തിരുവനന്തപുരം, 2026 ജൂൺ 28 –
തിരുവനന്തപുരം കോർപറേഷനിൽ യുഡിഎഫിന്റെ അവിശ്വാസ പ്രമേയ നീക്കം വിജയിക്കാതിരുന്നതിന് പിന്നാലെ മേയർ വി. വി. രാജേഷും കോൺഗ്രസ് നേതാവ് കെ. എസ്. ശബരീനാഥനും തമ്മിൽ സമൂഹമാധ്യമങ്ങളിൽ വാക്കുപോര്. ശബരീനാഥനെ പരിഹസിച്ച് മേയർ നടത്തിയ പരാമർശത്തിന് അതേ നാണയത്തിൽ മറുപടി നൽകുകയായിരുന്നു ശബരീനാഥൻ.
ശബരീനാഥൻ ഒരാഴ്ചയായി മഴയത്ത് ആന്തൂറിയം പൂവുമായി നിൽക്കുകയാണെന്നും, എൽഡിഎഫ് പ്രതിനിധി അവലോസ് ഉണ്ട നൽകാൻ തയാറാകുന്നില്ലെന്നുമായിരുന്നു മേയർ വി. വി. രാജേഷിന്റെ പരിഹാസം. ഇതിന് മറുപടിയായി, ആന്തൂറിയം പൂവിനെയും അവലോസ് ഉണ്ടയെയും കുറിച്ചുള്ള “ക്രിഞ്ച് കോമഡി” നല്ല ബോറായെന്ന് ശബരീനാഥൻ ഫെയ്സ്ബുക്കിൽ കുറിച്ചു. അതിനൊപ്പം, നഗരസഭയിൽ അധികാരത്തിലെത്തി 45 ദിവസത്തിനകം മാസ്റ്റർ പ്ലാൻ കൊണ്ടുവരുമെന്ന വാഗ്ദാനം, കേന്ദ്ര ബജറ്റിൽ പ്രഖ്യാപിക്കുമെന്ന് പറഞ്ഞ വികസന പദ്ധതികൾ, തിരുവനന്തപുരത്ത് ഒളിമ്പിക്സ് വേദി ഒരുക്കുമെന്ന പ്രഖ്യാപനം എന്നിവ എന്തായെന്ന് അദ്ദേഹം ചോദിച്ചു.
തിരുവനന്തപുരം കോർപറേഷനിലെ അവിശ്വാസ പ്രമേയവുമായി ബന്ധപ്പെട്ട രാഷ്ട്രീയ സംഭവവികാസങ്ങൾക്ക് പിന്നാലെയാണ് ഈ സമൂഹമാധ്യമ പ്രതികരണങ്ങൾ. രാഷ്ട്രീയ വിമർശനം ഇത്തവണ പരിഹാസ പോസ്റ്റുകളിലൂടെയും മറുപടി പോസ്റ്റുകളിലൂടെയും പുതിയ തലത്തിലേക്ക് കടന്നിരിക്കുകയാണ്.
വി.വി. രാജേഷിന്റെ പരിഹാസവാചകം ഇങ്ങനെ
“ശബരീനാഥൻ തോട്ടത്തിൽ നിന്ന് ഒരു ആന്തൂറിയം പറിച്ച് അങ്ങോട്ട് കൊടുക്കുമ്പോൾ ദീപു പോയി ഒരു അവലോസ് ഉണ്ട വാങ്ങിക്കൊടുത്താൽ തീരുന്ന പ്രശ്നമേ ഇപ്പോഴുള്ളൂ.”
ഈ പരാമർശത്തിന് മറുപടിയായാണ് കെ. എസ്. ശബരീനാഥൻ ഫെയ്സ്ബുക്ക് പോസ്റ്റിൽ “ആന്തൂറിയവും അവലോസ് ഉണ്ടയും ചേർത്തുള്ള ക്രിഞ്ച് കോമഡി ബോറായി” എന്ന് പ്രതികരിക്കുകയും, നഗരസഭയുടെ വികസന വാഗ്ദാനങ്ങൾ എന്തായെന്ന് ചോദ്യം ചെയ്യുകയും ചെയ്തത്
