ഓംകാരേശ്വർ, 2026 ജൂൺ 19

മധ്യപ്രദേശിലെ ഓംകാരേശ്വറിൽ അന്താരാഷ്ട്ര സിക്കിൾ സെൽ ദിനാചരണ പരിപാടിയിൽ രാഷ്ട്രപതി ദ്രൗപദി മുർമു പങ്കെടുത്തു. ജൂൺ 19ന് നടന്ന പരിപാടിയിൽ ആരോഗ്യ മേഖലയിലെ പ്രധാന വെല്ലുവിളികളിലൊന്നായ സിക്കിൾ സെൽ രോഗത്തെ നേരിടാനുള്ള ശ്രമങ്ങൾക്ക് അവർ പ്രാധാന്യം നൽകി. ദേശീയ സിക്കിൾ സെൽ നിർമാർജന ദൗത്യത്തിന്റെ ഭാഗമായി നിശ്ചയിച്ച പരിശോധനാ ലക്ഷ്യം സമയത്തിന് മുമ്പേ കൈവരിച്ചതായും അവർ പറഞ്ഞു. നവജാത ശിശുക്കൾ മുതൽ 40 വയസ്സ് വരെയുള്ള ഏഴ് കോടി പേരെ പരിശോധിച്ചത് ലോകത്തിലെ ഏറ്റവും വലിയ രോഗജനിതക പരിശോധനാ സംരംഭങ്ങളിൽ ഒന്നാണെന്നും രാഷ്ട്രപതി വ്യക്തമാക്കി.

ദൗത്യരീതിയിൽ നടത്തിയ പരിശോധനകളിലൂടെ ഇതുവരെ ഏകദേശം രണ്ടര ലക്ഷം ആളുകളിൽ രോഗം കണ്ടെത്തിയതായും 20 ലക്ഷത്തിലധികം രോഗവാഹകരെ തിരിച്ചറിഞ്ഞതായും രാഷ്ട്രപതി പറഞ്ഞു. ഇത്രയും വലിയ എണ്ണം രോഗവാഹകരുള്ള സാഹചര്യത്തിലെ വെല്ലുവിളികൾ മനസ്സിലാക്കേണ്ടതുണ്ടെന്നും അവർ ചൂണ്ടിക്കാട്ടി. രോഗികളെയും രോഗവാഹകരെയും കണ്ടെത്തുന്നതോടൊപ്പം ആവശ്യമായ ആരോഗ്യപരിപാലനം ഉറപ്പാക്കിയ കേന്ദ്ര-സംസ്ഥാന സർക്കാരുകളുടെ പ്രവർത്തനത്തെയും അവർ അഭിനന്ദിച്ചു.

2025 സെപ്റ്റംബർ 17 മുതൽ ഒക്ടോബർ 2 വരെ നടന്ന പദ്ധതിയുടെ ഭാഗമായി നാല് ലക്ഷത്തിലധികം സ്ത്രീകളെ പരിശോധിച്ച് മധ്യപ്രദേശം ശ്രദ്ധേയമായ സംഭാവന നൽകിയതായും രാഷ്ട്രപതി പറഞ്ഞു. കഴിഞ്ഞ വർഷം അന്താരാഷ്ട്ര സിക്കിൾ സെൽ ദിനത്തിൽ ആരംഭിച്ച “സിക്കിൾ മിത്ര” പദ്ധതിയിലൂടെ സർക്കാർ, സർക്കാരിതര സ്ഥാപനങ്ങൾ, സന്നദ്ധ സംഘടനകൾ, ദേശീയ കേഡറ്റ് സേന അംഗങ്ങൾ എന്നിവർക്ക് ബോധവത്കരണത്തിനും രോഗിസഹായത്തിനുമായി പരിശീലനം നൽകിയിട്ടുണ്ട്. എല്ലാ സംസ്ഥാനങ്ങളുടെയും കൂട്ടായ പ്രവർത്തനത്തിലൂടെ 2047ന് മുമ്പ് രാജ്യത്ത് നിന്ന് സിക്കിൾ സെൽ രോഗബന്ധിത പ്രശ്നങ്ങൾ ഇല്ലാതാക്കാനുള്ള ദേശീയ ലക്ഷ്യം കൈവരിക്കാമെന്ന പ്രതീക്ഷയും രാഷ്ട്രപതി പ്രകടിപ്പിച്ചു.