതിരെ ഖത്തർ

ആക്രമണത്തെ ശക്തമായി അപലപിച്ച് ഖത്തർ രംഗത്തെത്തി. ഖത്തറിന്റെ ഉടമസ്ഥതയിലുള്ള ‘അൽ റെക്കയ്യാത്ത്’ എന്ന ടാങ്കറിനെ ലക്ഷ്യമിട്ടുണ്ടായ ആക്രമണം അന്താരാഷ്ട്ര നാവിക നിയമങ്ങളുടെയും ആഗോള ഊർജസുരക്ഷയുടെയും നഗ്നമായ ലംഘനമാണെന്ന് ഖത്തർ വിദേശകാര്യ മന്ത്രാലയ വക്താവ് മാജിദ് അൽ അൻസാരി വ്യക്തമാക്കി. സംഭവത്തിന്റെ പൂർണ്ണമായ നിയമപരമായ ഉത്തരവാദിത്വം ഇറാന് മാത്രമാണെന്നും ഖത്തർ പ്രസ്താവനയിലൂടെ അറിയിച്ചു.