ഇന്ത്യൻ തീരസംരക്ഷണ സേനയുടെ നേതൃത്വത്തിൽ രാജ്യവ്യാപകമായി ‘യോഗ സംഗമം 2026’ സംഘടിപ്പിച്ചു

നോയിഡ, 2026 ജൂൺ 21

പന്ത്രണ്ടാമത് അന്താരാഷ്ട്ര യോഗ ദിനത്തോടനുബന്ധിച്ച് ഇന്ത്യൻ തീരസംരക്ഷണ സേന രാജ്യവ്യാപകമായി ‘യോഗ സംഗമം 2026’ സംഘടിപ്പിച്ചു. ആരോഗ്യകരമായ വാർധക്യത്തിനായുള്ള യോഗം എന്ന ഈ വർഷത്തെ പ്രമേയത്തോട് ചേർന്നായിരുന്നു പരിപാടി. രാജ്യത്തെ എല്ലാ തീരസംരക്ഷണ സേനാ കപ്പലുകളിലും സ്ഥാപനങ്ങളിലുമായി ഏകോപിത യോഗ പരിശീലനങ്ങൾ നടന്നു. ആയിരക്കണക്കിന് ഉദ്യോഗസ്ഥരും അവരുടെ കുടുംബാംഗങ്ങളും പങ്കെടുത്തു.

പരിശീലനം ലഭിച്ച യോഗ അധ്യാപകരുടെ നേതൃത്വത്തിലായിരുന്നു പരിപാടികൾ. യോഗാസനങ്ങൾ, പ്രാണായാമം, ധ്യാനം എന്നിവ ഉൾപ്പെടുത്തിയ പരിശീലനങ്ങളാണ് നടന്നത്. ദൈനംദിന ജീവിതത്തിൽ എളുപ്പത്തിൽ ഉൾപ്പെടുത്താവുന്ന യോഗ രീതികൾക്ക് പ്രത്യേക പ്രാധാന്യം നൽകി. ശാരീരിക ക്ഷമത, മാനസിക തെളിച്ചം, വൈകാരിക സന്തുലിതാവസ്ഥ, സമ്മർദ്ദ നിയന്ത്രണം, പ്രവർത്തനക്ഷമത എന്നിവ മെച്ചപ്പെടുത്തുകയാണ് ലക്ഷ്യമെന്ന് അധികൃതർ വ്യക്തമാക്കി.

പ്രധാന പരിപാടി നോയിഡയിലെ ഇന്ത്യൻ തീരസംരക്ഷണ സേനാ സമുച്ചയത്തിൽ മൊറാർജി ദേശായി ദേശീയ യോഗ ഇൻസ്റ്റിറ്റ്യൂട്ടിന്റെ സഹകരണത്തോടെ നടന്നു. ഇന്ത്യൻ തീരസംരക്ഷണ സേനാ ഡയറക്ടർ ജനറൽ പരമേഷ് ശിവമണിയും ആയിരത്തിലധികം ഉദ്യോഗസ്ഥരും കുടുംബാംഗങ്ങളും ചടങ്ങിൽ പങ്കെടുത്തു. പ്രവർത്തന ചുമതലകൾ നിർവഹിക്കുന്നവർക്ക് ശാരീരിക ഊർജവും മാനസിക ആരോഗ്യവും തൊഴിൽ കാര്യക്ഷമതയും നിലനിർത്താൻ യോഗ ഒരു ശക്തമായ ഉപകരണമാണെന്ന് ഡയറക്ടർ ജനറൽ പറഞ്ഞു. തീരപ്രദേശങ്ങളുടെ സുരക്ഷയ്ക്കായി പ്രവർത്തിക്കുന്ന ജീവനക്കാരുടെയും അവരുടെ കുടുംബങ്ങളുടെയും ആരോഗ്യത്തിനും ജീവിത നിലവാരത്തിനുമുള്ള സേനയുടെ പ്രതിബദ്ധതയുടെ തെളിവാണ് ‘യോഗ സംഗമം 2026’ എന്നും അദ്ദേഹം വ്യക്തമാക്കി.