കൊച്ചി, 2026 ജൂൺ 26 –

കൊച്ചി കലൂർ ജോർജ് ഈഡൻ റോഡിലെ ഹൈബി ഈഡൻ എംപിയുടെ വീട്ടിൽ അതിക്രമിച്ച് കയറി വധഭീഷണി മുഴക്കിയ കേസിൽ മുൻ സഹപാഠിയായ തൃപ്പൂണിത്തുറ സ്വദേശി അലക്സ് ചാക്കോ (43) അറസ്റ്റിലായി. 2026 ജൂൺ 25 പുലർച്ചെ രണ്ടേമുക്കാലോടെയായിരുന്നു സംഭവം. പാലാരിവട്ടം പൊലീസ് പ്രതിയെ അറസ്റ്റ് ചെയ്ത് കോടതിയിൽ ഹാജരാക്കി.

വീടിന്റെ ജപ്തി നടപടികൾ എംപി ഇടപെട്ട് തടയണമെന്ന് അലക്സ് ചാക്കോ ആവശ്യപ്പെട്ടിരുന്നതായി പൊലീസ് പറഞ്ഞു. ബാങ്കിന്റെ നടപടികളിൽ ഇടപെടാൻ പരിമിതിയുണ്ടെന്ന് എംപി അറിയിച്ചതാണ് പ്രകോപനത്തിന് കാരണമായതെന്നാണ് അന്വേഷണ വിവരം. തുടർന്ന് എംപിയെ കൊല്ലുമെന്ന് വിളിച്ച് ഭീഷണിപ്പെടുത്തുകയും രാത്രി 12.45ന് ഹൈബി ഈഡന്റെയും ഭാര്യ അന്ന ലിൻഡയുടെയും വാട്സ്ആപ്പ് നമ്പറുകളിലേക്ക് ഭീഷണി സന്ദേശങ്ങൾ അയച്ച ശേഷമാണ് വീട്ടിലെത്തിയതെന്ന് പൊലീസ് വ്യക്തമാക്കി.

ഭീഷണിക്ക് പിന്നാലെ വീട്ടുമുറ്റത്തെ പൂച്ചട്ടികൾ തകർത്തു

വീട്ടിലെത്തിയ പ്രതി മുപ്പതോളം സെറാമിക് പൂച്ചട്ടികൾ അടിച്ചുതകർത്തതായി പൊലീസ് അറിയിച്ചു. പുലർച്ചെ ശബ്ദം കേട്ട് പുറത്തിറങ്ങി നോക്കിയപ്പോൾ ഒരു കാർ അതിവേഗത്തിൽ റിവേഴ്സ് എടുത്ത് പോകുന്നതാണ് എംപിയും ഭാര്യയും കണ്ടത്. പിന്നീട് രാവിലെയാണ് പൂച്ചട്ടികൾ തകർന്നുകിടക്കുന്നത് ശ്രദ്ധയിൽപ്പെട്ടത്.