സേവന മേഖലയുടെ ഉൽപ്പാദന സൂചിക ജൂലൈയിൽ; പ്രതിമാസ പരീക്ഷണ സൂചികകൾ പതിനാലിന്

ന്യൂഡൽഹി, 2026 ജൂൺ 25 

സേവന മേഖലയുടെ ഹ്രസ്വകാല വളർച്ച അളക്കാൻ പുതിയ സേവന ഉൽപ്പാദന സൂചിക ജൂലൈ മുതൽ അവതരിപ്പിക്കാൻ സ്ഥിതിവിവരക്കണക്ക്, പദ്ധതി നിർവഹണ മന്ത്രാലയം തയ്യാറെടുക്കുന്നു. വ്യവസായ ഉൽപ്പാദന സൂചികയ്ക്ക് സമാനമായ ഈ പുതിയ സൂചിക ഔപചാരിക സേവന മേഖലയെ ഉൾപ്പെടുത്തി എല്ലാ മാസവും പ്രസിദ്ധീകരിക്കും. ആദ്യ പരീക്ഷണ പ്രതിമാസ സൂചികകൾ ഇരുപതിനാലും ഇരുപത്തിയഞ്ചും സാമ്പത്തിക വർഷത്തിനും രണ്ടായിരത്തി ഇരുപത്തിയാറ് ഏപ്രിൽ മാസത്തിനുമുള്ളവയും ജൂലൈ പതിനാലിന് പുറത്തിറക്കും.

ഈ സൂചികയുടെ ആശയപരവും രീതിശാസ്ത്രപരവുമായ ചട്ടക്കൂട് തയ്യാറാക്കാൻ സാങ്കേതിക ഉപദേശക സമിതി രൂപീകരിച്ചിരുന്നു. സമിതിയുടെ ശുപാർശകളുടെ അടിസ്ഥാനത്തിൽ സമീപന രേഖ പൊതുജന അഭിപ്രായത്തിനായി പ്രസിദ്ധീകരിക്കുകയും ചെയ്തു. മൊത്തം സേവന ഉൽപ്പാദന സൂചികയ്ക്കൊപ്പം മൊത്തവ്യാപാരം, ചില്ലറവ്യാപാരം, ഗതാഗതം, ബാങ്കിങ്, ഇൻഷുറൻസ്, ദൂരസമ്പർക്കം, ഹോട്ടലുകൾ, റസ്റ്റോറന്റുകൾ, റിയൽ എസ്റ്റേറ്റ്, പ്രൊഫഷണൽ സേവനങ്ങൾ തുടങ്ങി വിവിധ ഉപമേഖലകളുടെയും പരീക്ഷണ സൂചികകൾ പുറത്തിറക്കും. ആരോഗ്യം, വിദ്യാഭ്യാസം എന്നീ ഉപമേഖലകൾ പിന്നീട് ഉൾപ്പെടുത്താനാണ് തീരുമാനം.

രണ്ടായിരത്തി ഇരുപത്തിനാല്‍ ഇരുപത്തിയഞ്ചാണ് അടിസ്ഥാന വർഷമായി തെരഞ്ഞെടുത്തിരിക്കുന്നത്. സേവന മേഖല രാജ്യത്തിന്റെ മൊത്തം മൂല്യവർധനയിൽ രണ്ടായിരത്തി പതിമൂന്ന് പതിനാലു മുതൽ അൻപത് ശതമാനത്തിലധികം സംഭാവന ചെയ്യുന്ന സാഹചര്യത്തിലാണ് ഈ പുതിയ സൂചിക അവതരിപ്പിക്കുന്നത്. പരീക്ഷണ ഘട്ടം പൂർത്തിയായ ശേഷം പ്രതിമാസ സൂചികകൾ ഏകദേശം അറുപത് ദിവസത്തെ ഇടവേളയിൽ എല്ലാ മാസവും ഇരുപത്തിയൊൻപതാം തീയതിയോ അടുത്ത പ്രവൃത്തി ദിവസമോ പ്രസിദ്ധീകരിക്കും. ഇതിന്റെ രീതിശാസ്ത്രം വിശദീകരിക്കുന്ന ചോദ്യോത്തര പുസ്തകവും മന്ത്രാലയം പുറത്തിറക്കിയിട്ടുണ്ട്.