കൊച്ചി, 2026 ജൂൺ 23 –

ഞാറക്കൽ പൊലീസ് സ്റ്റേഷനിൽ 16 വയസ്സുകാരനെ എസ്‌ഐ മുഖത്തടിച്ചതായി പരാതി. ഞാറക്കൽ സ്റ്റേഷനിലെ എസ്‌ഐ അരുണ്‍ എ.എസിനെതിരെയാണ് കുട്ടിയുടെ പിതാവ് പരാതി നൽകിയത്. മുത്തശ്ശിക്കൊപ്പം സ്റ്റേഷനിലെത്തിയ കുട്ടിയെ യാതൊരു കാരണവുമില്ലാതെ മർദിച്ചെന്നാണ് ആരോപണം.

ഒരു വീട്ടമ്മയുടെ സ്വർണമാല നഷ്ടപ്പെട്ടെന്ന പരാതിയെ തുടർന്നാണ് പൊലീസ് അന്വേഷണം നടത്തിയത്. പ്രദേശത്തെ ഓട്ടോ ഡ്രൈവർമാരിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ കുട്ടിയുടെ മുത്തശ്ശിയെ സ്റ്റേഷനിലേക്ക് വിളിച്ചുവരുത്തുകയായിരുന്നു. വെളിയത്താൻപറമ്പ് ജംഗ്ഷനിൽ നിന്ന് എന്തോ എടുത്തതായി കണ്ടെന്നായിരുന്നു മൊഴി. എന്നാൽ ബാങ്കിലേക്ക് പോകുന്നതിനിടെ കൈവശമുണ്ടായിരുന്ന പണം താഴെ വീണതും അത് എടുത്തതുമാണെന്ന് വയോധിക വിശദീകരിച്ചു.

തുടർന്ന് വയോധികയുടെ മൊബൈൽ ഫോൺ എസ്‌ഐ പരിശോധിച്ചു. കേൾവിശക്തി കുറവായതിനാൽ എസ്‌ഐയുടെ ചോദ്യങ്ങൾക്ക് മറുപടി പറഞ്ഞത് കുട്ടിയായിരുന്നു. ഇതിന് പിന്നാലെ യാതൊരു പ്രകോപനവുമില്ലാതെ എസ്‌ഐ കുട്ടിയുടെ മുഖത്തടിച്ചെന്നാണ് പരാതിയിൽ പറയുന്നത്. പിന്നീട് മാല നഷ്ടപ്പെട്ട സ്ത്രീ സ്റ്റേഷനിൽ എത്തിയെങ്കിലും വിഷയത്തിൽ കൂടുതൽ ചോദ്യങ്ങളൊന്നും പൊലീസ് ചോദിച്ചില്ലെന്നും കുടുംബം ആരോപിക്കുന്നു.

മർദനത്തെ തുടർന്ന് ചെവിവേദന അനുഭവപ്പെട്ട കുട്ടിയെ ഞാറക്കൽ താലൂക്ക് ആശുപത്രിയിൽ പ്രവേശിപ്പിച്ചു. സംഭവത്തിൽ ആഭ്യന്തരമന്ത്രി, ഹോം സെക്രട്ടറി, സംസ്ഥാന പൊലീസ് മേധാവി എന്നിവർക്കാണ് കുട്ടിയുടെ പിതാവ് പരാതി നൽകിയത്. അതേസമയം, കുട്ടിയെ മർദിച്ചെന്ന ആരോപണം ഞാറക്കൽ പൊലീസ് നിഷേധിച്ചിട്ടുണ്ട്.