ആകാശവാണിയുടെ തൊണ്ണൂറാം വാർഷിക ആഘോഷങ്ങളുടെ ഭാഗമായി ഇന്ത്യൻ സംഗീത ലോകത്തെ ഇതിഹാസങ്ങൾക്ക് ആദരമർപ്പിച്ച് ‘സ്വര പ്രേരണ വീഥി’ എന്ന പേരിൽ പ്രത്യേക ഫോട്ടോ ഗാലറി ഒരുങ്ങി. ന്യൂഡൽഹിയിലെ ആകാശവാണി ഭവനിലുള്ള രംഗ് ഭവൻ ഓഡിറ്റോറിയത്തിൽ നടന്ന പ്രൗഢഗംഭീരമായ ചടങ്ങിൽ പ്രശസ്ത പുല്ലാങ്കുഴൽ വിദഗ്ദ്ധൻ പത്മവിഭൂഷൺ പണ്ഡിറ്റ് ഹരിപ്രസാദ് ചൗരസ്യയാണ് ഈ പുതിയ ഗാലറി രാജ്യത്തിന് സമർപ്പിച്ചത്. ഇന്ത്യൻ സംഗീതത്തെ ജനകീയമാക്കുന്നതിൽ ആകാശവാണി വഹിച്ച പങ്കിന്റെയും കലാകാരന്മാരുമായുള്ള ദീർഘകാല ബന്ധത്തിന്റെയും പ്രതീകമായാണ് ഈ സംരംഭം.
തന്റെ സംഗീത യാത്രയ്ക്ക് തുടക്കമിട്ട ആകാശവാണിയിലേക്ക് ഒരു പ്രധാന അതിഥിയായി മടങ്ങിയെത്താൻ കഴിഞ്ഞത് സ്വന്തം വീട്ടിലേക്ക് തിരിച്ചെത്തിയതുപോലെയുള്ള അനുഭവമാണെന്ന് പണ്ഡിറ്റ് ഹരിപ്രസാദ് ചൗരസ്യ വൈകാരികമായി ഓർത്തെടുത്തു. രാജ്യത്തെ പരമോന്നത സിവിലിയൻ ബഹുമതികൾ നേടിയ പ്രമുഖ കലാകാരന്മാരെയാണ് ഈ ഫോട്ടോ ഗാലറിയിലൂടെ പൊതുജനങ്ങൾക്ക് മുന്നിൽ പരിചയപ്പെടുത്തുന്നത്. ഒന്നാം ഘട്ടത്തിൽ ഭാരതരത്ന ജേതാക്കളായ വിദുഷി എം.എസ്. സുബ്ബലക്ഷ്മി, ഉസ്താദ് ബിസ്മില്ലാ ഖാൻ, പണ്ഡിറ്റ് ഭീംസെൻ ജോഷി എന്നിവരുൾപ്പെടെയുള്ള ഇരുപത് പ്രശസ്ത സംഗീതജ്ഞരുടെ ചിത്രങ്ങളാണ് ഇവിടെ പ്രദർശിപ്പിച്ചിട്ടുള്ളത്.
ഭാവി തലമുറയിലെ കലാകാരന്മാർക്കും സംഗീത പ്രേമികൾക്കും വലിയൊരു പ്രചോദനമായി മാറാൻ ഈ പദ്ധതിക്ക് സാധിക്കുമെന്നാണ് അധികൃതർ വിലയിരുത്തുന്നത്. 2027-ൽ ഇന്ത്യയിലെ റേഡിയോ സംപ്രേഷണത്തിന്റെ നൂറാം വാർഷികം ആഘോഷിക്കാൻ ഒരുങ്ങുന്ന വേളയിലാണ് ആകാശവാണി ഈ പുതിയ നാഴികക്കല്ല് പിന്നിട്ടത്. കൂടാതെ ഹിന്ദുസ്ഥാനി ക്ലാസിക്കൽ സംഗീതത്തിനായി ‘രാഗം’, ഭക്തിഗാനങ്ങൾക്കായി ‘ആരാധന’ എന്നീ ഡിജിറ്റൽ ചാനലുകൾ യൂട്യൂബ്, ന്യൂസ് ഓൺ എയർ ആപ്പ്, വേവ്സ് ഒടിടി പ്ലാറ്റ്ഫോം എന്നിവയിലൂടെ വരും ദിവസങ്ങളിലും സജീവമായി മുന്നോട്ട് കൊണ്ടുപോകുമെന്നും അധികൃതർ അറിയിച്ചു.
